"მეორე ტალღას კი არა, ცუნამს მივიღებთ!" - საზოგადოებრივ ტრანსპორტში გადაღებულ რა ფოტოს ავრცელებს დავით მესხიშვილი
"საქართველოს ტრანსპორტისა და გზების ასოციაციის" თავმჯდომარის, დავით მესხიშვილის თქმით, საზოგადოებრივ ტრანსპორტში კორონავირუსის პრევენციისთვის აუცილებელი არცერთი ნორმა არ არის დაცული, რაც ზრდის ინფიცირების რისკებს.
ამის შესახებ პოსტი და ავტობუსში არსებული სიტუაციის ამსახველი ფოტო მესხიშვილმა "ფეისბუქის" პირად გვერდზე გამოაქვეყნა:
"სრული განუკითხაობაა საზოგადოებრივ ტრანსპორტში, გარდა პირბადისა, არცერთი საერთაშორისო სტანდარტი არ არის დანერგილი, არცერთი! კატასტროფა! უპასუხისმგებლობა!
სად ხართ ტრანსპორტის სამსახურები? სად ხართ ჯანდაცვის სამინისტრო? სად არის გათვალისწინებული საერთაშორისო რეკომენდაციები? ვინ ახორციელებს მონიტორინგს მგზავრობაზე? თბილისის მერია საერთოდ რას აკეთებ? მეორე ტალღაო?! მეორე ტალღა კი არა, თუ რეკომენდაციებს არ გაითვილისწინებთ ცუნამს მივიღებთ!" - წერს საგზაო უსაფრთხოების ექსპერტი. ფოტოებზე ასახულია ავტობუსი N24 დილის 08:30 საათზე და ავტობუსი N124 საღამოს 19:00 საათზე.
ამასთან მესხიშვილი იმ აუცილებელი რეკომენდაციების შესახებ წერს, რაც უნდა გაითვალისწინოს ქალაქის ხელმძღვანელობამ და სატრანსპორტო სამსახურებმა:
"თბილისის და სხვა ქალაქების საზოგადოებრივ ტრანსპორტში სრული განუკითხაობაა და ხალხის ტევა არ არის ავტობუსებში. ვაქვეყნებ რეკომენდაციებს, ევროკავშირის წევრი სახელმწიფოების ტრანსპორტისა და ინფრასტრუქტურის სამინისტროების (ასეთი საერთოდ არ არსებობს საქართველოში), საერთაშორისო ორგანიზაციების დასკვნების საფუძველზე:
- მუნიციპალიტეტებში გაზარდეთ ავტობუსების რაოდენობა მინიმუმ ორჯერ. რაოდენობის გასაზრდელად გამოიყენეთ საქალაქთაშორისო ავტობუსები, აგრეთვე ტურისტულ კომპანიებზე რიცხული სატრანსპორტო საშუალებები. ორივე ეს მიმართულება დღეს გაჩერებულია გაურკვეველი ვადით, ავტოტრანსპორტი თავისუფალი, ხოლო პერსონალი დაუსაქმებელი;
- ამ გზით შემცირდება ლოდინის დრო, აგრეთვე, საზ-ტრანსპორტში შემცირდება მგზავრებს შორის სიმჭიდროვე; მაგალითად, დედაქალაქში ავტობუსების რაოდენობა გაზარდეთ 1 500-მდე, საქალაქთაშორისო ტრანსპორტის ხარჯზე; საზ-ტრანსპორტი მგზავრებით უნდა დაიტვირთოს მხოლოდ 50 %-ით;
- ავტობუსებში, მიკროავტობუსებსა და ტაქსიშიც დაამონტაჟეთ მძღოლის სივრცის მგზავრებისგან გამოსაყოფი დამცავი. უზრუნველყავით მძღოლები ყველა საჭირო დამცავი საშუალებით;
- ჩამოაყალიბეთ დროებითი სამსახური: „მგზავრის დამხმარე პერსონალი“, რომლის მთავარი ფუნქციაა, მგზავრებს ადგილზე მიაწოდოს რეკომენდაციები, გააცნოს საგანგებო წესები და მიუთითოს წესების დაცვისკენ. ჩვენ შემთხვევაში, ასეთი ფუნქცია გადამზადების შემდეგ შეიძლება შეასრულონ „კონტროლიორებმა“;
- დააწესეთ ყოველდღიური კონტროლი მძღოლების ჯანმრთელობაზე;
- განალაგეთ სპეციალური ნიშნულები და დისტანციის მიმთითებელი ნიშნები ყველა სატრანსპორტო საშუალებაში, ავტობუსში, მიკროავტობუსში, ავტოსადგურში, გაჩერებაზე, მეტროს მოსაცდელ სადგურსა თუ მატარებლის ვაგონში;
- მონიშნეთ დასაჯდომი ადგილები, რათა მგზავრებმა დაიცვან მოთხოვნილი მანძილი. შეამოწმეთ ნიშნულები ყოველდღიურად, რომ მისი დაზიანების ან მოძრობის შემთხვევაში დროულად შეცვალოთ ახლით;
- მგზავრები ავტობუსში ჩასხდომა/გადმოსხდომისას სარგებლობენ სხვადასხვა კარით;
- საზ-ტრანსპორტში დაამონტაჟეთ მოწყობილობა (სანიტაიზერი) ხელის დასამუშავებელი სპირტის შემცველი ხსნარის მისაღებად;
- ჩაატარეთ სადეზინფექციო სამუშაოები ყოველდღიურად ავტობუსების გაჩერებებზე, ავტოსადგურებში, მეტროსადგურებში და თავად სატრანსპორტო საშუალებებში. აგრეთვე მეტროსა და მატარებლების ვაგონები დაამუშავეთ შესაბამისი ხსნარით;