ყოფილი მხარდამჭერი ხელისუფლებას რეკეტსა და "ბიზნესის ახევის“ ხელშეწყობაში ადანაშაულებს, რასაც კობახიძე შოუს უწოდებს - რას აცხადებს პროკურატურა და ვინ არის ბიზნესმენი "რამზესი"?

ბიზნესმენი გიორგი ჩიკვაიძე, რომელიც წლების განმავლობაში "ქართული ოცნების“ მხარდამჭერად მიიჩნეოდა და მმართველ პარტიას საარჩევნო კამპანიაშიც ეხმარებოდა, ახლა ხელისუფლებას რეკეტსა და "ბიზნესის ახევის“ ხელშეწყობაში ადანაშაულებს.

ის "ფიზიკური ლიკვიდაციის“ რისკზე ლაპარაკობს და ამბობს, რომ "სკანდალურ ამბებს" გაასაჯაროებს. ჩიკვაიძის თქმით, ბიძინა ივანიშვილის ძმის, ალექსანდრე ივანიშვილის მოგზავნილი კაცი ნარკოტიკებს და ფულის გათეთრებას სთავაზობდა. ჩიკვაიძე ამტკიცებს, რომ მისი ტერორი მას შემდეგ დაიწყო, რაც 2022 წელს ანტისახელმწიფოებრივ დავალებაზე უარი თქვა.

• რას ამბობს პრემიერი?

"2012 წლის შემდეგ საქართველოში ბიზნესის რეკეტი შეწყდა" - ასე უპასუხა პრემიერ-მინისტრი ირაკლი კობახიძემ ჟურნალისტის კითხვას, რომელიც ბიზნესმენ გიორგი ჩიკვაიძის მიერ გაკეთებულ განცხადებებს შეეხებოდა.

"ბიზნეს-რეკეტი იყო სისტემური 2012 წლამდე და 2012 წლიდან შეწყდა. რაც შეეხება ასეთი ტიპის წინასაარჩევნო შოუებს, ჩვენ გვახსოვს ასეთი ტიპის შოუები არაერთხელ. როცა ტარდებოდა არჩევნები, მაინცდამაინც არჩევნების წინ გამოდიოდნენ ადამიანები და ასეთ რაღაცებს ამბობდნენ ყოველგვარი მტკიცებულებების გარეშე. გახსოვთ ოქრუაშვილის ამბავი და ა.შ. თუმცა ვერცერთ ჯერზე ვერავინ ვერავითარი მტკიცებულება ვერ წარმოადგინა, რომ ასეთი რამ ხდება. ამ შემთხვევაში არის კაცი, რომელსაც თავისი პრობლემები აქვს. ამ პრობლემებს არ მინდა ჩავუღრმავდე. ეს არის მორიგი წინასაარჩევნო შოუ, რომლის მტკიცებულებაც არ არსებობს“, - განაცხდა კობახიძემ.

ბრალდებებს უარყოფს პროკურატურაც და მისი ყოფილი ბიზნესპარტნიორიც, რომელსაც გიორგი ჩიკვაიძე ბიძინა ივანიშვილის ძმასთან ახლო კავშირების ბოროტად სარგებლობაში ადანაშაულებს.

• რა წერია პროკურატურის განცხადებაში?

"საზოგადოების ინფორმირების მიზნით განვმარტავთ, რომ 2024 წლის 23 იანვარს, აჭარის პროკურატურის საგამოძიებო სამმართველოში კომპანია "ელთ ბილდინგის“ საჩივრის საფუძველზე გამოძიება დაიწყო მათი კომპანიის კუთვნილი დიდი ოდენობით თანხების თაღლითურად დაუფლების ფაქტზე, ხოლო 2024 წლის 1 მარტს საქმე გამოსაძიებლად ფინანსთა სამინისტროს საგამოძიებო სამსახურს გადაეცა. აქედან გამომდინარე, სატელევიზიო ეთერით გიორგი ჩიკვაიძის განცხადება თითქოსდა აღნიშნულ სისხლის სამართლის საქმეზე დაწყებული გამოძიება მტკიცებულებების არარსებობის გამო შეწყდა და შემდგომ ხელახლა დაიწყო, არის სიცრუე.

