"რუსთავი 2"-ის ინფორმაციით, ვანო მერაბიშვილს ფიზიკურად "უცნობის" სიძე გაუსწორდა - რას ამბობს გიგიშა შარაშიძე: "გამოძიებას არ ვემალები"
"რუსთავი2-ის" ინფორმაციით, შინაგან საქმეთა ყოფილ მინისტრს ვანო მერაბიშვილს ვაკეში ფიზიკურად გია გაჩეჩილაძის (უცნობი) სიძე, გიგიშა შარაშიძე გაუსწორდა. შემთხვევა ორ იანვარს, ვაკეში მდებარე ერთ-ერთ აფთიაქში მოხდა.
ტელეკომპანიასთან საუბარში მომხდარს ადასტურებს შარაშიძეც.
"დაპირისპირება მოხდა ჩემს და ვანო მერაბიშვილს შორის აფთიაქში. დაპირისპირებასაც ვერ დავარქმევ, რადგან პირველივე წამებიდან გაიქცა ვანო მერაბიშვილი. იქიდან გამომდინარე რომ საზოგადოების დიდი ინტერესია, მე ჩავთვალე თავი ვალდებულად. არც გამოძიებას ვემალები და არც პასუხისმგებლობას გავურბივარ. თუ საჭირო გახდა, დანარჩენზე პასუხს გავცემ სამართალდამცველ ორგანოებს. დანარჩენი, თუ ცოტა მაინც ვაჟკაცობა შერჩენია, თვითონ თქვას," - განაცხადა გიგიშა შარაშიძემ "რუსთავი 2"-თან საუბრისას.
ცნობისთვის, ექსმინისტრის ცემის შესახებ ინფორმაცია გუშინ ვატო შაქარიშვილმა გაავრცელა. მისივე ინფორმაციით, მომხდარის შესახებ ყოფილ მაღალჩინოსანს პოლიციაში არ განუცხადებია.
გიგიშა შარაშიძე საზოგადოების ყურადღების ცენტრში 2017 წელსაც მოექცა, როდესაც გია გაჩეჩილაძე მაშინდელ პრემიერ-მინისტრს გიორგი კვირიკაშვილს დაუპირისპირდა. დაპირისპირების მიზეზი, კი მისი სიძე გახლდათ.
გიგიშა შარაშიძე, სიტროენ ჯორჯიას დირექტორი იყო. სიძე-სიმამრი აცხადებდნენ, რომ სახელმწიფო შესყიდვები არასწორად ტარდებოდა და ამის დამამტკიცებელი დოკუმენტაციაც ჰქონდათ.
მაშინ შარაშიძემ ე.წ. კარტელურ გარიგებებზე დოკუმენტაცია კანცელარიაში მიიტანა, საღამოს კი, უცნობი ტელევიზიით გამოვიდა და საზოგადოებას, პრემიერისთვის გაგზავნილი მესიჯები სახალხოდ წაუკითხა.
გიგიშა წლებია რაც უცნობის ერთადერთი ქალიშვილის, ირინა გაჩეჩილაძის მეუღლეა. წყვილს ერთი საერთო შვილი, ვაჟი ჰყავთ.