დღეს პარტია "მოქალაქეების” ლიდერმა ალეკო ელისაშვილმა "ფეისბუქის" პირდაპირ ეთერში განცხადება გაავრცელა, რომელშიც ის ხელისუფლებასა და ოპოზიციას შორის მოლაპარაკებების დეტალებზე საუბრობს. მას შემდეგ, რაც პარლამენტში შესვლასთან დაკავშირებით ალეკო ელისაშვილის პოზიცია გახდა ცნობილი, ამან დანარჩენი ოპოზიციის ლიდერების განრისხება გამოიწვია. რამდენიმე დრის წინ, ელისაშვილმა განაცხადა, რომ თუ საარჩევნო სისტემა და ადმინისტრაციის დაკომპლექტების წესები ისე შეიცვლება, როგორც ამაზე მოლაპარაკება მიმდინარეობს და ექნება გარანტია, რომ შეთანხმება შესრულდება, მაშინ პარლამენტში შესვლას დათანხმდება.
"ფეისბუქლაივში" ელისაშვილი ამბობს, რომ მოლაპარაკებებზე ოპოზიციამ 4 საკითხი დასვა და პრინციპში, ხელისუფლებასთან შეთანხმება ოთხივე საკითზე მოახერხა.
"ღიად მხოლოდ პოლიტპატიმრების თემაზე ვერ ვისაუბრებ, რადგან მინდა, რომ მათ ციხე მართლაც დატოვონ”.
ელისაშვილმა განაცხადა, რომ შეთანხმებას ხელს "ევროპული საქართველო" არ აწერს, რომელსაც მოლაპარაკებების ჩაშლა უნდა.
"სრული პასუხისმგებლობით გეუბნებით, 99% მოთხოვნების, რაც საარჩევნო კომისასთან დაკავშირებით და რაც საარჩევნო წესებთან დაკავშირებით ჩვენ მივიტანეთ, 99%-ზე "ქართულმა ოცნებამ” თქვა, რომ ეთანხმება. ბოლო შეხვედრაზე "ოცნება" მოვიდა, ამ პაკეტზე თქვა, რომ დასტურს გაძლევთ არჩევნებთან დაკავშირებით, რომ რიგგარეშეზეც თანახმა ვართო. ანუ 4 საკითხიდან გვითხრეს, რომ ოთხივეზე თანახმა ვართო. ოღონდ, გადავთვალოთ ნებისმიერი ფორმით და დაგვიდასტურეთ, რომ 1% მაინც გაყალბდაო, როგორც გინდათ ისე დაგვიდასტურეთო, რასაც ენდობით, ის მოგვიტანეთო. ამაზე მეტი რა უნდა თქვან, გულზე ხელი დაიდეთ...
ოთხივე საკითხზე, პრინციპში, შეთანმხებულები ვართ და რა ხდება ახლა, ბოკერიას, უგულავას ხალხი და კიდევ ვიღაც ვიღაცეები ამბობენ, რომ ხელს არ მოვაწერთო, შეთანხმება ხომ არის, უნდა მოაწერო ხელი და შეხვიდე პარლამენტში, პირობების შესრულება რომ დაიწყება. ახლა ხდება ყველაზე უცნაური ამბავი, პარტიას "ევროპული საქართველო” ჰქვია, მაგრამ მავნებელი საქართველოა, სინამდვილეში, ბნელი საქართველო არის, როგორც ოპოზიციის შიგნით, ასევე, მოლაპარაკებებზე ცდილობდა მოლაპარაკების ჩაშლას, თავიდან ბოლომდე, პირველი დღიდან, პირველი წინადადებიდან იძახდა, არ მინდა, არ მინდა. ახლა არის ერთი სცენარი, წავედით, ამ ისტორიულ შეთანხმებას მივაღწიეთ, ჩვენი რასაც ვითხოვდით ის ყველაფერი დააკმაყოფილეს", - თქვა ალეკო ელისაშვილმა.
ელისაშვილი ამბობს, რომ მოლაპარაკებებზე პრაქტიულად ოთხივე საკითხზე შეთანხმდნენ და თუ პირობები შესრულდება, მაშინ ოპოზიციამ შეთანხმებას ხელი უნდა მოაწეროს და პარლამენტშიც შევიდეს.
