"ჯარისკაცებო, შინ დედები გელოდებიან... უკან დაიხიე, რუსეთო, უკან!" - რუსული ჯგუფის ახალი მუსიკალური კლიპი, რომელმაც პუტინის რეჟიმის მომხრეთა აღშფოთება გამოიწვია
"Россия, назад!" ("რუსეთო, უკან!") ასე ჰქვია რუსული ჯგუფის "Ногу Свело" -ს მიერ ჩაწერილ ახალ სიმღერასა და კლიპს, რომელიც 9 მაისს, რუსეთისთვის მნიშვნელოვან დღეს საკუთარ YouTube არხზე განათავსეს. სიმღერაში გამოყენებულია ცნობილი საფეხბურთო ჰიმნის "Ole-Ole", რომლის მელოდიაზეც ოკუპანტებს შინ დაბრუნებისკენ მოუწოდებენ.
ვიდეოში ნაჩვენებია რუსული სამხედრო ტექნიკისა და რუსი სამხედროების საპირისპირო მიმართულებით გადაადგილების კადრები.
"ოლე-ოლე-ოლე-ოლე, ჯარისკაცებო, შინ დედები გელოდებიან. ოლე-ოლე-ოლე-ოლე, უკან დაიხიე, რუსეთო, უკან!", მღერის ჯგუფის სოლისტი მაქს პოკროვსკი.
მუსიკალური ჯგუფის ლიდერი დიდი ხანია რაც შტატებში გადავიდა საცხოვრებლად, თუმცა ის ხშირად სტუმრობდა სამშობლოს საკონცერტო ტურნეების ფარგლებში. რუსული მედია წერს, - აღმოჩნდა, რომ პოკროვსკი სამშობლოს მხოლოდ ფულის საშოვნელად სტუმრობდაო. მორიგი პროვოკაციის შიშით, აპრილში ჯგუფს მოსკოვში კონცერტების სერიის გამართვის უფლება არ მისცეს.
რუსულ მედიაში ხელისუფლებას მოუწოდებენ, რომ ჯგუფის წევრებს რუსეთში გადაადგილების საშუალება აუკრძალონ, რადგან სიმღერა მთლიანად რუსოფობიურია და მსმენელის გაღიზიანებას იწვევს.
პოკროვსკის მხრიდან ეს პირველი პროვოკაცია არ ყოფილა. ხელოვანმა 2019 წელს განაცხადა, რომ ბოლო ასი წლის განმავლობაში "ექსპერიმენტები" ჩატარდა რუს ხალხზე. მომღერლის თქმით, ამ ექსპერიმენტებმა გავლენა მოახდინა ადამიანების გენეტიკურ დონეზე. ის მიიჩნევს, რომ რუსეთის ფედერაციაში ხელისუფლება უნდა შეიცვალოს და მხოლოდ მმართველი ელიტის წასვლა საშუალებას მისცემს რუსეთს, რომ "გამოჯანმრთელდეს".
"ხალხს ალკოჰოლიზმი, სიკვდილიანობა, სიღარიბე კლავს. რუსი ერი დეგრადირდება. ის კარგი და ძლიერია ერია, ამიტომ კლავენ მას, მაგრამ ის გადარჩება“, - ამბობდა პოკროვსკი.
იხილეთ ასევე: