"ექიმი გამოვიდა და გვითხრა, - უიმე, ჩუტყვავილა აქვს, აქ როგორ უნდა მივიღოო" - რას ჰყვება გორში გარდაცვლილი 4 წლის ბიჭუნას ბებია?
გორში, სავარაუდოდ, ჩუტყვავილას გართულების შედეგად გარდაცვლილი ბავშვის ოჯახის წევრები აღნიშნავენ, რომ ადგილობრივმა ექიმებმა ბავშვს სათანადო დახმარება არ გაუწიეს.
როგორც გარდაცვლილი ბავშვის ბებიამ განაცხადა, როდესაც ექიმმა ბავშვი დაინახა თქვა: "უიმე, ჩუტყვავილა აქვს, აქ როგორ უნდა მივიღოო“. მისივე თქმით, ექიმმა ბავშვს ადგილზე პირველადი დახმარება არ გაუწია.
"თბილისში უნდა წაგვეყვანა, ძალიან ცუდად რომ იყო. ექიმი გამოვიდა და გვითხრა, - უიმე ჩუტყვავილა აქვს, აქ როგორ უნდა მივიღოო. ვეუბნებოდი ექიმს, რომ ჩქარა, ცუდად არის, გადასხმა გაუკეთეთ ან სხვა რამე-მეთქი, მაგრამ მოიცადე ჯერ ისტორია უნდა შევავსოთო. რა დროს ისტორიაა, ბავში კვდება-მეთქი. ბავშვს მოვკიდეთ ხელი, მაგრამ ერთი არ უთქვამს მოიცადე და აქ გავუკეთებ პირველად დახმარებასო... პირდაპირ გამოვიტაცეთ ბავშვი და წამოვედით. საავადმყოფოსთან ახლოს ვიყავით, მაგრამ ბავშვმა გონება დაკარგა... თბილისში რომ მივდიოდით, დავრეკეთ, - სასწრაფო დაგვახვედრეთ, ბავში ცუდად არის-თქო. პატრულს ვთხოვეთ, რომ საავადმყოფომდე მივეყვანეთ... გადმოვიდა პატრული, დაავლო ბავშვს ხელი, თავის მანქანაში ჩაისვა, საავადმყოფოში კარი ეგრევე შეანგრია , შეიყვანა ბავშვი, მაგრამ გული უკვე გაჩერებული ჰქონდა", - ყვებაგარდაცვლილი ბავშვის ბებია ჟურნალისტებთან.
ცნობისთვის, გუშინ, გორში, 4 წლის ბავშვი, სავარაუდოდ, ჩუტყვავილას გართულების შედეგად გარდაიცვალა. გარდაცვლილი ბავშვის ახლობლების თქმით, 4 წლის თომა წიქარიძეს ექიმის მიერ ინფექციის არასწორი მართვის გამო, სეფსისი განუვითარდა, რაც გარდაცვალების მიზეზი გახდა. რაც შეეხება კლინიკას, "გორმედის" პრესსამსახურის ინფორმაციით, ბავშვი მშობლებმა ამბულატორიულად მიიყვანეს კონსულტაციაზე, თუმცა, შემდგომ სტაციონარულ მკურნალობაზე უარი განაცხადეს და თვითნებურად წაიყვანეს სამედიცინო დაწესებულებიდან.
იხილეთ ასევე: