"ტუჩები ჰქონდა დალურჯებული, სიმწრისგან იკვნეტდა, წყალს არ აწვდიდნენ, მოკლეს უყურადღებობით... მივმართავთ სასამართლოს" - რას ყვება კოვიდით გარდაცვლილი 24 წლის გოგონას ოჯახი

30 ნოემბრს მცხეთის სამედიცინო ცენტრში, Covid-19-ის დიაგნოზით, 24 წლის ნინო გულიკაშვილი გარდაიცვალა. გარდაცვლილის ოჯახის წევრები მომხდარში მედიკოსებს ადანაშაულებენ. ისინი მიიჩნევენ, რომ პაციენტი ექიმების უყურადღებობასა და დაგვიანებულ რეაგირებას ემსხვერპლა.

Ambebi.ge გარდაცვლილის დეიდაშვილს, ეკა რაზმიაშვილს ესაუბრა.

- როგორ დაინფიცირდა კორონავირუსით თქვენი დეიდაშვილი?

- პირველ რიგში, მინდა აგიხსნათ, თუ რა მალაპარაკებს. სამწუხაროდ, ჩვენ, ჭრისუფლებს, საზოგადოება გვაყენებს ისეთ უხერხულ მდგომარეობაში, რომ ჩვენ ეს ავხსნათ და ანგარიში ჩავაბაროთ მათ, თუ რატომ გვაქვს ასეთ დროს ლაპარაკის თავი და ჩვენც რატომ არ ვიხოცებით. გუშინ 19 წლის თეკლა ემსხვერპლა ამ ვერაგ დაავადებას და სოციალურ ქსელში ერთი ამბავი ატყდა, რა ალაპარაკებთ ჭირისუფლებს ჟურნალისტებთან, ჯერ მკვდარი არ გაციებულაო. თითქოს ჭირისუფალზე მეტად მათ შესტკიოდეთ გული...

ნინო ჩემი დეიდაშვილი კი არა, და იყო. მასზე რვა წლით უფროსი ვარ და ერთ სოფელში, ერთ სახლში გავიზარდეთ. ჩათვალეთ, რომ მეც მკვდარი ვარ ახლა.

მას ვერავინ გამიცოცხლებს, მაგრამ ერთადერთი ნუგეში, რაც მის ნათესავებს გვაქვს, სიმართლის დადგენაა. მივაბარებთ მიწას ჩვენს გოგოს და შემდეგ დავიწყებთ უკომპრომისო ბრძოლას სიმართლის დასადგენად, რადაც არ უნდა დაგვიჯდეს. სადაც მოგვისმენენ, ვისაუბრებთ ყველგან. მივმართავთ სასამართლოს და არ მოვერიდებით ქუჩის აქციებსაც.

ახლა რაც შეეხება ნინოს მდგომარეობას... ერთ-ერთ მაღაზიაში მოლარედ მუშაობდა, უეცრად შეუძლოდ გახდა - ტემპერატურამ აუწია და ცხელება დაეწყო. გადაწყვიტა, ტესტი გაეკეთებინა კორონავირუსზე. ორმა ტესტმა უარყოფითი პასუხი აჩვენა, მიუხედავად ამისა, მაინც მძიმდებოდა მისი მდგომარეობა, ამიტომ გამოვიძახეთ სასწრაფო. ბრიგადამ მცხეთის სამედიცინო ცენტრში გადაიყვანა. იქ მესამედ აუღეს ტესტი კორონავირუსზე და გვითხრეს, რომ ინფიცირებული იყო.

ამ კლინიკაში მკურნალობდა 10 დღის განმავლობაში და მეათე დღეს, გვითხრეს, რომ ფილტვები გაეთიშა და გარდაიცვალა. გარდაიცვალა იმ დღეს, როცა უნდა გამოეწერათ. წინა დღეს ვესაუბრეთ ვიდეო თვალით მე და დედამისი და გვთხრა, ყველაფერი დასტაბილურდა და ხვალ უნდა გამომწერონ, გადავრჩითო. ერთ ღამეში უეცრად დამძიმდა და დილით გარდაიცვალა.

- როგორ მკურნალობდნენ კლინიკაში, რას ამბობდა თვითონ?

- ძალიან უკმაყოფილო იყო. ამბობდა სრული უყურადღებობაა, წყალს ვითხოვ რამდენი ხანია და არავინ არის, რომ მომაწოდოსო. პერიოდულად მძიმდებოდა და უმჯობესდებოდა მისი მდგომარეობა. ერთ-ერთმა ექიმმა თქვა, ჩემთან რომ ჩამოიყვანეს, უკვე გვიან იყო და ვერაფერს გავხდებოდიო. გოგოს ტუჩები ჰქონდა დალურჯებული, სიმწრისგან იკვნეტდა, ალბათ.

