ეროვნული ნაკრების გამარჯვება - რატომ დასწყდა გული თემურ ქეცბაიას, ვინ გახდა მატჩის საუკეთესო ფეხბურთელი და რა ხდებოდა გასახდელში მატჩის შემდეგ (ვიდეო)

ევროპის ჩემპიონატის საკვალიფიკაციო ეტაპზე, A ჯგუფში, საქართველოს ნაკრებმა გასვლაზე კვიპროსი 2:1 დაამარცხა.

მატჩის 31-ე წუთზე გიორგი მიქაუტაძემ კვიპროსელი ნახევარმცველის გოგიჩის შეცდომით ისარგებლა და საქართველოს ნაკრები დააწინაურა. 35-ე წუთზე ლუკა ლოჩოშვილთან ბურთზე ბრძოლაში საჯარიმოში მოწინააღმდეგის თავდამსხმელი ანტონიუ წაიქცა, პენალტი დაინიშნა და 11-მეტრიანი პიტასმა გამოიყენა. პირველი ტაიმი ფრედ, 1-1 დასრულდა.

მატჩის საბოლოო ანგარიში კი შეცვალზე შემოსულმა ზურიკო დავითაშვილმა დააფიქსირა. მან 84-ე წუთზე გაიტანა. მატჩის საუკეთესო ფეხბურთელი WhoScored-ის მიხედვით ხვიჩა კვარაცხელია გახდა. მას 10 შესაძლებელიდან მას 9.01 ქულა მიანიჭეს.

ასე იზეიმეს ბიჭებმა გამარჯვება:

ზურიკო დავითაშვილი გულშემატკივარს მოუწოდებს, შოტლანდიასთანაც უქომაგონ:

• რა თქვა ვილი სანიოლმა მატჩის შემდეგ?

"ჩვენ ძალიან ახალგაზრდული გუნდი გვყავს, უმეტესობას ჯერ კიდევ სასწავლი აქვს მაღალ დონეზე თამაში. გამარჯვებით ძალიან კმაყოფილი ვართ - თამაშით არა. ცხადია, ვილაპარაკებთ, გავაანალიზებთ ამ მატჩს, გავარჩევთ დადებით და უარყოფით მომენტებს. არ დაგვავიწყდეს, რომ ეს საკვალიფიკაციო ეტაპია და აქ ქულებს აქვს გადამწყვეტი მნიშვნელობა.

როცა შეცვლას აკეთებ, იმედი გაქვს, რომ სასიკეთოდ შეიცვლება თამაშის მიმდინარეობა. შეცვლაზე შესული მოთამაშეები კარგად ჩაერთნენ თამაშში და არა მხოლოდ ანგარიშზე მოახდინეს დადებითი გავლენა, ისიც გამოჩნდა, რომ გუნდში ჯანსაღი გარემოა.

თქვენ მკითხეთ დავაგვიანე თუ არა ცვლილებები. ყოველთვის შეიძლება ამაზე ლაპარაკი. არ დავმალავ, მე-60 წუთიდან უკვე ვფიქრობდით რამდენიმე მოთამაშის შეცვლაზე, მაგრამ პოზიტიური ცვლილებები დავინახეთ და გადავწყვიტეთ, ცოტა დრო კიდევ მიგვეცა მოედანზე მყოფი მოთამაშეებისთის. სწორი გადაწვეტილებების მიღება მნიშვნელოვანია სწორ დროს. და კარგია, რომ გაამართლა".

• რა თქვა კვიპროსის ნაკრების მთავარმა მწვრთნელმა თემურ ქეცბაიამ?

"მგონი კარგი, საინტერესო მატჩი იყო ორივე გუნდის მხრიდან. მომენტებიც საკმაოდ შეიქმნა. ვფიქრობ, ფრე კარგი შედეგი იქნებოდა ორივე გუნდისთვის. არ ვიმსახურებდით წაგებას, მაგრამ კარგად გამოჩნდა, რომ სათადარიგო მოთამაშეებმა გადაწყვიტეს მატჩის ბედი. წაგებული თამაშით კმაყოფილი როგორ ვიქნები, მაგრამ მეტს ვერაფერს მოვთხოვდი ჩემს ფეხბურთელებს! 5-6 ფეხბურთელი გვაკლდა, ამხელა დანაკლსისის ანაზღაურება კი, ჩვენისთანა პატარა გუნდისთვის ძალიან რთულია. საწყენია, რომ ბიჭებმა ყველაფერი გააკეთეს დადებითი შედეგის მისაღწევად და საბოლოოდ, ქულაც ვერ ავიღეთ...

ცხადია, თვალს ვადევნებ ქართველ მოთამაშეებს და ვიცი, რა პოტენციალი აქვთ. ვიცი და მიხარია, რომ დიდი ხნის შემდეგ, გამოჩნდა ძალიან კარგი თაობა, რომელსაც დიდი მომავალი აქვს. იმის გარდა, რომ კვიპროსელებმა პირადად ნახეს მსოფლიო დონის მოთამაშე... გული მწყდება, რომ ბევრი კვიპროსელი სახლში დარჩა, რომ საქართველოდან მეტი ქომაგი ჩამოვიდა, ვიდრე აქაურები. ეს ნიშნავს, რომ აქ ფეხბურთი არ აინტერესებთ... იმედია, შეიცვლება ეს მიდგომა.

რაც შეეხება შეცვლებს, დიახ, ამან იქონია გავლენა თამაშზე. მნიშვნელოვანია, სკამზეც გყავდეს მაღალი დონის მოთამაშეები და საბოლოოდ, სწორედ მათ გადაწყვიტეს მატჩის ბედი".

• ცნობისთვის, შემდეგ შეხვედრას ჩვენი გუნდი 20 ივნისს გლაზგოში ჯგუფის ლიდერ შოტლანდიასთან ჩაატარებს.

ნახეთ ასევე: კვარაცხელია საუკეთესო იყო და აი, რატომ - ანალიტიკური პორტალების შეფასებები