აჭარის მთავრობა აიღებს მზრუნველობას გოგონაზე, რომელმაც ხელვაჩაურში სტიქიის შედეგად მშობლები და ძმა დაკარგა
აჭარის მთავრობა აიღებს მზრუნველობას გოგონაზე, რომელმაც ხელვაჩაურში სტიქიის შედეგად მშობლები და ძმა დაკარგა. ამის შესახებ აჭარის მთავრობის თავმჯდომარემ თორნიკე რიჟვაძემ განაცხადა.
"უმძიმესი ორი დღე იყო ყველასთვის. რა თქმა უნდა კიდევ ერთხელ მინდა მივუსამძიმრო განსაკუთრებით ხელვაჩაურს, დაღუპულების ოჯახს და მთელს ქვეყანას. მინდა ასევე დიდი მადლობა გადავუხადო ჩვენს მაშველებს, რომლებმაც შეუძლებელი შეძლეს და იპოვეს ყველა დაკარგული ადამიანი.
ეს იყო უეცრად უხვი ნალექის შედეგად განვითარებული სტიქიური მოვლენები. რაც შეეხება წინა ისტორიებს, თუკი არსებობდა კონკრეტული რეაგირების გარეშე დარჩენილი შემთხვევები, როგორც უკვე განვმარტე დეტალური შესწავლის შემდეგ, ასეთის არსებობის შემთხვევაში მოხდება უმკაცრესი რეაგირება.
ამ შემთხვევით ყველამ უნდა გავაკეთოთ დასკვნა, რომ ესეთი შემთხვევები აღარ განმეორდეს.განსაკუთრებით მნიშვნელოვანი იქნება ჩვენთვის, რომ ოჯახის ხსოვნას კიდევ უფრო მეტი პატივი ვცეთ გადარჩენილი გოგონას სახით, რომელიც დარჩათ და ამისთვის ყველაფერს გავაკეთებ, რომ მას ექნება აბსოლუტური გვერდში დგომა სახელმწიფოსგან და თითოეული ჩვენგანის მხრიდან",- განაცხადა რიჟვაძემ.
ცნობისთვის, ხელვაჩაურის რაიონის სოფელ ჯოჭოში 1 ოქტომბერს, გვიან ღამით, უხვმა ნალექმა, მეწყრული პროცესები გამოიწვია, რის შედეგადაც ჩამოწოლილმა მიწამ სახლი მოიყოლა. მასში ოჯახის 4 წევრი იმყოფებოდა.
გარდაცვლილები არიან, ლევან თედორაძე, მისი მეუღლე მაია ბერიძე და მათი არასრულწლოვანი შვილი, მურმან თედორაძე. გადარჩა მხოლოდ მათი გოგონა, რომელიც ხულოში, ნათესავთან სტუმრად იმყოფებოდა.
"ასე მგონია, ახლაც გვეხუმრება და სადაცაა გამოჩნდება" - 61 წლის მამაკაცი, რომელსაც ხელვაჩაურში, მდინარეში ეძებენ, აჭარის უმაღლესი საბჭოს თანამშრომელია
"მისი წარმატება არაერთ მედალსა და სიგელს ითვლის" - ძალოსნობის ფედერაცია სტიქიის შედეგად გარდაცვლილი მოზარდის გამო მწუხარებას გამოთქვამს
