"ბრძოლის წინა დღეს შემოგვთავაზეს დიდი თანხა. მათ არ უნდოდათ რომ რინგზე გავსულიყავი..." - რას წერს მოკრივე ლაშა გურული რუს მეტოქესთან ბრძოლის შეწყვეტაზე

დიდი გამოხმაურება მოჰყვა კრივში ევროპის ჩემპიონატის ფინალში ქართველი მოკრივის, ლაშა გურულისა და რუსი ტარხან იდიგოვის დაპირისპირებას. გურულმა მეტოქე მეორე რაუნდში აშკარად დაჯაბნა, თუმცა აღნიშნული ეპიზოდი მსაჯებმა არასწორად შეაფასეს და ლაშამ მესამე რაუნდში ბრძოლის გაგრძელებაზე უარი თქვა. აღსანიშნავია, რომ დამსწრე მაყურებელი გურულის გადაწყვეტილებას ოვაციებით შეხვდა. ამრიგად, გურულმა ევროპის ჩემპიონატზე ვერცხლის მედალი მოიპოვა. ამ თემაზე ლაშა გურული სოციალურ ქსელში წერს:

"ბევრი შიდა და გარე პირობების გამო გადავწყვიტე, რომ ამ ფაქტთან დაკავშირებით კომენტარი ოლიმპიური თამაშების შემდეგ გავაკეთო.

ერთი იმას ვიტყვი, რომ ბრძოლის წინა დღეს შემოგვთავაზეს დიდი თანხა. მათ არ უნდოდათ, რომ რინგზე გავსულიყავი. საკადრისი პასუხი რომ მიიღეს, სიტყვები დატოვეს, რომ ამ ბრძოლას მაინც ყველა ვარიანტში წაიღებდნენ.

ჩემი ბრძოლის სტრატეგია იყო შორიდან მემუშავა, რომ დარტყმების გაცვლა არ ყოფილიყო.

შორი დისტანციიდან რუსმა ცალკარა წააგო პირველი რაუნდი, რაც მე ჩავთვალე, რომ მსაჯებიც უშანსოდ დარჩნენ, მაგრამ ყველაფრის მიუხედავად მაინც მიანიჭეს 4:1 უპირატესობა.

მეორე რაუნდში სტრატეგია შევცვალე და დარტყმებიც გავცვალეთ, ამიტომაც რაუნდი ქულების მიხედვით ახლოს იყო ერთმანეთთან, თუმცა მეორე რაუნდიც ვთვლი, რომ ჩემი მოგება იყო, მაგრამ 5:0 მიანიჭეს მას.

ჩემთვის ყველაფერი ნათელი გახდა ამიტომაც ჩემი პროტესტი სრულად ორგანიზაციის მიმართ იყო, რასაც სათანადო აჟიოტაჟი მოჰყვა დამკვირვებელთა კომისიისგან ორგანიზაციის მიმართ.

კიდე ბევრი მნიშვნელოვანი დეტალია, რომელზეც ოლიმპიური თამაშების მერე აუცილებლად ვისაუბრებ. ეს შეეხება მსოფლიო კრივს და კრივის მომავალს.

მადლობა ყველას".