"ხელები შემიკრეს და დამაგდეს ქვემოთ, მუშტები მირტყეს. მერე უთო მოიტანეს..." - ხობში მომხდარი სასტიკი ყაჩაღობის დეტალები

ხობის მუნიციპალიტეტის სოფელ ნოჯიხევში, კომენდატის საათის დროს 73 წლის ქალი დააყაჩაღეს. "მთავარი არხის" ინფორმაციით, თავდამსხმელებმა ქალი უთოს გამოყენებით აწამეს და იქამდე უსწორდებოდნენ ფიზიკურად, ვიდრე გონება არ დაკარგა.

როგორც დაზარალებული, მედეა გოცირიძე ყვება, ყაჩაღები სახლში ფანჯრიდან შეიჭრნენ, სიბნელის გამო ქალმა მათი სახეები ვერ გაარჩია.

"4 საათი იყო, კომენდანტის საათი და მაშინ მოვიდნენ, ფულები ამოყარეო, არ მომკლათ-მეთქი ვუთხარი, ყველაფერი წაიღეს, ფული გვინდაო, მცემეს, ინსულტიანი ქალი, უცებ რომ შემოვიდნენ, ხელები შემიკრეს და დამაგდეს ქვემოთ, მუშტები მირტყეს. მერე უთო მოიტანეს და ჩართეს და ვაიმე, როგორ ვიკივლე...", - ყვება "მთავარ არხთან" დაზარალებული მედეა გოცირიძე.

ქალმა ნათესავებს დახმარება თავად სთხოვა. ნათესავების თქმით, ქალს ინსულტი აქვს გადატანილი.

"ნაცემია ძალიან მაგრად, დააუთოვეს, გასკოჩეს, ეძებდნენ... კიდევ გაქვს თანხაო, გამოიტანეო, ურტყამდნენ სულ, ორნი იყვნენო ერთი ცოტა დაბალი, მეორე უფრო მაღალი ფულს მთხოვდნენო, ოქროებიც გექნებაო. ნაინსულტარ ქალს ასე რომ ურტყამდნენ... რომელ წელს მოხდა ეს ბოლოს, საერთოდ აღარ მახსოვს, მითუმეტეს ხობში", - უყვება "მთავარ არხს" დაზარალებულის ნათესავი.

ტელეკომპანიის ინფორმაციით, ყაჩაღებმა ქალი ღამით გაკოჭილი დატოვეს. სახლიდან წაღებულია თანხა. დაზარალებული ამჟამად ნათესავის სახლშია, მისი მდგომარეობა მძიმეა, თუმცა კონტაქტურია და ექსპერტიზის ჩატარებას ელოდება.

მომხდართან დაკავშირებით, შს სამინისტრომ გამოძიება 179-ე მუხლით დაიწყო, რაც ყაჩაღობას გულისხმობს.