"კანონპროექტი წარადგინა "ქართულმა ოცნებამ", რომლის საპატიო თავმჯდომარე საიდუმლოებით მოცული მილიარდერი ოლიგარქი ბიძინა ივანიშვილია" - რას წერს Washington post-ი?
"საქართველოს მმართველმა პარტიამ 28 მაისს პრეზიდენტის ვეტო დაძლია, რათა "უცხოური გავლენის" კანონი მიიღოს, რომელსაც, კრიტიკოსების აზრით, სამოქალაქო საზოგადოებისა და დამოუკიდებელი მედიის ჩასახშობად გამოიყენებს", - ასე იწყება Washington Post-ში გამოქვეყნებული ანალიტიკური სტატია, რომელიც მკითხველს საქართველოში მიმდინარე მოვლენებს აცნობს.
"ყოფილ საბჭოთა რესპუბლიკაში, რომელშიც 3.7 მილიონი ადამიანი ცხოვრობს, ბოლო კვირებია არეულობაა და საპროტესტო აქციები მიმდინარეობს. მაშინაც კი, როცა დეპუტატები ხმის მისაცემად შეიკრიბნენ, პარლამენტთან ათასობით ადამიანი საქართველოს დროშებით გამოცხადდა და პოლიციის ფალანგას დაუპირისპირდა", - წერს გამოცემა.
Washington Post - ი პრეზიდენტ სალომე ზურაბიშვილს "ქართული ოცნების" მტკიცე კრიტიკოსად მოიხსენიებს და მისი განცხადება მოჰყავს, რომელშიც ზურაბიშვილი ამბობს, რომ კანონი საქართველოს კონსტიტუციას და ევროპულ, დემოკრატიულ ღირებულებებს ეწინააღმდეგებოდა.
"პრეზიდენტის ვეტოს დაძლევის შემდეგ, ევროკომისიის მიერ გავრცელებულ განცხადებაში ღრმა სინანული გამოითქვა პარლამენტის გადაწყვეტილების გამო. თვეზე მეტია, ამერიკელი და ევროპელი ლიდერები საქართველოს აფრთხილებდნენ, რომ კანონის მიღება დასავლეთთან დაახლოებისა და ევროკავშირში გაწევრების გეგმებს ძირს გამოუთხრიდა. ამ კანონის ამოქმედებით, რომელიც უახლოეს დღეებშია მოსალოდნელი, საქართველო ევროკავშირში გაწევრებისთვის საჭირო რამდენიმე საკვანძო სფეროში უკუსვლით წავა. კომისიის განცხადების მიხედვით, ეს სფეროები დეზინფორმაციისა და პოლარიზაციის წინააღმდეგ ბრძოლას და სამოქალაქო საზოგადოების ფუნდამენტური უფლებების დაცვას მოიცავს".
Washington post-ს ევროკომისიის განცხადების ის მონაკვეთი მოჰყავს, რომელშიც ისინი "ქართულ ოცნებას" მიმართავენ:
"საქართველოს ხელისუფლებას მოვუწოდებთ, შეცვალოს ეს ტენდენცია და ევროკავშირის გზაზე დაბრუნდეს. ჯერ კიდევ არის დრო დინამიკის შესაცვლელად, მაგრამ ამისთვის მმართველი ხელისუფლების მტკიცე ვალდებულებაა საჭირო", - ნათქვამია ევროკომისიის განცხადებაში.
გამოცემა სტატიაში ბიძინა ივანიშვილის გავლენებზეც საუბრობს:
"ეს კანონპროექტი წარადგინა "ქართულმა ოცნებამ" , რომლის საპატიო თავმჯდომარე საიდუმლოებით მოცული მილიარდერი ოლიგარქი ბიძინა ივანიშვილია. ეს იმისთვის, რომ იმ ორგანიზაციებს, რომლებიც 20%-ზე მეტ დაფინანსებას საზღვარგარეთიდან იღებენ, აგენტების იარლიყი მიაკრან. ამ წლის მიუნხენის უსაფრთხოების ანგარიშში ივანიშვილი აღწერილია, როგორც "პრორუსი ოლიგარქი", რომელიც ქვეყნის ბოლოდროინდელ დემოკრატიულ უკუსვლაზე და ევროკავშირისგან დაშორებაზეა პასუხისმგებელი, რაც ქართული საზოგადოების უმრავლესობის სურვილს ეწინააღმდეგება".
"მთავრობა პარალელურად ამტკიცებს, რომ კანონი საქართველოს დამოუკიდებლობის გასაძლიერებლად და დასავლეთის მიერ დაფინანსებული არასამთავრობო ორგანიზაციებისა და მედია საშუალებების გავლენის დასაძლევადაა აუცილებელი. თუმცა ცალსახაა, რომ "უცხოური გავლენის" კანონი რუსულ კანონს ჰგავს, სადაც ის ფართოდ იქნა გამოყენებული სამოქალაქო საზოგადოების შევიწროებისა და განსხვავებული აზრის ჩასახშობად", - ვკითხულობთ სტატიაში.
"კანონპროექტთან დაკავშირებული საპროტესტო აქციები, პარლამენტში მუშტები, მომიტინგეების დასაშლელად გაშვებული ცრემლსადენი გაზი, წყლის ჭავლი და რეზინის ტყვიები უკვე კვირებია გრძელდება, თუმცა ქართველები, მათ შორის ბევრი სტუდენტი და ახალგაზრდა, კვლავ ქუჩაშია გასული", - წერს Washington post-ი.
წყარო: washingtonpost
მოამზადა: ანა სიბოშვილმა