"ეფექტური ვაქცინის გამოყენებამდე კორონავირუსმა, შესაძლოა, 2 მილიონი ადამიანის სიცოცხლე შეიწიროს" - ჯანმო-ს წარმომადგენელი

ჯანმო-ს საგანგებო მდგომარეობების დირექტორი მაიკ რაიანი აცხადებს, რომ ეფექტური ვაქცინის გამოყენებამდე კორონავირუსმა, შესაძლოა, 2 მილიონი ადამიანის სიცოცხლე შეიწიროს.

მან შეშფოთება გამოხატა იმის გამო, რომ ბოლო დღეების განმავლობაში ევროპაში ინფიცირებულების რაოდენობა იზრდება.

"ამ დიდ რეგიონში დაავადების შემთხვევების შემაშფოთებელ ზრდას ვხედავთ,“-აღნიშნა ჯანმო-ს წარმომადგენელმა.

მან ევროპელებს მოუწოდა, ჰკითხონ საკუთარ თავს, გააკეთეს თუ არა საკმარისი იმისთვის, რომ საკარანტინო რეჟიმი თავიდან აეცილებინათ და გამოიყენეს თუ არა ისეთი ალტერნატივები, როგორიცაა ტესტირება და კონტაქტების დადგენა, კარანტინი და სოციალური დისტანციის წესების დაცვა.

"კარანტინი თითქმის უკანასკნელი საშუალებაა - და იმაზე ფიქრი, რომ სექტემბერში ამ უკანასკნელ საშუალებას ვიყენებთ, სამწუხაროა,“- აღნიშნა მაიკ რაიანმა.

ცნობისათვის, მსოფლიოში, კორონავირუსით ინფიცირების შემთხვევები 32 მილიონს აჭარბებს, აქედან გამოჯანმრთელებულია 24 მილიონზე მეტი პაციენტი, დაღუპულთა რაოდენობა კი 993 463-ია.