ბანკზე თავდასხმაში მონაწილის ბადრი ესებუას სახლში და ზუგდიდში კიდევ რამდენიმე მისამართზე ჩხრეკა მიმდინარეობს

ზუგდიდში ერთმანეთის პარალელურად რამდენიმე სპეცოპერაცია მიმდინარეობს. მედიის ინფორმაციით, სპეცოპერაცია მიმდინარეობს ბადრი ესებუას სახლში, რომელიც შსს-ს ინფორმაციით, საქართველოს ბანკზე თავდასხმაში მონაწილეა.

სავარაუდოდ, მიმდინარეობს ესებუას ოჯახის წევრების, მშობლებისა და ძმის გამოკითხვა და სახლიდან მისი ნივთების ამოღება.

ცნობისთვის, ზუგდიდში, "საქართველოს ბანკის“ ფილიალს შეიარაღებული პირი თავს 21 ოქტომბერს დაესხა. თავდამსხმელმა 43 მძევალი აიყვანა. მან ბანკის შენობა სამ მძევალთან ერთად მას შემდეგ დატოვა, რაც მოთხოვნები დააკმაყოფილეს - მისცეს თანხა, გამოუყვეს ვერტმფრენი და შეუქმნეს უსაფრთხო პირობები ტერიტორიის დატოვებისთვის. თავდამსხმელი ნახევარ მილიონ დოლარს ითხოვდა.

აღსანიშნავია, რომ 3 მძევალს შორის, ვისთან ერთადაც შეიარაღებულმა პირმა "საქართველოს ბანკის“ შენობა დატოვა, ერთ-ერთი სამეგრელო-ზემო სვანეთის პოლიციის დეპარტამენტის დირექტორი, ავთანდილ გალდავა იყო, რომელიც თავდამსხმელთან მოლაპარაკებებს უშუალოდ აწარმოებდა, მოგვიანებით კი მძევლების დიდ ნაწილს ჩაენაცვლა. არსებული ინფორმაციით, სწორედ გალდავამ მიუტანა თავდამსხმელს ფულიც.