"სროლის მომენტში გამოცდაზე ვიყავი, სხვა შენობაში... მკვლელი ისტორიის ფაკულტეტზე სწავლობდა, არავინ იცის თავდასხმის მოტივი" - რას ჰყვება ქართველი სტუდენტი პრაღიდან?
ჩეხეთში 23 დეკემბერი გლოვის დღედ გამოცხადდა, შუადღისას ქვეყნის მასშტაბით ზარები დაირეკება და დაღუპულთა ხსოვნას წუთიერი დუმილით პატივს მიაგებენ. გუშინ მსოფლიო უდიდესი დანაშაულის მოწმე გახდა.
24 წლის ჩეხმა სტუდენტმა ხუთშაბათს ცეცხლსასროლი იარაღით საკუთარი მამა მოკლა, შემდეგ კი პრაღის უნივერსიტეტში სროლა მოაწყო. ჯამში, 15 ადამიანია დაღუპული, მათ შორის 14 უშუალოდ უნივერსიტეტში. ამავე დროს დაშავდა 25 პირი. დაღუპულია თავად თავდამსხმელიც.
ადგილობრივი პოლიციის ცნობით, თავდამსხმელი ნასამართლევი არ ყოფილა და ის მარტო მოქმედებდა. შინაგან საქმეთა მინისტრმა, ვიტ რაკუსანმა განაცხადა, რომ სროლას საერთაშორისო ტერორიზმთან არანაირი კავშირი არ აქვს.
საქართველოს საელჩომ ჩეხეთში განცხადება მალევე გაავრცელა, სადაც ნათქვამი იყო, რომ დაღუპულებსა და დაშავებულებს შორის საქართველოს მოქალაქეები არ არიან.
"ქალაქ პრაღაში, კარლის უნივერსიტეტში განვითარებულ მოვლენებთან დაკავშირებით, საგანგებოდ, 24-საათიან რეჟიმში ამოქმედდა საქართველოს საელჩოს ცხელი ხაზი: +420 777 222 053, საჭიროების შემთხვევაში, გთხოვთ, დაგვიკავშირდეთ აღნიშნულ ნომერზე" - ნათქვამია განცხადებაში.
კარლის უნივერსიტეტი 1347 წელს დაარსდა - იგი ევროპაში ერთ-ერთ უძველეს უნივერსიტეტადაა მიჩნეული. იქ სწავლობენ როგორც ჩეხი, ასევე სხვადასხვა ქვეყნებიდან ჩასული სტუდენტები. მათ შორის არის ქართველი ანანო მუშკუდიანი, რომელიც პრაღიდან AMBEBI.GE-ს ესაუბრა:
"სროლის მომენტში გამოცდაზე ვიყავი, სხვა შენობაში. სახლში მისულმა ვნახე ეს ამბავი. ერთმანეთს ეძებდნენ ჩემი კურსელები, ერთი ჩვენი კურსელი არ ჩანდა და ცოტა შეგვეშინდა თავიდან, თუმცა გამოჩნდა მალევე. პანიკაა, რა თქმა უნდა, იმიტომ, რომ არავინ იცის მოტივი რა იყო თავდამსხმელის და შეიძლება თუ არა, განმეორდეს საშინელება ისევ.
მე დღეს მოვფრინავ საქართველოში, ისედაც ასე მქონდა ბილეთი ნაყიდი. უნივერსიტეტმა ყველა ლექცია გააუქმა. როგორც ვიცი, გარდაცვლილთა უმეტესობა სტუდენტია, რაც შეეხება მკვლელს, ამავე უნივერსიტეტში სწავლობდა, ისტორიის ფაკულტეტზე. უნდა ვთქვა, რომ ეს ადგილი (კარლის უნივერსიტეტი) ყველაზე აქტიური ტურისტული ადგილია, ჩარლის ხიდთან ახლოს არის. მე შედარებით გარეუბანში ვცხოვრობ, აქაც ყველგან პოლიცია დგას", - გვიყვება მუშკუდიანი პრაღიდან.
წაიკითხეთ ასევე: