27
მარტიდღის ზოგადი ასტროლოგიური პროგნოზი
მთავარი ფოტო: ბიძინა ივანიშვილი, თბილისში აშშ-ის საელჩოში, 2013 წელი
საქართველომ ამერიკიდან დღეს მძიმე გზავნილები მიიღო. შეერთებული შტატები საქართველოს ხელისუფლების წარმომადგენლებისთვის სანქციებს აანონსებს, მათ შორის ოჯახის წევრებზე. 23 მაისს, სენატორებმა ჯინ შაჰინმა (დემოკრატი ნიუ-ჰემფშირიდან) და ჯიმ რიშმა (რესპუბლიკელი ნიუ-ჰემშირიდან) შეერთებული შტატების სენატში ორპარტიული კანონპროექტი წარადგინეს, რომელსაც "ქართველი ხალხის აქტი" ეწოდება.
აქტში საუბარია საქართველოს ხელისუფლების, ყოფილი და ახლანდელი წევრებისთვის სანქციების დაწესებაზე, რომლებიც თანამდებობაზე 2012 წლის შემდეგ იმყოფებოდნენ და ასევე იმ პირებზე, რომლებიც მონაწილეობენ ძალადობაში, მუქარასა და შანტაჟში სამოქალაქო საზოგადოების, მედიისა თუ ოპოზიციის წინააღმდეგ.
სენატორების მიერ წარდგენილი აქტი ავალდებულებს სახელმწიფო დეპარტამენტს, შეადგინოს იმ პირთა სია, ვინც ძირს უთხრის საქართველოში დემოკრატიულ პროცესებს, ჩართულია კორუფციაში ან “ბლოკავს ევრო-ატლანტიკურ ინტეგრაციას საქართველოში". კანონპროექტი მოიცავს როგორც სავიზო, ისე ქონებრივ სანქციებს.
- კანონპროექტი ასევე განიხილავს კერძო საკუთრების გაყინვას და ავრცელებს საქართველოზე "რუსეთის მავნე საგარეო საქმიანობის" და ე.წ. "მაგნიტსკის აქტით" გათვალისწინებულ სანქციებს.
აშშ-ის სახელმწიფო მდივნის ენტონი ბლინკენის განცხადებით, სახელმწიფო დეპარტამენტი ახორციელებს საქართველოსთვის სავიზო შეზღუდვის ახალ პოლიტიკას, რომელიც გავრცელდება იმ პირებზე, რომლებიც პასუხისმგებლები ან თანამონაწილეები არიან საქართველოში დემოკრატიისთვის ძირის გამოთხრაში, ასევე მათი ოჯახის წევრებზე. ეს მოიცავს პირებს, რომლებიც პასუხისმგებლები არიან საქართველოში სამოქალაქო საზოგადოებისა და მშვიდობიანი შეკრების თავისუფლების აღკვეთაზე ძალადობის ან დაშინების კამპანიის გზით.
"ქართულ ოცნებაში" ამბობენ, რომ არ აპირებენ ქვეყნის სუვერენიტეტითა და უსაფრთხოებით ვაჭრობას.
"სანქციების გავრცელება ოჯახის წევრებზე, მათ შორის არასრულწლოვან შვილებზე, არის სანქციის ფორმა, რომელზეც არა მხოლოდ ევროპამ თქვა გასული საუკუნის 40-იანი წლებიდან მკაცრად უარი, არამედ 60-იანი წლებიდან საბჭოთა კავშირშიც კი აღარ გამოიყენებოდა" - აცხადებენ მმართველ პარტიაში. (წაიკითხეთ სრულად "ქართული ოცნების" განცხადება)
გია ხუხაშვილი, პოლიტოლოგი:
"სამწუხარო პროცესია, ფაქტობრივად, ჩვენ მივედით იქამდე, როდესაც ძალიან ახლოს ვართ შეუქცევად პროცესებთან, უკვე გაცხადდა სანქციები... ამათი ყველაფერი ჯანდაბას წაუღია, სად და როგორ იქნებიან, ვის აინტერესებს, მაგრამ ამით ჩვენც ხომ დავზარალდებით? ესენი კი ცდილობენ, რომ ყველაფერი ამერიკაში მგზავრობამდე დაიყვანონ, მაგრამ ჩვენ უნდა გვესმოდეს, რომ სასანქციო პოლიტიკა ისეთი პოლიტიკაა, რომელიც დომინოს პრინციპით ვითარდება და ყველა ასპექტს შეეხება.
ამათ ნუ ექნებათ იმედი, რომ მხოლოდ აშშ-ში მგზავრობაზე იქნება ლაპარაკი, ეს შეეხება მათი კეთილდღეობის და უსაფრთხოების პრაქტიკულად ყველა ასპექტს, მათ შორის - საქართველოშიც. ასე რომ, პროცესი მძიმეა, რომლის გამოც ყველა ჩვენგანი ვიზარალებთ იმიტომ, რომ ხელისუფლების და სახელმწიფოს ცხოვრების გამიჯვნა 100%-ით შეუძლებელია. იმედი მაქვს, როდესაც ეს ქართული კოშმარი დასრულდება, პოლიტიკოსებისგან განსხვავებით, ჩვენი სახელმწიფო ამ ზარალს სწრაფად აინაზღაურებს.
- 2012 წლიდან მოქმედ მაღალჩინოსნებს შეეხებათ სანქციები, არ აქვს მნიშვნელობა, დღეს სად არიან, რაც იმას ნიშნავს, ვისაც ამ მარაზმში მონაწილეობა აქვს მიღებული, ყველა დასანქცირდება. ეს ფაქტობრივად, იმისთვის გაკეთდა, რომ ბიძინა ივანიშვილიც დაეფარათ, ის ხომ დღეს არანაირ პოსტზე არაა. და არა მარტო ის, მას ჰყავს გავლენის, ასე ვთქვათ, ინტერეს ჯგუფი, რომლის წარმომადგენლებიც დღეს აღარ არიან ხელისუფლებაში, მაგ. ოთარ ფარცხალაძე და რამდენია ასეთი, რომლებიც დღეს მართალია ხელისუფლებაში არ არიან, მაგრამ თავის დროზე ამ მანკიერი სისტემის ფორმირებაში მიიღო მონაწილეობა?
სანქციები ბევრ ასპექტს ეხება, მათი ოჯახის წევრებსაც, რა თქმა უნდა, ბევრს აქვს ქონება უცხოეთში, ასევე ბევრის შვილი სწავლობს ამერიკაში და მათ, ალბათ, ვიზები გაუუქმდებათ. სანქციები ამათ არა მარტო ამერიკაში შეეხებათ. საბოლოო ჯამში, უნდა გვესმოდეს, რას ნიშნავს სანქციები - ის მოქმედებს ყველგან, მათ შორის, ზემო მაჩხაანშიც ვერ დაიმალებიან, მათ ბანკში ანგარიშები აქვთ, ფული დოლარში აქვთ შენახული, ზოგ შემთხვევაში - უცხოეთის ბანკებში, რომელიც გაეყინებათ, ასევე, აქვთ უძრავი ქონება უცხოეთში... ბევრი პრობლემაა და ამათ ვერც წარმოუდგენიათ, რამხელა პრობლემები შეექმნებათ. სამწუხაროდ, ამათ გამო ქვეყანაც დაზარალდება - საინვესტიციო გარემო გაფუჭდება, ეკონომიკური პრობლემები გაჩნდება, სამხედრო და ეკონომიკური დახმარება არ იქნება და სხვა. ბოლო-ბოლო, დასანქცირებული ხელისუფლება ქვეყნის რეპუტაციისთვისაც ცუდია და ეს მხოლოდ მათი პასუხისმგებლობაა. როგორც წესი, ამერიკის მერე, ევროკავშირიც ანალოგიურ ზომებს მიიღებს.“
წაიკითხეთ ასევე:
- რა განცხადებას ავრცელებს "ქართული ოცნება" აშშ-ის მიერ სანქციების დაანონსებაზე - "ეს მოვლენა ნაცრისფერი ასოებით ჩაიწერება მსოფლიო პოლიტიკის ისტორიაში"
- "სანქციები შეიძლება დაუწესდეს ყველას, ვინც 2012 წლიდან მუშაობდა საქართველოს მთავრობის ან პარლამენტის წევრად" - სენატში წარდგენილი კანონპროექტის დეტალები