სისხლის სამართლის საქმეზე ჩატარებული გამოძიების შედეგად დადგენილია, რომ 2022 წლის გაზაფხულზე გიორგი ჩიკვაიძემ და ირაკლი პაპიაშვილმა ქ. ბათუმში, ე.წ. ახალი ბულვარის მიმდებარედ, შპს "ელთ ბილდინგის“ მშენებარე კომპლექს "მარინა ქლაბში“ თითქოსდა ფართების შეძენის მიზნით, ხოლო სამომავლოდ იახტკლუბის მშენებლობაში მონაწილეობის მიღებისა და ინვესტიციების მოზიდვის მოტივით, მოლაპარაკებები დაიწყეს "ელთ ბილდინგის“ კომერციულ დირექტორთან ვალერი გურგენაძესთან და კომპანიის დამფუძნებელთან ელგუჯა თურმანიძესთან. მეტი დამაჯერებლობისთვის, ხსენებულმა პირებმა "ელთ ბილდინგთან“ გააფორმეს საცხოვრებელი აპარტამენტების შეძენის წინარე ნასყიდობის ხელშეკრულებები და განახორციელეს მხოლოდ პირველი შენატანის გადახდა 500 - 500 აშშ დოლარის ოდენობით, თუმცა მალევე ნასყიდობის ხელშეკრულება თანხის გადაუხდელობის გამო გაუქმდა. შპს "ელთ ბილდინგის“ ხელმძღვანელი პირების ნდობის მოპოვების შემდეგ, გიორგი ჩიკვაიძემ და ირაკლი პაპიაშვილმა ვალერი გურგენაძეს და ელგუჯა თურმანიძეს განუცხადეს, რომ მათ კუთვნილ კომპანიას "რამსეს ჯორჯიან იახტინგ პლათფორმს“ კავშირი ჰქონდა იახტების მწარმოებელ ცნობილ იტალიურ კომპანიასთან და შეეძლოთ იახტის ჩამოყვანა შპს "ელთ ბილდინგისთვის“. მას შემდეგ, რაც იახტა ჩამოვიდოდა ქ.ბათუმში და გაფორმდებოდა "ელთ ბილდინგის“ სახელზე, "რამსეს ჯორჯიან იახტინგ პლათფორმი“ იახტას იჯარით, 3 წლით აიღებდა და ყოველწლიურად შპს "ელთ ბილდინგს“ იჯარის საფასურს გადაუხდიდა.

2022 წლის 10 სექტემბერს შპს "ელთ ბილდინგსა“ და "რამსეს ჯეორჯიან იახტინგ პლათფორმს“ შორის გაფორმდა იახტის ნასყიდობის ხელშეკრულება 1 155 019 ლარის სანაცვლოდ და იახტის მიწოდების ვადად განისაზღვრა 2023 წლის 31 აგვისტო. ასევე, მხარეებს შორის გაფორმდა იახტის იჯარის ხელშეკრულება.

ასევე მოგვიანებით, გიორგი ჩიკვაიძის ინიციატივით, მხარეები შეთანხმდნენ იახტის სხვა მოდელზე, ამასთან, გადაიწია მიწოდების ვადამაც, კერძოდ განისაზღვრა 2023 წლის 20 სექტემბრამდე პერიოდი და მიწოდების ადგილად შეირჩა ესპანეთი, ალიკანტე. ამის შემდგომ, ასევე გიორგი ჩიკვაიძის ინიციატივით, არაერთხელ შეიცვალა შეთანხმება მიწოდების ვადებთან დაკავშირებით და ყოველ ჯერზე აღნიშნული ვადის გადაწევა ხდებოდა.

2022 წლის 15 სექტემბრიდან 2023 წლის 27 აპრილამდე პერიოდში, შპს "ელთ ბილდინგმა“ შპს "რამსეს ჯეორჯიან იახტინგ პლათფორმის“ ანგარიშზე ჩარიცხა იახტის ღირებულების საფასური 1 155 019 ლარი, თუმცა გიორგი ჩიკვაიძემ და ირაკლი პაპიაშვილმა ხელშეკრულებით გათვალისწინებული პირობა არ შეასრულეს და შპს "ელთ ბილდინგს“ იახტა არ მიაწოდეს.

