"საზოგადოებაში ძალიან მკაცრი ადამიანის იმიჯი აქვს, სინამდვილეში იუმორის გრძნობით აღსავსე პიროვნებაა" - ნიკოლოზ სამხარაძე ირაკლი კობახიძეზე

ირაკლი კობახიძე, რომელსაც საზოგადოებაში ძალიან მკაცრი ადამიანის იმიჯი აქვს, სინამდვილეში იუმორის გრძნობით აღსავსე პიროვნებაა, - ასე შეაფასა საგარეო ურთიერთობათა კომიტეტის თავმჯდომარემ, ნიკოლოზ სამხარაძემ საპარლამენტო უმრავლესობის ლიდერის ირაკლი კობახიძის მიერ ოპოზიციის მისამართით გაკეთებული განცხადებები.

ნიკოლოზ სამხარაძის განცხადებით, იუმორით ნათქვამი განცხადება ხელისუფლებასა და ოპოზიციას შორის მიმდინარე მოლაპარაკებების პროცესს ხელს ვერ შეუშლის.

„მინდა გითხრათ, რომ ირაკლი კობახიძე, რომელსაც საზოგადოებაში ძალიან მკაცრი ადამიანის იმიჯი აქვს, სინამდვილეში იუმორის გრძნობით აღსავსე პიროვნებაა. ამიტომ, მისი გუშინდელი გამოსვლა ამის კიდევ ერთი დადასტურება იყო. რაც შეეხება კითხვას, შეუშლის თუ არა ხელს მოლაპარაკებების პროცესს, იუმორს არანაირი მოლაპარაკებებისთვის ხელი არასდროს შეუძლია. არ აქვს მნიშვნელობა პარლამენტის ტრიბუნიდან იქნება ეს თუ სხვა ადგილიდან. იმ ადამიანებს, თუ ეწყინათ ეს და იუმორის გრძნობა არ აქვთ, ეს მათი პრობლემაა. იუმორი მოლაპარაკებებს ხელს არ შეუშლის“, - განაცხადა სამხარაძემ.

ცნობისთვის, გუშინ უმრავლესობის ლიდერმა ირაკლი კობახიძემ პლენარული სხდომის მიმდინარეობისას პარლამენტში შექმნილი ვითარება შეაფასა და აღნიშნა, რომ „ოპოზიცია პარლამენტს ყველა შემთხვევაში აკლია, ისეთიც კი, როგორიც ის არის“.

როგორც კობახიძემ აღნიშნა, ქვეყანას აკლია მწვავე და კრიტიკული ოპოზიცია, რომელიც არა ნგრევისკენ, არამედ შენებისკენ იქნება მოწოდებული.

„ძალიან დაგვაკლდა გიგა ბოკერიასა და მისი 3%-იანი პარტიის ფასდაუდებელი რჩევები საპენსიო რეფორმის გაუქმებასთან და კატასტროფული საბიუჯეტო დეფიციტის წარმოქმნასთან დაკავშირებით. ძალიან დაგვაკლდა სალომე სამადაშვილი, რომელსაც ღრმად სწამს, რომ სწორედ „ქართული ოცნება“ არის ჭეშმარიტად პროდასავლური პარტია, „ნაციონალური მოძრაობა“ კი მიხეილ სააკაშვილისა და გუბაზ სანიკიძის ჭაობშია ჩარჩენილი, თუმცა ამ დარბაზში ის მაინც ჩვეული დამაჯერებლობით დაიწყებდა იმის მტკიცებას, რომ ხელისუფლება ქვეყანას ჩრდილოეთისკენ მიაქანებს. ძალიან დაგვაკლდება რუსეთის საერთაშორისო უსაფრთხოების სპეციალისტის ელენე ხოშტარიას მიერ სხდომათა დარბაზში გაჟღერებული რუსეთის ჰიმნი. პარლამენტში ძალიან დაგვაკლდა რუსულად ნამღერი „თბილისო“. ძალიან დაგვაკლდა „პატრიოტთა ალიანსის“ პოლიტიკური შემადგენლის პრორუსული პროპაგანდა. ძალიან დაგვაკლდა გიორგი ვაშაძე - აღმაშენებლის მიერ პლენარულ სხდომათა დარბაზში ჩატარებული სწრაფი კოვიდტესტი. ძალიან დაგვაკლდა პროსტიტუციისა და ნარკომანიის პროპაგანდა ზურაბ გირჩი - ჯაფარიძის შესრულებით. ძალიან დაგვაკლდა ნიკანორ მელიას „ვაჟკაცური“ პროვოკაციები. ძალიან დაგვაკლდა სხდომათა დარბაზში მოსხმული ტოქსიკური სითხე. ძალიან დაგვაკლდა ნატო ჩხეიძე და ნიკა მაჭუტაძე - უბრალოდ დაგვაკლდა. ძალიან დაგვაკლდა შალვა ნათელაშვილის კომპეტენცია და პატიოსნება“, - განაცხადა კობახიძემ.