სერგეენკო და ვოლსკი, სავარაუდოდ, ვიცე-სპიკერებად დაინიშნებიან - კიდევ ვინ რომელ საპარლამენტო თანამდებობაზე შეიძლება ვიხილოთ?

ხვალ, 11 დეკემბერს მე-10 მოწვევის პარლამენტი გახსნილად გამოცხადდება. გავრცელებული ინფორმაციით, პარლამენტმა თანამდებობის პირები, სპიკერატი და კომიტეტების თავმჯდომარეები პირველივე სხდომაზე უნდა აირჩიოს. არაოფიციალური ინფორმაციით, საპარლამენტო თანამდებობებთან დაკავშირებით რამდენიმე საკადრო გადაწყვეტილება უკვე მიღებულია, თუმცა თემაზე შიდა კონსულტაციები და სამუშაო პროცესი ისევ გრძელდება.

"ინტერპრესნიუსი" ინფორმაციით, სავარაუდოდ, პარლამენტის სპიკერატში, ვიცე-სპიკერის პოსტზე დავით სერგეენკოსა და გია ვოლსკის ვიხილავთ. იუსტიციის ყოფილი მინისტრი თეა წულუკიანი შესაძლოა განათლების, მეცნიერებისა და კულტურის კომიტეტის თავმჯდომარედ აირჩიონ.

დარგობრივი ეკონომიკისა და ეკონომიკური პოლიტიკის კომიტეტს კი დავით სონღულაშვილს ჩააბარებენ, წინასწარი ინფორმაციით, რამდენიმე საპარლამენტო კომიტეტში ძველი თავმჯდომარე რჩება, შესაბამისად, სპორტისა და ახალგაზრდულ საქმეთა კომიტეტს კვლავ მიხეილ ყაველაშვილი, ჯანმრთელობის დაცვისა და სოციალურ საკითხთა კომიტეტს - დიმიტრი ხუნდაძე, დიასპორისა და კავკასიის საკითხთა კომიტეტს - ბექა ოდიშარია, ხოლო იურიდიულ საკითხთა კომიტეტს ანრი ოხანაშვილი უხელმძღვანელებენ.

ambebi.ge-ს მიერ მოპოვებული არაოფიციალური ინფორმაციით კი, გარემოს დაცვისა და ბუნებრივი რესურსების კომიტეტს - მაია ბითაძე, საგარეო ურთიერთობათა კომიტეტს ნიკოლოზ სამხარაძე, ხოლო ადამიანის უფლებათა დაცვისა და სამოქალაქო ინტეგრაციის კომიტეტს სოზარ სუბარი ჩაუდგება სათავეში.