"ახლა ვურეკავ სახალხო დამცველს... ლევან, მესამე ზარი შემოგდის, ტელეფონს არ პასუხობ" - სალომე სამადაშვილი
"ლელოს" ერთ-ერთი ლიდერმა, სალომე სამადაშვილმა აქციიდან პირდაპირ ეთერში ომბუდსმენს დაურეკა. თუმცა როგორც პოლიტიკოსმა თქვა, ლევან იოსელიანი მის ზარებს არ პასუხობს.
სამადაშვილის თქმით, ომბუდსმენი ვალდებულია, გამოვიდეს და ირაკლი კუპრაძის დაკავებაზე რეაგირება მოახდინოს.
"ახლა ვურეკავ სახალხო დამცველს, მესამე ზარი შემოგდის. ლევან... შენ ხარ ამ ქვეყნის სახალხო დამცველი, დააპატიმრეს პოლიტიკური ლიდერი, ყოველგვარი ახსნა-განმარტების გარეშე. ტელეფონს არ პასუხობ. ნუ შეხვალ ამ ქვეყნის ისტორიაში, როგორც ყველაზე სამარცხვინო სახალხო დამცველი. გამოდი და გაგვეცი პასუხი, სად არის ირაკლი კუპრაძე" - ამბობს სალომე სამადაშვილი.
ცნობისთვის, ცოტა ხნის წინ ცნობილი გახდა, რომ ირაკლი კუპრაძე დააკავეს. ამის შესახებ მან სოციალურ ქსელში დაწერა.
"მცემეს, დამიჭირეს... სასტიკად უსწორდებიან ხალხს" - წერს კუპრაძე.
მისი თანაპარტიელი საბა ბუაძე ამბობს, რომ მომხდარს თავადაც შეესწრო. "არ ვიცი ჯერ სად არის გადაყვანილი, ჩემს თვალწინ მოხდა ეს ამბავი. ჩვენს თვალწინ ასხამდნენ "წიწაკის სპრეის" გოგოებს, გადაუარეს ხალხს" - ამბობს ბუაძე.
ამ წუთებში პარლამენტის შენობის უკანა შესასვლელთან სამართალდამცველებსა და აქციის მონაწილეებს შორის შეხლა შემოხლაა.
სამართალდამცველებმა დემონსტრანტების წინააღმდეგ ე.წ. წიწაკის სპრეი გამოიყენეს. სპეცრაზმელებსა და დემონსტრანტებს შორის ფიზიკური დაპირისპირება გრძელდება
ნახეთ ასევე: