ტრანსპორტის შეზღუდვა, ბარ-რესტორნებისა და სილამაზის სალონების დახურვა - არსებული ინფორმაციით, მომავალი კვირიდან რეგულაციები მკაცრდება

AMBEBI.GE-ის ინფორმაციით, მომავალი კვირიდან მთავრობა რეგულაციებს ამკაცრებს. კერძოდ, იგეგმება რესტორნების, ბარებისა და სილამაზის სალონების დაკეტვა.

როგორც ჩვენთვის გახდა ცნობილი, რესტორნებისა და ბარების მეპატრონეებმა უკვე მიიღეს შეტყობინება, რომ მათი დაკეტვა 24 ნოემბრიდან მოხდება, ხოლო სალონების მეპატრონეებს აცნობეს, რომ ისინი 23 ნოემბრიდან დაიხურებიან.

ასევე ჩვენი ინფორმაციით, მომავალი კვირიდან შესაძლოა ტრანსპორტის მოძრაობა შეიზღუდოს.

ალერგოლოგ-იმუნოლოგი ბიძინა კულუმბეგოვი ადასტურებს, რომ აღნიშნული შეზღუდვების დაწესების საკითხი განიხილება. ამის შესახებ მან "პალიტრანიუსის" გადაცემაში „360 გრადუსი“ ისაუბრა.

წამყვანის კითხვაზე, ადასტურებს თუ არა გავრცელებულ ინფორმაციას, რომ მომავალი კვირიდან ტრანსპორტსა და დიდ სავაჭრო მოლებთან დაკავშირებით შეზღუდვების საკითხი განიხილება, კულუმბეგოვმა უპასუხა:

"დიახ, მე ამას ვადასტურებ. მე ვიყავი შეხვედრაზე პრემიერთან და გვითხრეს, რომ იქით კვირაში შესაძლოა, კიდევ დაგვიძახონ. დავალებაც კი მიიღო ფინანსთა მინისტრმა და ვიცე-პრემიერმა, მაგრამ როგორი პაკეტი, დამუშავების პროცესი იყო, ზუსტი ინფორმაცია არ გაჟღერებულა, მაგრამ ეს ასე მოხდება. ჩვენი რეკომენდაცია იყო, ბევრი დრო რომ არ დაიკარგოს, რადგან დღეს და ხვალ, ეს გადაწყვეტილება მაინც იქნება მისაღები, რათა ჯანდაცვამ ცოტა ამოისუნთქოს“, - განაცხადა კულუმბეგოვმა.

მისივე განმარტებით, ამ ეტაპზე ჯანდაცვის სიტემა პანდემიას ვაი-ვაგლახით უმკლავდება და ეს შესაძლებლობაც ლიმიტირებულია.

"მე, როგორც ექიმი, მომხრე ვარ, არაესენციალური ობიექტები შეიზღუდოს, არაესენციალურში ძირითადად იგულისხმება ის ობიქეტები, რომელიც არ არის სურსათთან და აფთიაქთან დაკავშირებული. ალბათ, უნდა შეიზღუდოს, აუცილებელია და ძალიან ბევრი არ უნდა დავაგვიანოთ. ტრანსპორტთან ძალიან ჭკვიანურად უნდა მივიღოთ გადაწყვეტილება, ან კონტროლი უნდა გავამკაცროთ, მასში ასული ადამიანების რაოდენობა უნდა შევამციროთ და საერთოდ მის გაჩერებაზე შეიძლება უარი ვთქვათ, იმიტომ რომ ეს ძალიან აზიანებს საზოგადოებას. ვფიქრობ, იქით კვირაში ეს გადაწყვეტილებები იქნება მიღებული.

ჩვენ ვხედავთ, რომ პანდემიის მართვა ძალიან გართულებულია, თუმცა, საბედნიეროდ, ქართული მედიცინა უმკლავდება იმას, რომ სახლში არავინ იღუპება და ღმერთმა გვაცილოს ამის ერთი პრცედენტიც კი, მე არ ვამბობ უეცარ სიკვდილზე და თრომბოემბოლიურ გართულებაზე, რომელიც ამ ვერაგ ვირუსს ახასიათებს და უსიმპტომო ადამიანსაც შეიძლება ეს დაემართოს. აქ ლაპარაკია სუნთქვითი აპარატების რაოდენობა რომ ამოგვეწუროს, როგორც ეს დასაწყისში ნიუ-იორკში და ლომბარდიაში - იტალიაში მოხდა. ვაი-ვაგლახით ამას ვუმკლავდებით, მაგრამ ეს ზღვარი ლიმიტირებულია, ეს ვერ გაგრძელდება, რა თქმა უნდა, ეპიდემილოგიურად ჩვენ არ გვაქვს კითხვაზე პასუხი, ახლა სად ვიმყოფებით. თუ ეს პიკია და სადღაც იქნება სტაბილიზაცია და დაღმავლობისკენ წამოვალთ, შეიძლება ქვეყანამ მინიმალური შეზღუდვებით გაუძლოს“, - განაცხადა კულუმბეგოვმა.