სროლა ფსოუს საგუშაგოსთან: მკვლელობის ბრალდებით დაკავებულია 4 ეჭვმიტანილი - რას აცხადებენ ოკუპირებულ აფხაზეთში?
23 ივნისს სროლას აფხაზეთში, კერძოდ, გაგრის რაიონში, რუსეთის საზღვართან ახლოს ერთი ადამიანი ემსხვერპლა, დაშავდა სამი, მათ შორის ერთი ბავშვი.
ფსოუს საგუშაგოზე მომხდარზე სისხლის სამართლის საქმე მკვლელობის, ასევე იარაღის უკანონო შენახვა-ტარების მუხლით აღიძრა. ამის შესახებ ორშაბათს, 24 ივნისს, გაგრის ე.წ. რაიონულ პროკურატურაში განაცხადეს.
"რია ნოვოსტის" ცნობით, აფხაზეთის დე ფაქტო გენერალურმა პროკურატურამ სისხლის სამართლის საქმე აღძრა ორი მუხლით: "იარაღის უკანონო შენახვა-გადატანა“ (117-ე მუხლი) და "მკვლელობა“ (99-ე მუხლის მე-2 ნაწილი).
წინასწარი ინფორმაციით, უცნობმა პირებმა ავტომატიდან ცეცხლი გაუხსნეს ავტომანქანას რუსეთისა და აფხაზეთის ე.წ. საზღვარზე მდებარე საგუშაგოზე. ამის შემდეგ ისინი გაუჩინარდნენ. როგორც ადგილობრივმა პროკურატურამ აღნიშნა, საგუშაგო ჩვეულ რეჟიმში მუშაობს და ინციდენტს საზღვარზე ხალხის გადაადგილებისთვის პრობლემა არ შეუქმნია.
მოგვიანებით, აფხაზეთის დე ფაქტო შინაგან საქმეთა სამინისტროს ხელმძღვანელმა რობერტ კიუტმა განაცხადა, რომ რუსეთის საზღვართან, გაგრის რაიონში თავდამსხმელთა ვინაობა დადგენილია.
ბოლო ინფორმაციით, რუსეთის ფედერაციისა და აფხაზეთის დე ფაქტო საზღვარზე მომხდარ სროლაში და მკვლელობაში ეჭვმიტანილები დააკავეს, ამის სესახებ თვითგამოცხადებული რესპუბლიკის პროკურატურა იტყობინება.
"ოპერატიული სამუშაოები მიმდინარეობს. დააკავეს რამდენიმე პირი საზღვარზე დანაშაულის ჩადენის ბრალდებით. მიმდინარეობს მათი დაკითხვა და დგინდება მათი მონაწილეობა დანაშაულში“, - განუცხადა TASS-ს წყარომ .
ე.წ. შსს-ს ხელმძღვანელის რობერტ კიუტის განცხადებით, დაკავებულია ოთხი პირი, მათგან სამი აფხაზეთში, ერთი - რუსეთში.
ოფიციალური ინფორმაციით, დაზიანდა რუსული ნომრით ავტომობილი. ამ ცნობის თანახმად, გარდაცვლილი გამვლელი იყო.
წყაროს თქმით, სროლა იყო მოხდა ახალ ათონშიც, რის შედეგადაც ერთი ადამიანი დაიჭრა. ინციდენტების გამომწვევი მიზეზები ჯერჯერობით უცნობია.
რუსეთში, აფხაზეთის საზღვარზე მდებარე საგუშაგოზე სროლამდე სულ რაღაც ნახევარი საათით ადრე, ცეცხლსასროლი იარაღით თავდასხმები მოხდა მახაჩყალასა და დერბენტში.
წაიკითხეთ ასევე: