“საიდან ვიცი, რომ ჩემი მშობლები არიან?..“ - თამუნა მუსერიძე ჰყვება ახალ დეტალებს, თუ როგორ მიაკვლია ბიოლოგიურ მშობლებს (ვიდეო)
“მგონია, რომ მინი სერიალის სერიებს ვდებ ნაწილ-ნაწილ. სასწრაფოდ მჭირდება რეჟისორი. სერიები სწორად რომ დაალაგოს. მარკეტინგის მენეჯერი, რეკლამები რომ გავუშვა შუალედებში. აგრეთვე კომპოზიტორი, რომელიც საუნდრტეკს დამიწერს,“ - ამის შესახებ ჟურნალისტი თამუნა მუსერიძე წერს, რომლითაც ბოლო დროს, მის ცხოვრებაში მომხდარ მნიშვნელოვან ცვლილებას ეხმიანება.
მან რამდენიმე დღის წინ მხარდამჭერებს ამცნო, რომ 8-წლიანი ძებნის შემდეგ, ბიოლოგიური მშობლები იპოვა.
“მესმის და ვითვალისწინებ ყველა იმ ადამიანის მიმართ პასუხისმგებლობას, რომელიც მთელი ამ დროის განმავლობაში იყო ჩართული ჩემი მშობლების მოძიებაში და მეხმარებოდა ყველანაირად. მაგრამ, გამომდინარე იქიდან, რომ თავად ჩემმა მშობლებმაც არ იციან, რომ ჩემი მშობლები არიან, ყველა დეტალს ვერ დავწერ, სანამ მათ პირადად არ ვნახავ.
რამდენიმე დღეში ვნახავ მათ პირადად და დეტალებს მოგაწვდით.
საიდან ვიცი, რომ ჩემი მშობლები - ჩემი მშობლები არიან, თუ მათ არ იციან? - საიდან და გენეტიკური ტესტის წყალობით დადასტურდა, რომ ისინი ნამდვილად ჩემი მშობლები არიან. ეს ტესტი გაიკეთა ჩემმა ნათესავმა და შემდგომ ყველაფერი გაირკვა. ასე რომ, ცოტაც დარჩა. ვნახავ და შემდეგ დანარჩენ ინფორმაციასაც მოგაწვდით,“ - აცხადებს ჟურნალისტი ახალ მიმართვაში.
გუშინ ცნობილი გახდა, რომ ტელეწამყვანმა ბიოლოგიური მშობლები იპოვა.
მუსერიძემ 31 წლის ასაკში გაიგო, იმის შესახებ, რომ ის “აყვანილი“ იყო. მას შემდეგ ბიოლოგური მშობლების ძიება არ შეუწყვეტია.
თამუნა მუსერიძე ბი-ბი-სის 2023 წლის ასი ყველაზე გავლენიანი ქალის სიაში მოხვდა. აღსანიშნავია, რომ ის პირველი ქართველი ქალია, რომელიც ამ სიაში აღმოჩნდა.
მან 2017 წელს დააფუძნა "ფეისბუკ"-ჯგუფი "ვეძებ" და ათეულობით ადამიანს აპოვნინა დედა, მამა, დედმამიშვილები, ნათესავები... თავისი ბიოლოგიური მშობლების ძიების პროცესში მან აღმოაჩინა, რომ საქართველოში მე-20 საუკუნიდან არსებობდა ჩვილებით ვაჭრობის მავნე პრაქტიკა, რის გამოც, ბევრი ბავშვი გარდაცვლილად გამოაცხადეს და უკანონოდ გააშვილეს.
რამდენიმე თვის წინ კი პრეზიდენტმა ღირსების მედლით დააჯილდოვა.
იხილეთ ასევე: