მსოფლიოს ქალი ლიდერები, რომლებიც კორონავირუსის პანდემიას წარმატებით ებრძვიან

კორონავირუსის პანდემიამ ყველაზე უკეთ აჩვენა მმართველ პოზიციაზე ქალის როლის მნიშვნელობა და დაანახა მსოფლიოს, რომ ქალები ყველაზე რთული ვითარების დროს სწორ, თანმიმდევრულ ნაბიჯებს დგამენ, რომელიც გამოწვევის დაძლევის წინაპირობაა.

მსოფლიოს ქალი ლიდერები დღეს სხვადასხვა გავლენიანი გამოცემების, ექსპერტების განხილვის საგანია, ხოლო მათ მიერ მიღებული გადაწყვეტილებები დანარჩენი ლიდერებისთვის სამაგალითო. ქალი ლიდერების მიერ მიღებული გადაწყვეტილებების მართებულობას მსოფლიო აღიარებს.

• ანგელა მერკელი - გერმანიის კანცლერი

თანამედროვე მსოფლიოს ძლიერ ქალ ლიდერზე საუბრისას, პირველ რიგში, ალბათ, ყველას გერმანიის კანცლერი, ანგელა მერკელი ახსენდება.

სწორედ მან მიიღო COVID-19-ის გამოსავლენი ტესტირების მასშტაბურად ჩატარების გადაწყვეტილება, სწორედ ამით აიხსნება, რომ გერმანიაში გარდაცვლილთა რაოდენობა სხვა ქვეყნებთან შედარებით მნიშვნელოვნად მცირეა. ქვეყანაში 173 273 ინფიცირებულიდან 7 754 ადამიანია გარდაცვლილი.

ტესტირების საშუალებით ადრეულ ეტაპზევე გამოვლინდა კორონავირუსის შემთხვევები. როცა ვირუსი საწყის სტადიაზევე ვლინდება, მასთან გამკლავება გაცილებით მარტივია. მერკელი უსმენს მეცნიერებს და გადაწყვეტილების მიღების დროს პროფესიონალთა რჩევებს ითვალისწინებს.

• ცაი-ინ ვენი - ტაივანის პრეზიდენტი

კიდევ ერთი ქალი ლიდერი, რომელმაც პანდემიის დროს მართვის განსაკუთრებული უნარები გამოავლინა და სწრაფი რეაგირების შედეგად ვირუსის გავრცელება ქვეყანას თავიდან აარიდა, ტაივანის პრეზიდენტი, ცაი-ინ ვენია.

მან მიიღო მყისიერი გადაწყვეტილებები ჯერ კიდევ იანვარში, როცა ვირუსი არ იყო ასე გავრცელებული. ცაი-ინ ვენმა ვირუსის გავრცელების თავიდან არიდების მიზნით იანვარშივე 124 შეზღუდვა დააწესა. შედეგად, ტაივანში COVID-19-ის მხოლოდ 440 დადასტურებული შემთხვევაა აღწერილი. 7 პაციენტი გარდაიცვალა, ხოლო 375 გამოჯანმრთელდა.

• ჯასინდა არდერნი - ახალი ზელანდიის პრემიერ-მინისტრი

თანამედროვე მსოფლიოს ლიდერებს შორის ჯასინდა არდერნს განსაკუთრებული ადგილი უჭირავს. ის ცნობილია სახელმწიფოს მართვის განსხვავებული მიდგომებით. გამოირჩევა ადამიანებთან უშუალო კომუნიკაციის უნარით. არდერნს თანამედროვე მსოფლიოში ერთ-ერთ ყველაზე ძლიერ ლიდერად მიიჩევენ.

კორონავირუსის პანდემიის დასაწყისში მისი გადაწყვეტილებები ემყარებოდა მეცნიერულ ფაქტებს, პროფესიონალებთან, სამეცნიერო წრეებთან მუდმივ კომუნიკაციას. ამასთან, არდერნი საზოგადოებას თავადვე აწვდიდა ინფორმაციას შექმნილი ვითარების შესახებ და მოქალაქეებს "ფეისბუქ ლაივის“ საშუალებით ესაუბრებოდა. მან საზოგადოებას თანაგრძნობა და სალიდარობა აჩვენა. არდერნმა და მისმა მინისტრთა კაბინეტმა პანდემიის გამო, 6 თვის განმავლობაში, ხელფასის 20%-ზე თქვა უარი.

დღეს ახალი ზელანდია უკვე ითვლება ვირუსთან ბრძოლის თვალსაზრისით ერთ-ერთ ყველაზე წარმატებულ ქვეყანად. ამ დროისთვის ახალ ზელანდიაში COVID-19-ის 1 497 შემთხვევაა გამოვლენილი, მათ შორის 21 გარდაიცვალა, ხოლო 1 402 გამოჯანმრთელდა. პრემიერმა 27 აპრილს განაცხადა, რომ ახალმა ზელანდიამ კორონავირუსი დაამარცხა. "ჩვენ ეს ბრძოლა მოვიგეთ“, - თქვა არდერნმა.

• სკანდინავიის ქვეყნები

სკანდინავიის 5 ქვეყნიდან 4-ს ქალი ლიდერი ჰყავს და ოთხივე მათგანში კორონავირუსით გარდაცვლილთა რაოდენობა სხვა ევროპულ ქვეყნებთან შედარებით ნაკლებია.

ფინეთის პრემიერ-მინისტრის, სანა მარინის გადაწყვეტილებებს მოსახლეობის უმრავლესობა ნდობას უცხადებს. აღსანიშნავია, რომ სანა მარინი 34 წლისაა და ის ამ ეტაპზე მსოფლიოში ყველაზე ახალგაზრდა ლიდერია. ფინეთში 6003 ინფიცირებულიდან 275 გარდაიცვალა, ხოლო 4 300 გამოჯანმრთელდა.

ისლანდიის პრემიერ-მინისტრ კატრინ იაკობსდოთირის გადაწყვეტილებით, კორონავირუსის პანდემიის პირველ ეტაპზევე დაიწყო მოსახლეობის აგრესიული ტესტირება და ყველა ის ადამიანი, რომელიც საეჭვოდ მიიჩნეოდა, კარანტინში გადაიყვანეს. აღსანიშნავია, რომ ისლანდია პატარა ქვეყანაა, სადაც დაახლოებით, 360 ათასი ადამიანი ცხოვრობს. ბოლო ინფორმაციით COVID-19-ით 1 801 ადამიანი დაინფიცირდა მათ შორის 10 გარდაიცვალა, ხოლო 1776 გამოჯანმრთელდა. ამ დროისთვის ქვეყანაში მხოლოდ 15 აქტიური შემთხვევაა აღრიცხული.

წარმატებულად გაუმკლავდა ვითარებას ნორვეგიის პრემიერ-მინისტრი ემა სოლბერგიც. ის საზოგადოებისადმი განსაკუთრებული თანაგრძნობის უნარით გამოირჩევა. ემა ტელევიზიის საშუალებით ხშირად ესაუბრება ბავშვებს და მათ კითხვებს პასუხობს, უსმენს მათ შიშებს და ამშვიდებს, ეუბნება, რომ არ შეეშინდეთ და რომ ყველაფერი კარგად იქნება.

ასეთი დამოკიდებულება აქვს ემას დანიელ კოლეგას, ემა ფრედერიკსენსაც. ის პრესკონფერენციების დასრულების შემდეგ ბავშვებს ესაუბრება ტელევიზიით და მათ ამხნევებს.

გარდა ამისა, ორივე მათგანმა სწრაფად მიიღო გადაწყვეტილებები COVID-19-ის გავრცელების თავიდან არიდების მიზნით. ნორვეგიაში ამ დროისთვის 8 157 ადამიანი დაინფიცირდა, ხოლო დანიაში - 10 591.