“მეც არ მომეწონა, პირჯვარი რომ გადავიწერე, გაიცინა; სულით და გულით მინდა, რომ ოლიმპიადაზე ავამღერო ქართული ჰიმნი“ - რას იხსენებს პარამკლავჭიდელი შეხვედრაზე, რომელიც ინტერნეტს ვირუსულად მოედო
პარამკლავჭიდელი ვახტანგ ახობაძე, რომელმაც მოლდოვეთში გამართულ მსოფლიო ჩემპიონატზე 60 კილოგრამ წონით კატეგორიაში გამარჯვება მოიპოვა და მსოფლიო ჩემპიონი გახდა, მეტოქესთან დაპირისპირების დეტალებს იხსენებს.
ინტერნეტში, ვირუსულად გავრცელდა ახობაძისა და მისი მეტოქის ვიდეო, სადაც ჩანს, რომ დამარცხების შემდეგ, პარამკლავჭიდელი მას ხელს არ ართმევს. დასაწყისში კი იცინის - სწორედ ამან გამოიწვია საზოგადოების ნაწილის გაღიზიანება.
“მეც არ მომეწონა, პირჯვარი რომ გადავიწერე, მან გაიცინა.
თუ არაფერი მეტკინა, მანამდე ვიბრძოლებ. მიფიქრია, თავი უნდა დავანებო მაგრამ, მკავჭიდმა გადამალახინა ეს ყველაფერი.
ყველაფრისთვის მადლობა ჩემს ბიჭებს. მეგობარი თუ არ გყავს გვერდით, დასანანია. ღმერთის წყალობით, ყველაფერი კარგად იქნება.
თუ იტყვი, რომ არ შემიძლია, მაშინ არაფერი არ გამოვა. რწმენა უნდა გქონდეს, რომ მე ამას შევძლებ!
ვახტანგი ახობაძე არის ერთ-ერთი ქუთაისელი. სულით და გულით მინდა, რომ ოლიმპიადაზე ავამღერო ქართული ჰიმნი,“ – ვრცელდება ამონარიდები პარამკლავჭიდელის ინტერვიუდან.
როგორც სპორტსმენი Nomad Sports- თან აცხადებს, ყველაზე მეტად გული იმაზე დასწყდა, რომ მეტოქემ ხელი არ ჩამოართვა:
- “მოვიგე და ხელი გავუწოდე, ხელი არ ჩამომართვა. ქართველები თავმდაბალი ერი ვართ. ჩვენ ვიცით - რამდენჯერ წაგვიგია, მაგრამ მოწინააღმდეგესთვის ხელი ჩამოგვირთმევია და მეორე დღეს ძმაკაცობა გვითქვამს,“ - გაიხსენა ახობაძემ.
შეგახსენებთ, რომ მოლდოვეთში გამართულ მსოფლიო ჩემპიონატზე საქართველოს პარამკლავჭიდის ეროვნულმა ნაკრებმა გუნდურ ჩათვლაში პირველი ადგილი მოიპოვა. ქართველმა პარასპორტსმენებმა მსოფლიო ჩემპიონატზე 30 ოქროს, 22 ვერცხლისა და 19 ბრინჯაოს მედალი მოიპოვეს. ტურნირზე 61 ქვეყნის პარასპორტსმენი იღებდა მონაწილეობას.
პარამკლავჭიდელმა გოგოებმა გუნდური მესამე ადგილი დაიკავეს. გამარჯვებულებს შორის იყო ვახტანგ ახობაძე, რომელმაც ფინალურ მატჩში, 60 კილოგრამ წონით კატეგორიაში (მარჯვენა მკლავი) გამარჯვება მოიპოვა.
საქართველოში დაბრუნებისას მას გულშემატკივრები აეროპორტში არ დახვდნენ. თუმცა, მოგვიანებით უამრვი საჩუქარი, მათ შორის ბინა, ავტომობილი და ფულადი პრიზები გადასცეს.