"შემიძლია ვთქვა, რომ ფაქტობრივად, დავითმა მამშობიარა... შვილს ესპანური სახელი დავარქვით" - ნათია თოდუა დედა გახდა: მშობლების პირველი ემოციები გერმანიიდან
5 მარტს "გერმანიის ხმის" გამარჯვებული მომღერალი ნათია თოდუა დედა გახდა. როგორც ცნობილია, ის უკვე წლებია, გერმანიაში ცხოვრობს და წარმატებულად მოღვაწეობს. გასულ შემოდგომას მან ქორწილი საქართველოში გადაიხადა. მისი მეუღლე დავით ზურაბაშვილია. პირველი შვილი ნათიამ გერმანიაში გააჩინა. ამის შესახებ მომღერლის მეუღლის ფეისბუქ-პოსტიდან შევიტყვეთ.
"კეთილი იყოს შენი მობრძანება ცხოვრებაში, პატარავ! უუჰ, ეს რა იყოო, გერმანიაში მშობიარობა არის სიგიჟე!!! მშობიარობას ვინც დასწრებია, respect! ყველა დედა გმირია!!! ნათია თოდუა, გილოცავ, ჩემპიონო!“ - დაწერა დავითმა.
აღსანიშნავია, რომ ის მეუღლის მშობიარობას დაესწრო... AMBEBI.GE ახალბედა მშობლებს ნათია თოდუას და დავით ზურაბაშვილს ბერლინში დაუკავშირდა.
"კი, ისევ გავიმეორებ, ყველა ქალი გმირია, ქალის, დედის სიძლიერე არის განუზომელი და ყველა დედას მადლობა! ნათიას კი განსაკუთრებული მადლობა, ბედნიერება მაჩუქა და გაამრავლა ჩვენი ოჯახი“ - ამბობს დავითი.
- მგონი, მამაკაციც, რომელიც მეუღლის მშობიარობას ესწრება, პატივისცემას იმსახურებს. ის ხომ თვითმხილველი და თანაზიარი ხდება იმ პროცესის, რასაც მშობიარობა ჰქვია...
ნათია:
- მიუხედავად იმისა, რომ ქალისთვის ასეთ რთულ დროს მეუღლის გვერდით ყოფნა დიდი მხარდაჭერაა, დავითს არაერთმა მეგობარმა უთხრა, რომ ფსიქოლოგიურად მაინც რთული იქნებოდა ამ ყველაფრის ხილვა, გადატანა და დაძლევა...
საქართველოში ჩემი დის მშობიარობას დავესწარი. ბლოკი სავსე იყო მედპერსონალით, დამხმარეებით, მე კი ჩემი დის ხელი მეჭირა. ნათესავები სამშობიაროსთან იყვნენ შეკრებილები. საქართველოში ბავშვის გაჩენა ხომ ასე ხდება და ამისთვის მშობიარე და მისი ოჯახიც საგანგებოდ ემზადება.
რაც შეეხება გერმანიას, აქ მხოლოდ ბებიაქალია, რომელიც მშობიარეს ეხმარება. სრულიად სხვა სისტემაა. თუმცა საქართველოში ის იმდენი ხალხი, სამედიცინო პერსონალი, ვინც ბლოკში მუშაობს, ყველანი თავისი სითბოთი და პროფესიონალიზმით ქალს გვერდში უდგანან, რაც ძალიან დასაფასებელია.
ასევე ვფიქრობ, რომ აქაური წესიც, მისაღები და სწორია. ზედმეტი ადამიანის ჩარევის გარეშე, დედამ ბუნებრივად უნდა შეიგრძნო ეს ყველაფერი და ბავშვიც მაქსიმალურად ბუნებრივი გზით გაჩნდეს. ამ პირობებში გვერდით დავითი რომ არ მყოლოდა, ფსიქოლოგიურად და ფიზიკურად არც ვიცი, იმ ყველაფერს როგორ გადავიტანდი... შემიძლია, ვთქვა, რომ, ფაქტობრივად, დავითმა მამშობიარა...
დავითი:
- ასეთ საკითხებში ძალიან ფრთხილი ვარ. არ მიყვარს მსგავს პროცესებში მონაწილეობა, მაგრამ ამ შემთხვევაში ჩავერთე კი არა, პირდაპირ პროცესის მონაწილე გავხდი. მხოლოდ მე და ბებიაქალი ვიყავით. იმდენ რამეში ვიყავი ჩართული, იმაზეც კი ვერ ვფიქრობდი, თუ რაიმეს ვერ შევძლებდი. ვამბობდი, ყველაფერი რომ დასრულდება, დიპლომიც მომეცით-თქო. თუმცა თავიდან ბებიაქალს ვუთხარი, ნათიას თავთან დავდგები და ჩემთვის ვიქნები-მეთქი. ეგრე არ გამოვაო. მოკლედ, ამ ყველაფრის წინაშე ისე დაგვაყენეს, რომ თითქოს წელიწადში ერთხელ ვმონაწილეობდე მშობიარობაში... მერე ინსტინქტიც ჩამერთო, რომ იქ უნდა ვყოფილიყავი. ისე, ეს ყველამ უნდა შეძლოს, აუცილებელია... მიხარია, რომ ყველაფერმა კარგად ჩაიარა.
ნათია:
- სამშობიარო ბლოკიც რომ წარმოიდგინოთ, ეს არ არის ჩვეულებრივი სამშობიარო ბლოკი. ჩვეულებრივი სივრცეა, რომელიც სახლის ოთახს ჰგავს, სადაც თავს როგორც შინ, ისე გრძნობ, არის სამზარეულოც. არადა, სამშობიარო ბლოკს ველოდებოდი, ისეთს, როგორიც საქართველოში მინახავს. სხვათა შორის, გვკითხეს, სახლში მშობიარობა ხომ არ გინდათო? - ასეთი მომსახურებაც აქვთ... ჭიპლარის გადაჭრას ქალის მეუღლეს, პარტნიორს ანდობენ. დავითმა ეს რომ გაიგო, თქვა - რას ამბობთ, რამე არასწორად არ გავაკეთოო... მაგრამ მან ესეც შეძლო...
დავითი:
- მოკლედ, ასე დავსპეცდი... პროცესი მთელი ღამე მიდიოდა, 12 საათის განმავლობაში და ჩვენი პატარა - ჰუგო ზურაბაშვილი 5 მარტს 11 საათსა და 14 წუთზე დაიბადა. არის 3 და 540 კგ, სიგრძე - 54 სმ. ის არის ჩვენი სიყვარულის ლამაზი საჩუქარი, რომელიც სასახელო ადამიანი გაიზრდება.
- ვისი სახელი დაარქვით?
- ესპანეთში მოგზაურობიდან რომ დავბრუნდით, მაშინ გავიგეთ, რომ ნათია ორსულად იყო და გადავწყვიტეთ, შვილისთვის ესპანური სახელი შეგვერჩია. ბევრი ვეძებეთ და ბოლოს ამაზე შევჯერდით. ორივეს მოგვწონს. ჯერ კიდევ მუცელში მყოფს ვუძახდით ასე.
- ვის ჰგავს პატარა?
ნათია:
- ბავშვი ქერა და ცისფერთვალებაა... ვინც ნახა, ზოგის აზრით, დედას ჰგავს, ზოგის აზრით - მამას...
- შვილის გაზრდაში ვინ დაგეხმარებათ?
- ჩვენთან ხომ ასეა, ბავშვის გაზრდაში ბებია-ბაბუები მონაწილეობენ და ამის გამო ისინი მშობლებზე არანაკლები პატივისცემის ღირსები არიან... გერმანიაში სხვანაირად არის, ყველაფერზე პასუხისმგებლები მხოლოდ მშობლები არიან. ის მომენტი, რომ მოვალ და დაგეხმარები, ასეთი რამ აქ არ ხდება. ამიტომ ბებიაქალის ოფიციალური პროფესია არსებობს, რომელიც სანამ ბავშვი და დედა რაღაც ეტაპს არ მიაღწევს, მათ ყოველდღე აკითხავს. ასწავლის როგორ ჩააცვას, აბანაოს, მოუაროს და იმას, როგორ გახდეს კარგი მშობელი.
ამჟამად ჩვენთან ჰუგოსთან შესახვედრად სპეციალურად დავითის დედიკო ჩამოვიდა, რომელიც დარწმუნებული ვარ, დიდ გამოცდილებას გაგვიზიარებს.
- ნათია, ბოლომდე სცენაზე მუშაობდი, ხომ?
- ბოლო კვირას უკვე ახალი ალბომისთვის სიმღერებს ვიდეოქოლით ვწერდი... ახლა მაქვს ყველაზე მნიშვნელოვანი პერიოდი, რომელიც ბავშვთან ერთად მაქსიმალურად უნდა შევიგრძნო და ამ ემოციებით ვისიამოვნო. ზაფხულში კი კონცერტებზე გამოსვლას ისევ დავიწყებ ახალი პროექტით, რომელიც მალე მომზადდება და ჩვენი ჰუგოც ჩვენთან ერთად „ბექსთეიჯში“ იქნება. იმედი მაქვს, მასთან ერთად სცენაზეც გავალ...
ზაფხულამდე მე და ჩემს ბენდს რეპეტიციები გვექნება. უკვე ვიცით ფესტივალები, რომელშიც მონაწილეობას მივიღებთ და ამისთვის დიდი მომზადებაა საჭირო. მეც დამჭირდება ფორმაში მოსვლა როგორც ფიზიკურად, ისე - ვოკალურად... დავითიც მაქსიმალურად გვერდში მიდგას. მჯერა, რომ ეს ყველაფერი ისევე საინტერესო და სასიამოვნო იქნება, როგორც აქამდე იყო და მგონია, უფრო ინტენსიურიც.