ტყვეობიდან თავის დაღწევა 9 რუსი ჯარისკაცის სანაცვლოდ და ემოციური საუბარი ზელენსკისთან - მელიტოპოლის მერის გათავისუფლების ოპერაციის დეტალები
მელიტოპოლის მერი ივან ფიოდოროვი ტყვეობიდან გაათავისუფლეს და როგორც ცნობილია, მის ნაცვლად უკრაინელებმა რუსებს რუსი სამხედრო ტყვეები გადასცეს. ინფორმაციას უკრაინის სტრატეგიული კომუნიკაციებისა და საინფორმაციო უსაფრთხოების ცენტრი ავრცელებს.
მათივე ცნობით, ფიოდოროვი გაცვალეს ცხრა რუს ჯარისკაცზე, რომლებიც უკრაინელების ინფორმაციით, 2002-2003 წლებში დაბადებული სამხედრო მოსამსახურეები არიან.
- ფიოდოროვი დაკავების შემდეგ ლუგანსკში გადაიყვანეს, სადაც ხუთი დღე გაატარა. უკრაინის სტრატეგიული კომუნიკაციებისა და საინფორმაციო უსაფრთხოების ცენტრის ცნობით, მას, სავარაუდოდ, რუსეთთან თანამშრომლობა შესთავაზეს, რაზეც უარი განაცხადა.
მელიტოპოლის მერის გათავისუფლების შესახებ გუშინ გახდა ცნობილი. ამის შესახებ უკრაინის პრეზიდენტის ოფისის ხელმძღვანელმა კირილ ტიმოშენკომ სოციალურ ქსელში დაწერა.
"ახლახანს წარმატებით დასრულდა მელიტოპოლის მერის ივან ფიოდოროვის ტყვეობიდან გათავისუფლების ოპერაცია. ვანია უსაფრთხოდ არის", - წერდა ტიმოშენკო. მისი თქმით, ძალიან მალე ფიოდოროვი დაუბრუნდება მოვალეობის შესრულებას.
მოგვიანებით, უკრაინის პრეზიდენტის, ვოლოდიმირ ზელენსკის "ფეისბუქ" გვერდზე მისი და ფიოდოროვის სატელეფონო საუბრის ამსახველი ვიდეოჩანაწერი გამოაქვეყნეს.
"საღამო მშვიდობისა, ივან. მიხარია შენი ხმის გაგონება, ცოცხალი ადამიანის ხმა გაქვთ. ჩვენიანებს არ ვტოვებთ. ძალიან მიხარია, რომ უკან დაბრუნდი. ჯერჯერობით ვერ ხერხდება ყველას გათავისუფლება, რუსები ყველას ბლოკავენ“, - ამბობს ზელენსკი სატელეფონო საუბრისას.
მელიტოპოლის მერის თქმით კი, ის რაც შეიძლება მალე დაუბრუნდება ბრძოლას და ზელენსკის გუნდს, რომ რაც შეიძლება მალე დადგეს გამარჯვების დღე.
ცნობისთვის, 11 მარტს რუსმა სამხედროებმა მელიტოპოლის მერი ივან ფიოდოროვი გაიტაცეს. მის კაბინეტში 10-მდე პირი შეიჭრა, თავზე შავი პარკი ჩამოაცვეს და უცნობი მიმართულებით ავტომანქანით გაემართნენ.