"შენობის პიკეტირება მოაწყვეს, უსაფრთხოების მიზნით შეხვედრის გაუქმება მოგვიწია... " - ყვარელში ჩასულ ლევან ბერძენიშვილს საჯარო ლექციის ჩატარების საშუალება არ მისცეს
"რესპუბლიკური" პარტიის დამფუძნებელ, ფილოლოგ ლევან ბერძენიშვილზე კახელების ნაწილი ისევ სასტიკად გაბრაზებულია. მას დღეს "ყვარლის ევროკლუბში" ყვარელელი ახალგაზრდებისთვის საჯარო ლექცია უნდა ჩაეტარებინა თემაზე "ილია ჩვენი ვროპელი მამა", თუმცა ამის საშუალება არ მიეცა.
როგორც ცენტრის დამფუძნებელი ნიკა გურინი წერს, ხალხმა შენობის შესასვლლის პიკეტირება მოაწყო, რის გამოც შეხვედრის ორგანზატორები იძულებული გახდნენ, ლექცია გაეუქმებინათ.
"ყვარელში ლევან ბერძენიშვილი გვყავდა მოწვეული ლექციის ჩასატარებლად, ევრო-ატლანტიკურ ცენტრში. პიკეტირება მოგვიწყეს ჩამოყვანილებმა სხვადასხვა რაიონებიდან, რის გამოც უსაფრთხოების მიზნით შეხვედრის გაუქმება მოგვიწია. შენობაში ბევრი ბავშვი ელოდა შეხვედრას. ბატონი ლევანი ჩვენს სივრცემდე ფიზიკურად ვერ მოვიყვანეთ, რადგან ჩაკეტილი ჰქონდათ ყველა შემოსასვლელი. აი, აქამდე მივედით ამ ქვეყანაში." - წერს გურინი.
შეგახსენებთ, რომ კახელების ნაწილის გულისწყრომა ლევან ბერძენიშვილის მიერ მეფე ერეკლე მეორესთან დაკავშირებით გამოთქმულმა მოსაზრებამ გამოიწვია.
"ვიდრე ერეკლე მეორე მოღალატედ არ არის გამოცხადებული, ღარიბაშვილი გამოვა და იკითხავს, - ომი გინდათო? ერეკლე მეორემაც ეგ თქვა, - აბა, ომი გინდათო?.." - თქვა ბერძენიშვილმა გასულ წელს.
ამის შემდეგ, ბერძენიშვილის წინააღმდეგ თელავში საპროტესტო აქციაც კი გაიმართა. სამოქალაქო საზოგადოება, ცნობილი სახეები, მსახიობები და საჯარო მოხელეები შეიკრიბნენ და ბერძენიშვილს "ენის დამოკლებისკენ" მოუწოდეს.
მოგვიანებით, თელაველების ნაწილმა მათ ქალაქში საჯარო ლექციის ჩასატარებლად ჩასული ლაშა ბუღაძე და ბუკა პეტრიაშვილი მუზეუმის შენობაში არ შეუშვეს. ბუღაძემ მაშინ განაცხადა, რომ საკრებულოს წევრები მათგან ლევან ბერძენიშვილის "დაგმობას" მოითხოვდნენ.
ასევე იხილეთ: