"პატარა ვიყავი, 19 წლის, როცა სახლიდან წავედი... იმდენმა ტკივილმა მოიყარა თავი, რომ ჩემს თავს ვეკითხებოდი, ღირდა თუ არა ამის გაკეთება" - რას იხსენებს აჩიკო სოლოღაშვილი?
მსახიობმა და ტელეწამყვანმა აჩიკო სოლოღაშვილმა გადაცემაში "დილა მშვიდობისა საქართველო" ის წლები გაიხსენა, როცა სახლიდან წამოვიდა. გადაცემაში ფსიქოლოგთან ერთად, საუბარი შეეხებოდა დამოუკიდებელ ცხოვრებას და როგორც აჩიკომ თქვა, თავად ეს გზა 19 წლისამ დაიწყო.
იხსენებს, რომ ამას ოჯახის მხრიდან გარკვეული დაძაბულობაც მოჰყვა, თუმცა მოგვიანებით ფაქტს შეეგუვნენ.
"პატარა ვიყავი, როდესაც წავედი სახლიდან. დავიწყე სამსახური და ჩემს თავს მივეცი ამის უფლება. 19 წლის ვიყავი. იყო მსუბუქი, მაგრამ მუქარა; იყო თბილი საუბარი, "იქნებ არ გინდა დედიკო, ვინ გაგირეცხავს, ვინ გაჭმევს, ვინ გასმევს"…
იმდენმა ტკივილმა მოიყარა თავი, რომ ჩემს თავს ვეკითხებოდი, ღირდა თუ არა ამის გაკეთება. მერე მივხვდი, რომ მე ძალიან მინდოდა და მათი ტკივილები მეორეხარისხოვანი იყო, ვიდრე ჩემი ლტოლვა დამოუკიდებლობისადმი. მერე იყო დღეში რამდენიმე ზარი, მესიჯი. რა ქენი, ჭამეო?
თითქოს ამან უფრო მეტი გაღიზიანება და მზრუნველობა გამოიწვია. მანამდე თითქოს ასე არ იყო. სახლში როცა ვიყავი, შეიძლებოდა არ დაერეკათ და არ ეკითხათ, ვჭამე თუ არა. სახლიდან გავედი, თუ არადა დაიწყო, ვაი და იქნებ მშიარია, იქნებ ცუდადაა. არ მინდოდა, ჩემი ოჯახისთვის მეტი ტკივილი მიმეყენებინა. გარკვეული ეტაპის მერე მიიღეს ეს მოცემულობა… შეეგუვნენ" - ამბობს სოლოღაშვილი.
წაიკითხეთ ასევე: