"როდესაც ქმარი სცემდა, ქალს ჩვილი ხელში ეჭირა... ბავშვმა გონება დაკარგა და გარდაიცვალა" - გურჯაანში მომხდარ ფაქტზე 36 წლის მამაკაცი დააკავეს
კახეთის პოლიციამ დააკავა მამაკაცი, რომელმაც მეუღლეს ფიზიკური შეურაცხყოფა მიაყენა, რა დროსაც 8 თვის ჩვილი გარდაიცვალა.
უწყება აღნიშნულთან დაკავშირებით განცხადებას ავრცელებს.
"შინაგან საქმეთა სამინისტროს კახეთის პოლიციის დეპარტამენტის თანამშრომლებმა, ოჯახში ძალადობის ფაქტზე, 1985 წელს დაბადებული ზ.შ. გურჯაანის მუნიციპალიტეტში დააკავეს.
გამოძიებით დადგინდა, რომ დაკავებულმა 1996 წელს დაბადებულ მეუღლეს ოჯახური კონფლიქტის დროს სიტყვიერი და ფიზიკური შეურაცხყოფა მიაყენა. აღნიშნული კონფლიქტის დროს ქალს ხელში ჰყავდა შვილი - 2020 წელს დაბადებული ბავშვი, რომელმაც გონება დაკარგა და გარდაიცვალა.
მცირეწლოვანი ბავშვის გარდაცვალების მიზეზის დადგენის მიზნით დანიშნულია შესაბამისი ექსპერტიზები.
მომხდარ ფაქტზე გამოძიება სისხლის სამართლის კოდექსის 126-ე პრიმა მუხლით მიმდინარეობს" - ნათქვამია განცხადებაში.