"ინციდენტი შეშფოთებით მივიღეთ..." - რა წერია რუსეთის დიპლომატიურ ნოტაში, რომელიც საქართველოს საგარეო უწყებას გამოეგზავნა?

რუსეთი საქართველოს საგარეო საქმეთა სამინისტროს რუსეთის ყოფილ საელჩოსთან „ევროპული საქართველოს“ მიერ გამართულ აქციასთან დაკავშირებით დიპლომატიურ ნოტას უგზავნის. ამის შესახებ რუსეთის საგარეო საქმეთა სამინისტროს ინფორმაციისა და პრესის დეპარტამენტის დირექტორის მოადგილემ, ალექსეი ზაიცევმა განაცხადა.

"ინციდენტი შეშფოთებით მივიღეთ. 26 იანვარს ქართულმა ოპოზიციამ ანტირუსული პოლიტიკური აქცია გამართა, საქართველოში შვეიცარიის კონფედერაციის საელჩოს რუსეთის ფედერაციის ინტერესების სექციის შენობის სიახლოვეს. დაწყებამდე ცოტა ხნით ადრე, სექციაში ელექტროენერგიის ძირითადი და სარეზერვო ელექტრომომარაგების წყაროები გაითიშა“, - აღნიშნულია განცხადებაში.

ზაიცევმა აღნიშნა, რომ დიპლომატიური ნოტა საქართველოს საგარეო საქმეთა სამინისტროს გარდა, მოსკოვში შვეიცარიის კონფედერაციის საელჩოს საქართველოს ინტერესების განყოფილების ხელმძღვანელსაც გაეგზავნა.

"მომხდართან დაკავშირებით, ინტერესთა სექციამ საქართველოს საგარეო საქმეთა სამინისტროს გაუგზავნა ნოტა საქართველოს ხელისუფლების მხრიდან 1961 წლის 18 აპრილის დიპლომატიური ურთიერთობის შესახებ ვენის კონვენციის ზედმიწევნით შესრულების აუცილებლობაზე. მსგავსი გზავნილი გადასცა რუსეთის საგარეო საქმეთა სამინისტრომ მოსკოვში შვეიცარიის კონფედერაციის საელჩოს საქართველოს ინტერესების განყოფილების ხელმძღვანელს. განყოფილებაში ელექტრომომარაგება ამჟამად სრულად აღდგენილია. ვიმედოვნებთ, რომ საქართველოს ხელისუფლება მიიღებს ყველა შესაძლო ზომას მსგავსი ინციდენტების თავიდან ასაცილებლად", - განაცხადა ზაიცევმა.

ცნობისთვის, 26 იანვარს რუსეთის ყოფილ საელჩოსთან, „ევროპული საქართველოს“ ორგანიზებული უკრაინის მიმართ მხარდამჭერი აქცია სახელწოდებით „Слава Україні! ბოროტსა სძლია კეთილმან“ გაიმართა.