"საშინელება ხდება... გადამწვარია სახლები, ჯერჯერობით ცეცხლი ჩვენამდე ვერ აღწევს" - რას ჰყვება ქართველი, რომელიც მასშტაბური ხანძრის კერიდან რამდენიმე კილომეტრში იმყოფება
ლოს-ანჯელესში მძვინვარე ტყის ხანძარს სულ მცირე ხუთი ადამიანი ემსხვერპლა. ხანძრის გამო ასობით სახლი და სხვა ნაგებობა განადგურდა.
ხანძრის ჩაქრობის ოპერაციებს ძლიერი ქარი აფერხებს. ოფიციალური პირების თქმით, ლოს-ანჯელესში ხანძრის 5 სხვადასხვა კერაა და ამ დროისთვის ყველა მათგანი 0%-ითაა შეკავებული.
ლოს-ანჯელესის სახანძრო სამსახურის ხელმძღვანელის, კრისტინ კროულის განცხადებით, მეხანძრეებს პრობლემები აქვთ წყლის წნევასთან დაკავშირებით. AccuWeather-ის შეფასებით, სტიქიისგან მიყენებული ზიანი და ეკონომიკური ზარალი 50 მილიარდ დოლარს აჭარბებს.
შორენა ქებურია, რომელიც ჰოლივუდში (ლოს-ანჯელესის უბანი (კალიფორნია, აშშ) მეუღლესთან ცხოვრობს სოციალურ ქსელში წერს:
"გამანადგურებელი ხანძარია ლოს ანჯელესის რამდენიმე ოლქში ერთდროულად. ჩვენთან მშვიდობაა, ცეცხლი ვერ მოაღწევს ჩვენამდე. ხანძარმა სამწუხაროდ სერიოზული ზიანი მიაყენა რამდენიმე ოლქს, გადაწვა სახლები და სხვა და სხვა დაწესებულებები, გაუჩერებლად ხდება ხალხის ევაკუაცია, ძლიერი ქარის გამო ჩნდება ახალ-ახალი კერა, საშინელება ხდება".
ქართველის ინფორმაციით, მათგან 15 კილომეტრის დაშორებითაა მდიდრული ვილები, რომელიც ცნობილ ადამიანებს ეკუთვნით და რომელიც ხანძარმა გაანადგურა:
- ძირითადად მათი სახლები დაიწვა. ჰოლივუდ ჰილსის ხანძარი ჩვენგან 5 კილომეტრის დაშორებითაა, დაახლოებით.
- თქვენთან ევაკუაცია გამოცხადდა?
- ჩვენთან ჯერ არა, არ საჭიროებს, მაგრამ ჰოლივუდ ჰილსის მიმდებარე ტერიტორიაზე გამოცხადდა. ჩემი მეუღლის თანამშრომელი ცხოვრობს ჰოლივუდ ჰილსში და გააფრთხილეს უკვე.
ჩვენთან ყველაფერი კარგადაა, სიმშვიდეა ამ მხრივ, მაგრამ ადამიანები ძალიან ღელავენ. გუშინ მთელი დღე ძალიან ძლიერი ქარი იყო, ხეებიც კი მოგლიჯა და ამან კიდევ უფრო გააძლიერა ხანძარი, დღეს კიდევ ახალი კერებიც გაჩნდა. დღეს ქარმა დაიკლო, ოღონდ სულ არ ჩამდგარა. ამ საღამოს რა იქნება კი არ ვიცი, ვარაუდობენ ქარის გაძლიერებას.
- ოჯახი არ აპირებთ სადმე გადასვლას?
- არა არ ვაპირებთ, აქ საფრთხე არ არის ჯერ და თუ ვითარება შეიცვლება, რა თქმა უნდა გადავალთ.
- თქვენთან ყველა დაწესებულება ჩვეულისამებრ ფუნქციონირებს?
- დიახ, ჩვეულებრივად, ჩემი მეუღლეც მუშაობს, მაგრამ იქ, ხანძრის ახლომდებარე ტერიტორიაზე არა, რა თქმა უნდა.
- სად მოღვაწეობთ თქვენ და თქვენი მეუღლე?
- ჩემი მეუღლე ლოს ანჯელესში სწავლობდა, ცხოვრობს და მუშაობს 2019 წლიდან, ხმის ინჟინერია და სტუდიაშია, მუსიკებს ქმნის. მე 10 დღეა, რაც ამერიკაში ჩამოვედი...
წაიკითხეთ ასევე: