იგეგმება თუ არა დამატებითი შეზღუდვების შემოღება?
ჯანდაცვის მინისტრის ეკატერინე ტიკარაძის განცხადებით, საქართველოს ყველა რეგიონში რეგისტრაციის გარეშე აცრის პუნქტები ამოქმედდება. ამის შესახებ მან ჟურნალისტებს განუცხადა.
გარდა ამისა, ჯანდაცვის მინისტრმა ჟურნალისტებს კორონავირუსის გავრცელების პრევენციისთვის დამატებითი შეზღუდვების შემოღებასთან დაკავშირებით დასმულ კითხვაზეც უპასუხა და აღნიშნა, რომ მთავრობა, ამ ეტაპზე, დამატებითი შეზღუდვების შემოღებას არ გეგმავს.
"ჩვენი მოლოდინი არის, რომ სატრანსპორტო შეზღუდვები გამოიღებს საკმაოდ დადებით დინამიკას. ორი კვირის შემდეგ ჩვენი მოლოდინი არის ეპიდვითარების 80%-ით გაუმჯობესება", - განაცხადა ეკატერინე ტიკარაძემ.
მისივე თქმით, საკოორდინაციო საბჭოს მიერ სატრანსპორტო შეზღუდვაზე მიღებული გადაწყვეტილება დროული და სწორი იყო.
ტიკარაძემ ასევე საქალაქთაშორისო ტრანსპორტის შეზღუდვაზეც ისაუბრა და აღნიშნა, რომ ამ ეტაპზე ეს საკითხი საბჭოზე განხილული არ ყოფილა, თუმცა მისივე თქმით, საჭიროების შემთხვევაში ამ მოთხოვნასაც დააყენებენ.