გიორგი ჩიკვაიძე და ირაკლი პაპიაშვილი მთელი ამ პერიოდის განმავლობაში "ელთ ბილდინგის“ ხელმძღვანელ პირებს სხვადასხვა გამოგონილი მიზეზით, მათ შორის თურქეთის პორტში მომხდარი შტორმის შედეგად იახტის ძრავის დაზიანების და მისი შეკეთების საბაბით უვადებდნენ იახტის გადაცემის ვადებს, უგზავნიდნენ თითქოსდა მათთვის შეძენილი იახტის ვიდეოებს და ლოკაციებს, ხოლო რეალურად იახტის შესაძენად გადახდილი თანხით გიორგი ჩიკვაიძემ დაფარა სხვა მოვალეების წინაშე არსებული ვალდებულებები და აღნიშნული თანხა პირადი მიზნებისთვის გამოიყენა. აქედან გამომდინარე, გიორგი ჩიკვაიძის კუთვნილი კომპანიის მიერ იახტის შეძენა არ მომხდარა. საბოლოოდ მხარეები შეთანხმდნენ, რომ გიორგი ჩიკვაიძე და ირაკლი პაპიაშვილი თანხას დაუბრუნებდნენ "ელთ ბილდინგს“ და 2023 წლის 21 დეკემბერს, ირაკლი პაპიაშვილმა "ელთ ბილდინგის“ ანგარიშზე მხოლოდ 147 065 ლარი დააბრუნა, ამის შემდგომ დარჩენილი თანხის გადახდა არ მომხდარა.

ორგი ჩიკვაიძეს და ირაკლი პაპიაშვილს ბრალდება საქართველოს სისხლის სამართლის კოდექსის 182, II – "ა, ,,დ’’, III -“ბ” მუხლით (წინასწარი შეთანხმებით ჯგუფის მიერ სამსახურეობრივი მდგომარეობის გამოყენებით, დიდი ოდენობით თანხის მართლსაწინააღმდეგო მითვისება) წარედგინათ და აღკვეთი ღონისძიების სახით შეეფარდათ გირაო - თითოეულს 50 000 ლარის ოდენობით და საზღვრის კვეთის აკრძალვა. საქმის არსებითი განხილვა ამჟამად თბილისის საქალაქო სასამართლოში მიმდინარეობს.

აღნიშნულიდან გამომდინარე, გიორგი ჩიკვაიძის სატელევიზიო განცხადებები არის სიცრუე და ემსახურება საგამოძიებო სტრუქტურების დისკრედიტაციის მცდელობას, სისხლის სამართლებრივი პასუხისმგებლობიდან თავის არიდების მიზნით. რაც შეეხება მის მიერ გაკეთებულ განცხადებას ადვოკატის მხრიდან თანხის გამოძალვის ფაქტზე, აღნიშნულთან დაკავშირებით გამოძიება დაიწყო ზეგავლენით ვაჭრობის შესაძლო ფაქტზე და გიორგი ჩიკვაიძე შესაბამისი ჩვენების მისაცემად დაბარებული იქნება საგამოძიებო უწყებაში.

სისხლის სამართლის საქმეზე მტკიცებულებათა ნაწილს საქართველოს პროკურატურა დღეს გაასაჯაროებს“.

• ვინ არის გიორგი ჩიკვაიძე, იგივე "რამზესი"?

38 წლის გიორგი ჩიკვაიძეს, მეტსახელით "რამზესი", ქართველი საზოგადოება წლებია იცნობს. ის პროფესიით ვეტერინარია, თუმცა მოგვიანებით იახტების ბიზნესში მოხვდა.

მისი დაფუძნებულია კომპანია "აზიმუტ იახტები საქართველო“ და "რამზეს იახტსი“, ასევე "რამზეს ჯეორჯიან იახტინგ პლათფორმი“.

მედიისთვის მისივე მონაყოლის თანახმად, დაახლოებით 2015 წლიდან, საფრანგეთში ყოფნისას ჩაერთო იახტების ბიზნესში, - მოხვდა საერთაშორისო კომპანია "აზიმუტ ბენეტში“ და იქ დაგროვილი გამოცდილებით დაიწყო კარიერა საქართველოშიც.

პოლიტიკური თანამდებობა არ ჰქონია, მაგრამ ბოლო 12 წლის განმავლობასი დაახლოებული იყო "ქართული ოცნების“ გუნდთან.

წაიკითხეთ ასევე:

• რას ამბობს ბიზნესმენი და სასურველი სასიძო "რამზესი" იახტებზე გაზრდილ მოთხოვნაზე, რა აკავშირებს ნინი ბადურაშვილთან და როგორ გამოიყურება 3-სართულიანი იახტა, რომლის დაქირავებაც შესაძლებელი იქნება