- ჰქონდა მანამდე ჯანმრთელობის პრობლემები?

- არანაირი. მასეთ სრულად ჯანმრთელ და საღსალამათ ადამიანს ვერ იპოვით, სანთლით რომ ეძებოთ. ერთადერთი კბილის ამოღების გამო თუ მოუწევდა ექიმთან მისვლა. სხვა არანაირი პრობლემა არ ჰქონია არასოდეს. ახლა მცხეთის საავადმყოფოში გვეუბნებიან, რომ თურმე ნინის შაქრიანი დიაბეტი ჰქონდა და ამან გამოიწვა მისი გარდაცვალება. მე ვსვამ კითხვას: თუ შაქრიანი დიაბეტი ჰქონდა ეს გარდაცვალების მერე უნდა გაგვეგო? გვაჩვენონ შესაბამისი დოკუმენტები.

როგორც ვიცით, როცა კლინიკაში შეჰყავთ პაციენტი, მითუმეტეს კორონავირუსის ეჭვით, უკეთებენ ყველანაირ გამოკვლევებს, მათ შორის გლუკოზაზეც. რატომ არ გვითხრეს თავიდანვე, რომ ეს პრობლემა ჰქონდა და რისკ-ფაქტორი იყო? იმიტომ, რომ მას არ ჰქონდა რეალურად ეს პრობლემა და იგონებენ თავის გასამართლებლად. დიაბეტი რომ ჰქონოდა, 24 წლის განმავლობაში არასოდეს შეაწუხებდა, არ ეცოდინებოდა ამის შესახებ?! დაგვიმტკიცონ, რომ ჰქონდა ეს პრობლემა.

- რას ამბობენ მისი მშობლები, ისინიც ექიმებს ადანაშაულებენ?

- ეს ჩვენი პოზიციაა მთელი ოჯახის, რასაც გეუბნებით. ჩვენ ვიმსჯელეთ და როგორც კი დავასაფლავებთ ნინის, დავიწყებთ ბრძოლას ყველა კანონიერი საშუალებით. მოხუცები ამარცხებენ კორონავირუსს, ქრონიკული დაავადების მქონეებიც მათ შორის და როგორ მოახერხეს ექიმებმა, რომ 24 წლის სრულიად ჯანმრთელი გოგო გარდაიცვალა კორონავირუსით?! ეს უნდა აგვიხსნან. დაამტკიცონ, რომ ის არ იყო ექიმების გულგრილობის და სრული უპასუხსმგებლობის მსხვერპლი. მე ვფიქრობ, რომ ის მოკლეს და ვინ იქნება შემდეგი არვინ იცის. მოკლეს უყურადღებობით, წყალს არ აწვდიდნენ, თურმე, და მკურნალობა როგორ მიმდინარეობდა, ვინ იცის?! ამიტომ სხვებიც რომ არ მოკლან, ჩვენ ვიბრძოლებთ, არ გავჩერდებით!

როგორც "ტვ პირველთან" მცხეთის სამედიცინო ცენტრის კლინიკური დირექტორი, ლიკა მუმლაძე აცხადებს, 24 წლის პაციენტის გარდაცვალების მიზეზი გახდა ორმხრივი პნევმონია, გარდა ამისა, ახალგაზრდა გოგონა იყო ჭარბწონიანი და ორგანიზმში დაფიქსირდა შაქრის მაღალი შემცველობა. მედიკოსის თქმით, პაციენტი მათ კლინიკაში "თბილისის ზღვის ჰოსპიტალიდან" გადაიყვანეს, სადაც მას არ ჰქონდა დადასტურებული კორონავირუსი.

"პაციენტი ჩვენთან სასწრაფომ 18 ნოემბერს შემოიყავანა, ცხელებითა და რესპირატორული ჩივილებით. ჩატარდა PCR ტესტირება, დადასტურდა კორონავირუსული ინფექცია, პაციენტს დაუდასტურდა დიაგნოზი - Covid 19, ფილტვების ორმხრივი საკმაოდ მძიმე დაზიანებით, უტარდებოდა მკურნალობა ინტენსიური მეთვალყურეობის პალატაში, პაციენტს ჰქონდა დადებითი დინამიკა და მკურნალობა გრძელდებოდა. მოხდა მდგომარეობის სწრაფი გაუარესება, სუნთქვის გაძნელება, გულმკერდის არეში ტკივილი, პნევმოთორაქსი განვითარდა ამ გოგონასთან, შემდეგ მოხდა დრენირება პლევრის ღრუსი, მოხდა სამწუხარო ფაქტი, რაც, რა თქმა უნდა, ძალიან სამწუხაროა", - აცხადებს მცხეთის სამედიცინო ცენტრის კლინიკური დირექტორი.