"ვერ გამოვრიცხავთ, რომ გახარიამ, ვიდრე გადააყენებდნენ, დაასწრო და გადადგა" -  რამდენად შესაძლებელია მე-3 პოლიტიკური ცენტრის ჩამოყალიბება გახარიას გარშემო მოხდეს?

18 თებერვალს, გიორგი გახარია პრემიერ-მინისტრის თანამდებობიდან გადადგა. როგორც გახარიამ განმარტა, მას გაუმართლებლად მიაჩნია ნიკა მელიას დაპატიმრება იმ პირობებში, როდესაც არსებობს პოლიტიკური ესკალაციის საფრთხე. გახარიას თქმით, გადადგომის მიზეზია ის, რომ აღნიშნულთან დაკავშირებით გუნდთან შეთანხმებას ვერ მიაღწია. ოპოზიცია კიდევ ერთხელ ალაპარაკდა ვადამდელი არჩევნების აუცილებლობაზე. ქვეყანაში პოლიტიკური კრიზისის განსამუხტად მნიშვნელოვანი ნაბიჯები იქნება გადასადგმელი. გახარიას გადადგომას აფასებს პოლიტოლოგი ვახტანგ ძაბირაძე:

- მედიაშიც და საზოგადოებაშიც ვრცელდებოდა ხმები იმის შესახებ, რომ "ქართულ ოცნებაში” არის დაპირისპირება და მიდის ბრძოლა ძალაუფლებისთვის. არ მაქვს არც პირდაპირი და არც კულუარული ინფორმაცია, რამდენად შეესაბამება ეს ჭორები სიმართლეს. ჩემი შეფასებებით ვფიქრობდი, ამ ეტაპზე არ ყოფილიყო დაპირისპირება ლიდერებს შორის და ყოველ შემთხვევაში, ამ ადგილობრივ არჩევნებს როგორც ერთიანი გუნდი, ისე ჩაატარებდნენ.

გახარიამ რა განცხადებაც გააკეთა, იმის მიხედვით ვერც იმას გამოვრიცხავ, რომ მან გამოიყენა შექმნილი ვითარება - თუ მან იცოდა, რომ მას გაშვებას უპირებდნენ (ისიც ცხადია ყველასთვის, რომ პარლამენტს არ აკონტროლებდა), ვიდრე გადააყენებდნენ, დაასწრო და თვითონ გადადგა ეს ნაბიჯი. ამ ვითარებაში მის მიერ გადადგმულმა ნაბიჯმა აბსოლუტურად შეცვალა პოლიტიკური ვითარება და გარემოება მთლიანად საქართველოში და მის გარეთაც.

დიდი ალბათობით, ვადამდელი არჩევნები ხდება ძალიან რეალური. ვნახოთ, როგორ გადაივლის ეს ტალღა და როგორ და რა პრინციპით ჩამოყალიბდება ახალი მთავრობა. ვთვლიდი, რომ მელიასთან დაკავშირებით გუნდი ერთიანი იყო. თუ არ იყო ერთიანი, მაშინ როდესაც პარლამენტში იდგა საკითხი მისი უფლებამოსილების შეწყვეტის შესახებ, ანუ პოლიტიკური საკითხი იდგა და არა - სამართლებრივი, მაშინ, ჩემი აზრით, იქვე უნდა დაესრულებინათ ეს თემა.

როგორც ჩანს, ისინი წავიდნენ გამწვავებაზე და გახარიამ ეს გამოიყენა, ან არ უნდოდა ამ ვითარებაში შეენარჩუნებინა პრემიერის სავარძელი, მით უმეტეს, ძალიან მძიმე ვითარება იქნება გაზაფხულზე. გახარია ერთ-ერთი წამყვანი ფიგურა იყო თავისი ქმედებებით, ხასიათით და ბევრი სხვა თვისებით. კობახიძემ თქვა, 2 კვირაში მოვამთავრებთ მთავრობის ფორმირებასო და საკონსტიტუციო ვადაც ასეთია.

ერთი რამ ცხადია, რომ ოპოზიციამ ეს რაუნდი პირწმინდად მოიგო და მისი განულებული რეიტინგი ისევ დაუბრუნდა პოლიტიკურ სარბიელს.

