"ვირუსის გავრცელების კანონზომიერებით, პიკის შემდეგ იწყება კლება" - შენარჩუნდება თუ არა კლების დინამიკა და როდისთვის უნდა ველოდოთ გარდაცვალების შემთხვევათა შემცირებას?

ბოლო რამდენიმე დღეა საქართველოში იკლებს კორონავირუსის დადასტურებული შემთხვევების რაოდენობა. 24 დეკემბრის მონაცემებით, 13 699-მა ტესტირებამ 1972 შემთხვევა დაადასტურა. 23 დეკემბრის ინფორმაციით, 14 457 ტესტიდან დადებითი პასუხი აჩვენა 2345-მა.

22 დეკემბერს 17 007 ტესტირებიდან გამოვლინდა 3064 შემთხვევა, რაც 16 დეკემბრის შემდეგ ყველაზე მაღალი მაჩვენებელი იყო. აღსანიშნავია, რომ ინფიცირებულთა რაოდენობის კლების მიუხედავად, არ მცირდება გარდაცვლილთა მაჩვენებელი. არის თუ არა რეალურად იმედისმომცემი გამოვლენილ შემთხვევათა კლების სტატისტიკა და შენარჩუნდება თუ არა სამომავლოდ ეს დინამიკა, როდისთვის უნდა ველოდოთ გარდაცვალების შემთხვევათა კლებას და როგორია დამდეგის დღესასწაულების აღნიშვნის რეკომენდაციები ინფექციონისტისგან? - AMBEBI.GE მაია ბუწაშვილს ესაუბრა.

- რას უკავშირდება ინფიცირების შემთხვევათა კლება და რამდენად იძლევა მონაცემები დამშვიდების საფუძველს?

- ამას ორი მიზეზი აქვს : პირველი - დაწესებულმა შეზღუდვებმა თავისი ლოგიკური შედეგი გამოიღო და მეორე - ვირუსის გავრცელების კანონზომიერების მიხედვით, პიკის შემდეგ იწყება კლება. მონაცემები, რა თქმა უნდა, პოზიტიურად და იმედისმომცემად გამოიყურება, მაგრამ შენარჩუნდება თუ არა კლების ტენდენცია, ეს ბევრ რამეზეა დამოკიდებული. უპირველესად იმაზე, თუ როგორ ჩავატარებთ დამდეგ დღესასწაულებს, რამდენად დავიცავთ წესებს და რეკომენდაციებს.

- რაც შეეხება გარდაცვალების სტატისტიკას, რატომ არ მცირდება შემთხვევათა კლების პროპორციულად და როდის უნდა ველოდოთ ამას?

- ესეც ეპიდემიის კანონზომიერებაა. ზოგადად, ინფიცირების შემთხვევათა კლება პირდაპირპროპორციულ კავშირშია გარდაცვალების მაჩვენებელთან, მაგრამ, როგორც წესი, შედეგი 3-4 კვირაში აისახება ხოლმე ციფრებში. ე.ი. თუ ეს კლების ტენდენცია შენარჩუნდა, დაახლოებით ამ პერიოდში უნდა დავინახოთ გარდაცვალების შემთხვევების კლების ტენდენციაც. ეს დამოკიდებულია იმაზეც, თუ რამდენად გამართულად და შეუფერხებლად იმუშავებს შესაბამისი დაწესებულებები და მათი რეანიმაციული განყოფილებები, რამდენად გაწვდება მათი რესურსი ამას.

- დამდეგი შობა-ახალი წლის დღესასწაულებთან დაკავშირებით ხელისუფლებამ გარკვული შეზღუდვები შეამსუბუქა, თუმცა არა იმ დოზით, რაც დაანონსებული იყო. როგორ შეაფასებთ მთავრობის ამ გადაწყვეტილებას?

