"მისი მდგომარეობა სტაბილურად მძიმეა" - საქართველოს რაგბის ნაკრების მწვრთნელი სამხრეთ აფრიკის ერთ-ერთ კლინიკაში, მართვით სუნთქვაზე იმყოფება
გავრცელდა ინფორმაცია, რომ კორონავირუსით ინფიცირებულია საქართველოს მორაგბეთა ნაკრების მთავარი მწვრთნელი, ლევან მაისაშვილი, რომელიც იოჰანესბურგის ერთ-ერთ საავადმყოფოში გადაიყვანეს. მისი მდგომარეობა მძიმეა.
ეს ინფორმაცია გადავამოწმეთ ეროვნული ნაკრების პრესცენტრში, სადაც განგვიცხადეს:
"სამხრეთ აფრიკასთან თამაშის შემდგომ გუნდში გამოვლინდა რამდენიმე კოვიდშემთხვევა, მათ შორის დაინფიცირდა მთავარი მწვრთნელი ლევან მაისაშვილი, რომლის ამჟამინდელი ჯანმრთელობის მდგომარეობა არის სტაბილურად მძიმე, აღენიშნება ფილტვების დაზიანება, იგი გადაყვანილია ხელოვნურ მართვით სუნთქვაზე.
მისი მკურნალობის პროცესში ჩართულია როგორც ქართული, ისე სამხრეთ აფრიკის მხარე - საქართველოს რაგბის კავშირი და მისი სამედიცინო ჯგუფი, ადგილზე იმყოფება გუნდის ექიმი ნუცა შამათავა. ჩართულია საქართველოს ჯანდაცვის სამინისტრო, საქართველოს კონსული სამხრეთ აფრიკაში, სამხრეთ აფრიკაში მოღვაწე ქართველი ექიმი ვახტანგ რეხვიაშვილი. ყველაფერი კეთდება იმისთვის, რომ მომდევნო დღეებში მისი ჯანმრთელობის მდგომარეობა გაუმჯობესდეს. ლევან მაისაშვილი დღეს გადაიყვანეს სამხრეთ აფრიკის ერთ-ერთ მაღალი დონის კლინიკაში, რომელიც უახლესი სამედიცინო აღჭურვილობით მართავს კოვიდინფიცირებულ პაციენტებს. რაც შეეხება ეროვნული ნაკრების მოთამაშეებს, რომლებსაც ასევე დაუდასტურდათ კოვიდ 19, მათი მდგომარეობა არის დამაკმაყოფილებელი. სამი მოთამაშე რომელსაც აფრიკაშივე დაუდასტურდა ვირუსი, ხვალ ასრულებს მკურნალობას და გამოემგზავრება საქართველოში, ხოლო ისინი ვინც ჩამოვიდნენ და აქ აღმოაჩნდათ ვირუსი, უმეტესობა უკვე მორჩა მკურნალობის კურსს და არიან თვითიზოლაციაში".
შეგახსენებთ, 2 ივლისს, სამხრეთ აფრიკასთან გამართული მატჩის შემდეგ, ორივე გუნდის რიგებში კორონავირუსის რამდენიმე შემთხვევა დაფიქსირდა.
ავტორი: ლადო გოგოლაძე
საკეისრო კვეთის შემდეგ კოვიდინფიცირებული ქალი გარდაიცვალა - ის პირველ საუნივერსიტეტო კლინიკაში 1 თვის განმავლობაში მკურნალობდა
აბასთუმანში, ტყეში ხანძარია
