24
მარტიდღის ზოგადი ასტროლოგიური პროგნოზი
რამდენიმე დღის წინ, მოსკოვში, კინოთეატრში Garage Screen, ქართულ-ბრიტანული კინოსურათის "ბებია, ჩემი ერთადერთი სურვილით“ პრემიერა გაიმარათა, რომელიც რუსულ პრესაში საკმაოდ აქტიურად გაშუქდა. მაგალითად, რუსული ტელეარხის "დოჟდის“ («Дождь»)პროგრამა-შოუში «Здесь и сейчас»-ში, 5 ივნისს, საღამოს, გადაიცა სიუჟეტი ახალი ქართული მხატვრული ფილმის შესახებ. ფილმის საერთაშორისო პრემიერა როტერდამის ფესტივალზე შედგა, სადაც ბევრი პროფესიონალი სასიამოვნოდ გაკვირვებული დარჩა: კინოსურათის რეჟისორია რუსული წარმომავლობის მქონე, ამჟამად ლონდონში მცხოვრები მწერალი და მხატვარი ჟუჟა დობრაშკუსი. ეს ფილმი კი მისი, როგორც რეჟისორის, დებიუტს წარმოადგენს.
ტელეარხის ვებგვერდზე გამოქვეყნებულია პროგრამის ფრაგმენტის ტექსტი, სათაურით: "ბებია, სიკვდილი და მსხვერპლშეწირვა: მოსკოვში საოცარი ახალი ქართული ფილმი აჩვენეს“, რომელშიც ვკითხულობთ:
"დიდი ბრიტანეთის ხელშეწყობით გადაღებული ფილმი ერთგვარი არაკია, რომელიც ქართული კინემატოგრაფის ტრადიციებს აგრძელებს. ჩვენ მოწმენი ვხდებით ერთი პროვინციული ოჯახის ისტორიისა, სადაც ბებია კვდება - დიახ, ის ბებია, რომელიც თავისებური, მკაცრი ხასიათის მქონე ქალი იყო. იგი ისეთ ცხოვრებისეულ კვალს ტოვებს, რომელიც სააქაოს და საიქიოს ერთმანეთთან აკავშირებს, რათა ყველას ახსოვდეს: ვინ არიან, საიდან მოდიან, რისთვის ცოცხლობენ და ცხოვრობენ...
ფილმის ცენტრალური პერსონაჟი შვილიშვილი გოგონაა - არიადნა (საინტერესოა, რომ ბებიას ჰქვია მედეა), რომელსაც ბავშვობაში მკაცრი ბებიისა ძალიან ეშინოდა. ამჟამად იგი მოდელია, რომელიც ევროპიდან მშობლიურ ქართულ სოფელში ბრუნდება, გარდაცვლილი ბებიისათვის პატივის მისაგებად... ფილმში 21-ე საუკუნე უკანა პლანზე გადადის და ქალიშვილის მოქმედებით ძველი ტრადიციები ცოცხლდება... მას, როგორც ოჯახის ყველაზე უმცროს წევრს, დაავალებენ, რომ ბებიის სულის მოსახსენებელი წესი შეასრულოს - გაჭიმოს ძაფი საავადმყოფოდან სოფლის სასაფლაომდე, რათა ბებიის სული ცხედრის კვალს მიჰყვეს. ფილმის მთავარი გმირი ყოველნაირად ეწინააღმდეგება ამ, მისი აზრით, მოძველებულ ტრადიციას, მაგრამ ბებია მაინც კარნახობს შვილიშვილს იმ ქვეყნიდანაც კი, რომ მან დავალება შეასრულოს..."
ტელეარხის სტუდიაში თვითონ რეჟისორმა ჟუჟა დობრაშკუსმა ისაუბრა. მისი თქმით, იგი კარგად იცნობს სახელგანთქმული ქართული კინოს დიდებულ ტრადიციებს, მისი თქმით, საქართველო მითიური ადგილია, შეიძლება ერთდროულად დაინახო ადამიანის წარსული, აწმყო და მომავალი. სწორედ ამიტომ შეარჩია მან ეს ქვეყანა იმ ფილმის გადასაღებად, რომლის სცენარის ავტორიც თვითონ არის. რეჟისორი განმარტავს, რომ საიქიოსა და სააქაოს დამაკავშირების კადრები რეალურ სინამდვილეს ასახავს: "საქართველოს ერთ-ერთ კუთხეში, კერძოდ, სამგრელოში არის ტრადიცია, რომლის თანახმად, ადამიანის სული გარდაცვლილს აუცილებლად თან უნდა გაჰყვეს და ამაში მას გაჭიმული ძაფი ეხმარება..."
ფილმი შავ-თეთრია, გადაღებულია ქართულ ენაზე. ფილმში მთავარ როლს ანასტასია დავიდსონი ასრულებს, ერთ-ერთ როლს კი ანი ჩირაძე ასახიერებს.
მოამზადა სიმონ კილაძემ
ერთი ქეთი დოლიძეა საოცარი და მეორე ეს ფილმი
რა ხდება ნინო კირთაძეს მოპარეს სცენარი?