წყალტუბოში, კანალიზაციის სარემონტო სამუშაოებისას მუშა ნანგრევებში მოყვა - რა ინფორმაციას ავრცელებს საგანგებო სიტუაციების სამსახური

წყალტუბოში მეხანძრე-მაშველებმა, საკანალიზაციო ქსელის სარეაბილიტაციო სამუშაოების დროს, ნანგრევებში მოყოლილი ადამიანი უვნებლად გადაარჩინეს. ინფორმაციას საგანგებო სიტუაციების მართვის სამსახური ავრცელებს.

"შინაგან საქმეთა სამინისტროს საზოგადოებრივი უსაფრთხოების მართვის ცენტრ "112"-ში შემოვიდა ინფორმაცია, რომ წყალტუბოში, საკანალიზაციო ქსელის სარეაბილიტაციო სამუშაოების დროს, მუშა მიწისა და ქვების მასაში მოყვა და მაშველების დახმარება სჭირდებოდა.

ადგილზე უმოკლეს დროში გამოცხადდნენ საგანგებო სიტუაციების მართვის სამსახურის თანამშრომლები, რომლებმაც კონტაქტურ მდგომარეობაში მყოფი ახალგაზრდა კაცი მიწის მასიდან ამოიყვანეს.

გადარჩენილი მუშის ჯანმრთელობის მდგომარეობა სასწრაფო სამედიცინო დახმარების ჯგუფმა ადგილზე შეამოწმა და მისი შესაბამის სამედიცინო დაწესებულებაში გადაყვანა საჭირო არ გახდა", - აღნიშნულია ინფორმაციაში.