ლეგენდარული ნონა გაფრინდაშვილი სენიორ მოჭადრაკეთა მსოფლიოს ჩემპიონატის გამარჯვებული მერვედ გახდა - ნახეთ, რა შედეგით დაასრულეს ასპარეზობა სხვა ქართველმა მოჭადრაკეებმა?

ლეგენდარული ქართველი მოჭადრაკე ნონა გაფრინდაშვილი იტალიის ქალაქ ასისში გამართულ სენიორ მოჭადრაკეთა მსოფლიოს ჩემპიონატის გმარჯვებული გახდა.

81 წლის ასაკში გაფრინდაშვილმა +65 წლის ასაკის ქალ მოჭადრაკეთა შორის გაიმარჯვა. მან 11 შეხვედრაში 7 ქულა მოიპოვა და პირველობა არავის დაუთმო, ბოლო პარტია კი ფრანგ ჟან-ლუკ როოსთან ყაიმით დაასრულა.

"ჭადრაკის სამყაროს ლეგენდამ, მერვედ მოიპოვა მსოფლიო ჩემპიონის ტიტული სენიორ (+65) მოჭადრაკეთა შორის!

აღსანიშნავია, რომ ჩვენი ლეგენდა ასევე თერთმეტი საჭადრაკო ოლიმპიადის გამარჯვებული და ხუთგზის მსოფლიო ჩემპიონია კლასიკურ ჭადრაკში“, - ნათქვამია საქართველოს ჭადრაკის ფედერაციის მიერ გავრცელებულ ინფორმაციაში.

გაფრინდაშვილის გარდა, +50 წლის ასაკის მოჭადრაკეთა შორის ჩემპიონი კიდევ ერთი ქართველი, ზურაბ სტურუა გახდა, რომელმაც ასპარეზობა პირველ ადგილზე 8.5 ქულით დაასრულა.

ამავე ასაკობრივ ზღვარში მეორე ადგილი დაიკავა სოფიკო ტერელაძემ, რომელმაც 7.5 ქულა დააგროვა და იგივე შედეგი ჰქონდა ბრაზილიელი დარსი ლიმასს, მაგრამ დამატებითი მაჩვენებლებით ჩემპიონი სამხრეთამერიკელი მოჭადრაკე გახდა.

აქვე გეტყვით, რომ ვეტერანთა მსოფლიოს ჩემპიონატი იტალიის ქალაქ ასისში გაიმართა.