"აზერბაიჯანის ძალები სტეფანაკერტის მისადგომებთან არიან და ქალაქის არსებობა საფრთხეშია" - რას აცხადებენ არაღიარებულ მთიან ყარაბაღში

არაღიარებული მთიანი ყარაბაღის რესპუბლიკის ე.წ. პრეზიდენტის პრესსპიკერის ვაჰრამ პოღოსიანის ინფორმაციით, აზერბაიჯანის ძალები სტეფანაკერტის მისადგომებთან არიან.

მისივე ინფორმაციით, მთიანი ყარაბაღის თავდაცვის არმიამ ქალაქ შუშაზე კონტროლი დაკარგა.

"მტერი სტეფანაკერტის მისადგომთან არის და დედაქალაქის არსებობას უკვე საფრთხე ემუქრება. თუ გვსურს, რომ შუშა კვლავ ჩვენი გახდეს და შევინარჩუნოთ არცახი, მთელი ძალისხმევა უნდა გამოვიყენოთ სტეფანაკერტისა და ფრონტის ხაზის სხვა მიმართულებების საიმედო თავდაცვის ორგანიზებისთვის.

ეს არის წარმატების საიმედო და ნამდვილი გარანტია. ყალბი მოწოდებები გამარჯვებისკენ და "ფეისბუქის“ სპეკულაციები თანდათან ყველაფერს დაგვაკარგვინებს, ისტორია ამას არ გვაპატიებს. ჩვენ ბოლომდე ვიბრძვით“, – წერს პოღოსიანი "ფეისბუქში“.