"3-4 დღე კოვიდსასტუმროში იმყოფებოდა, 6 დეკემბერს ჩვენს კლინიკაში მოათავსეს" - ბათუმში კიდევ ერთი ექიმი გარდაიცვალა Covid 19-ით

ბათუმის რესპუბლიკური საავადმყოფოს ექიმი-ტრავმატოლოგი 63 წლის შოთა ბერიძე კორონავირუსული ინფექციის გართულების შედეგად გარდაიცვალა.

როგორც მეგობრები და კოლეგები იხსენებენ, შოთა ექიმი პანდემიის წინააღმდეგ თავდაუზოგავად იბრძოდა. ექიმ გია კიკაბიძის ინფორმაციით, შოთა ბერიძე თავდაპირველად კოვიდსასტუმროში, ხოლო ჯანმრთელობის დამძიმების გამო, ბათუმის რესპუბლიკურ საავადმყოფოში აგრძელებდა მკურნალობს.

"ბათუმის რესპუბლიკური საავადმყოფოს გუნდს, კიდევ ერთი შესანიშნავი ადამიანი დააკლდა, შოთა თავისი შინაგანი კულტურითა და პატიოსნებით გამოირჩეოდა. ავადმყოფზე შეყვარებული ექიმი, რომელსაც პაციენტი გაჭირვების ჟამს არასდროს მიუტოვებია. სამწუხაროდ, 63 წლის ასაკში წავიდა ჩვენგან. რამდენიმე დღის წინ, კორონავირუსი დაუდგინდა და 3-4 დღე კოვიდსასტუმროში იმყოფებოდა, 6 დეკემბერს ჩვენს კლინიკაში მოათავსეს.

მას კომპიუტერული ტომოგრაფია ჩაუტარდა და ფილტვის 45%-იანი დაზიანება და ორმხრივი პნევმონია აღენიშნებოდა. ფილტვების შეშუპების გამო, გუშინ მართვით სუნთქვაზე გადავიყვანეთ, ჩატარებული ღონისძიებების მიუხედავად, მისი გადარჩენა ვერ მოხერხდა. ქრონიკული თანმხლები დაავადებები ჰქონდა, იგი ექიმი - ტრავმატოლოგის პოზიციაზე მუშაობდა. 2011 წლიდან რესპუბლიკურში, ხოლო მანამდე ქალაქის პირველ საავადმყოფოში მუშაობდა. მოყვანის დროს კონტაქტური და ადეკვატური იყო. მას სასტუმროში ძალიან კარგი ექიმები მკურნალობდნენ, მაგრამ ტრაგედია თავიდან ვერ ავიცილეთ", - განაცხადა გია კიკაბიძემ.

"კიდევ ერთი ჩვენი კოლეგა შეიწირა პანდემიამ, უთბილესი ადამიანი, გულიანი კაცი და მოწოდებით ექიმი. ღმერთმა გაანათლოს ბატონი შოთას სული", - წერენ სოციალირ ქსელში შოთა ბერიძის კოლეგები.