ამ ფონზე რას იზამს "ოცნება”, ძალიან მნიშვნელოვანია. იმედია, ასეთ შეცდომებს აღარ დაუშვებს. ქვეყანაში არც ახლაა ის მუხტი, რომ მოსახლეობა ქუჩაში გამოვიდეს, მაგრამ ეს მუხტი რომ არ არის, იმას არ ნიშნავს, ხვალ არ გაჩნდება.

ამასთანავე, ვიდრე გახარია გადადგებოდა, იმავე აშშ-ს საელჩოს, ევროკავშირის წარმომადგენლის კარლ ჰარცელის თუ სხვათა განცხადებებიდან შეიძლება ის დასკვნა გაკეთდეს, რომ ხელისუფლებამ არ შეიწუხა თავი ან ვერ შეძლო პარტნიორებთან ეს თემა განეხილა და ამ ვითარებაში პარტნიორების მხარდაჭერა მოეპოვებინა.

გირაოს შეფარდების შეცვლა სამართლებრივი პროცესია, მაგრამ როგორც კი ეს პროცესი სრულდება და მელია აგყავს პატიმრობაში, იმავე წუთას ირთვება პოლიტიკური პროცესი იმიტომ, რომ რა ბრალდებაც აქვს წაყენებული, პირდაპირ იმას ნიშნავს, რომ მან საპროტესტო აქციაში მონაწილეობის დროს რაღაც არ გააკეთა სწორად და კანონი დაარღვია, ანუ ამ საქმეს თავიდანვე პოლიტიკური შემადგენელი ჰქონდა.

ხელისუფლებას ვურჩევ, რომ როდესაც ასეთი სენსიტიური თემებია, კეთილი ინებოს და შექმნას ისეთი გარემო, რომელშიც ეს თემები უმტკივნეულოდ გადაწყდება.

გიორგი გახარიამ მინისტრთა კაბინეტი მიიღო მემკვიდრეობით და ტოვებს მას. ახალი ვინც მოვა, ის, დიდი ალბათობით, თავისი გუნდის ფორმირებას შეეცდება.

- იმ შემთხვევაში, თუ გახარია პოლიტიკიდან არ წავიდა და ოპოზიციაში გადავიდა, შეიქმნება თუ არა მის გარშემო მესამე ცენტრი?

- ჩემი შეფასებით, გახარია ქართულ პოლიტიკაში არის მარტოხელა მონადირე. რასაც ვუყურებ, მას არც პარლამენტში ჰყავდა დიდი გუნდი და არც მხარდამჭერთა დიდი ჯგუფი მთავრობაში ყოლია. მან გადადგომით, რაღაც მომენტში პოლიტიკური კაპიტალი კი შეიძინა, დღეს და ხვალ რომ ჩაატარო გამოკითხვა, მას საკმაოდ მაღალი მხარდაჭერა ექნება, მაგრამ არა დამოუკიდებელი ელექტორატიდან, არამედ ოპოზიციური ელექტორატიდან, რომელიც დღეს გახარიას გადაწყვეტილებას საკმაოდ დადებითად შეაფასებს.

გუნდი შეიძლება შექმნას ნებისმიერმა ადამიანმა, მაგრამ მას პოლიტიკური კაპიტალი უნდა ჰქონდეს ისეთი, რომ ამ გუნდს მხარი დაუჭირონ არა მხოლოდ გუნდის ოჯახის წევრებმა, არამედ ელექტორატმა, აქ ელექტორალურ გავლენაზეა ლაპარაკი. აქვს კი დღეს გახარიას ელექტორალური გავლენა (ნეიტრალურ ამომრჩეველში ვგულისხმობ), არ ვიცი, უფრო მგონია, რომ არ აქვს. რას იზამს ხვალ და ზეგ, ვნახოთ... თუმცა გამორიცხვით არაფერს გამოვრიცხავ - შესაძლოა გახარიამ დაიწყოს პოლიტიკური საქმიანობა, რაღაც კაპიტალი მას აქვს, ცნობადობა აქვს და თუ ამ პოლიტიკური კაპიტალის ნაკლებობას ფინანსური კაპიტალით შეავსებს (მით უმეტეს, თუ რიგგარეშე არჩევნებზე წავიდა საქმე, როცა ლაპარაკია 1%-იან ბარიერზე), შესაძლოა მან შეძლოს ისეთი გუნდის ჩამოყალიბება, რომლისთვისაც 1%-იანი ბარიერის გადალახვა პრობლემა არ იქნება.