- ზოგადად, ხელისუფლებისადმი კრიტიკული შეფასებებით კი გამოვირჩევი, მაგრამ მინდა ვთქვა, რომ ეს იყო სწორი გადაწყვტილება. როგორც ექიმისა და ინფექციონისტისთვის კომფორტულია, რომ დავკეტოთ მაღაზიები, თავშეყრის ადგილები და ა.შ., მაგრამ ეს ხომ გამართლებული არ იქნება. ამიტომ კარგია, რომ სავაჭრო დაწესებულებები გაიხსნა და ასევე, კარგია, რომ ობიექტებს დაევალათ დისტანციისა და სხვა წესების კონტროლი. აქამდე ეს ასე არ იყო და ვიღებდით ქაოტურ და საშიშ სიტუაციებს. ვაკვირდებოდი გუშინ და სიტუაცია კონტროლს ექვემდებარებოდა, დაცული იყო დისტანცია და ყველა სხვა წესი ერთი შეხედვით. თუ ასე შენარჩუნდა კონტროლი და მოქალაქებმაც გამოიჩინეს მაღალი პასუხისმგებლობა, სავაჭრო ობიექტების ფუნქციონირება არ იქნება განსაკუთრებული რისკის მატარებელი.

მთავარია, არსებობდეს კონტროლის მძლავრი მექანიზმი. მაღაზიების გახსნასთან ერთად, ხელისუფლებას უნდა აღედგინა საზოგადოებრივი ტრანსპორტის ნაწილი. ყველა არა, რა თქმა უნდა. განსაკუთრებით სამარშუტო ტაქსები. მაგრამ უნდა აღედგინა, მაგალითად, ავტობუსები, სადაც დიდი სივრცეა და სრულიად შესაძლებელია კონტროლიორის მიერ გაკონტროლდეს სიტუაცია: მგზავრთა რაოდენობა, დისტანცია და ა.შ. ჩვენ გავხსენით მაღაზიები, მაგრამ უთანასწორო მდგომარეობაში ჩავაგდეთ ჩვენი მოსახლეობა. ვისაც არ აქვს ავტომობილი და ტაქსიში დამატებით თანხის გადახდის საშუალება, როგორ მივიდეს მაღაზიამდე?! ძალიან ბევრ ქვეყანაში არ გაუქმებულა საზოგადოებრივი ტრანსპორტი, რადგან ეს არის უკიდურესზე უკიდურესი შეზღუდვა.

- თქვენი აზრით, დამძიმდება თუ არა ეპიდსიტუაცია მას შემდეგ, რაც შობა-ახალი წელი ჩაივლის და როგორია თქვენი რეკომენდაციები ამის თავიდან ასაცილებლად?

- თუ მხედველობაში მივიღებთ ჩვენს დამოკიდებულებებს დღესასწაულების მიმართ და მათი აღნიშვნის ტრადიციებს, დიდი ალბათობით, ასე იქნება. მაგრამ უნდა გვახსოვდეს, რომ ეს არის განსხვავებული შობა -ახალი წელი და ჩვენ ჩვენი გართობის გამო საფრთხე არ უნდა შევუქმნათ სხვების სიცოცხლესა და ჯანმრთელობას. აი, მაგალითად, ევროპის ზოგიერთ ქვეყანაში სოლიდური ჯარიმები შემოიღეს მათთვის, ვინც სტუმრად წავა და სტუმრებს მიიღებს. ვფიქრობ, ეს ფორმალური შეზღუდვაა და მისი რეალურად აღსრულება რთულია. ჩვენს შემთხვევაში კი ეს შეუძლებელი იქნებოდა, ღიმილისმომგვრელიც კი. ამიტომ მთლიანად საზოგადოების, თითოეული ჩვენგანის პასუხისმგებლობაზეა როგორ ჩავატარებთ დამდეგ დღესასწაულებს. ეს ისედაც ოჯახური დღესასწაულებია და შევხვდეთ ჩვენს ოჯახებში, ვიწრო წრეში, თავი შევიკავოთ ხალხმრავალი ქეიფებისა და შეკრებებისგან.