ორ თვეში ირანში ალკოჰოლით ასობით ადამიანი გარდაიცვალა - ისინი სასმელს კორონავირუსისგან განკურნების მიზნით იღებდნენ

ირანში 20 თებერვლიდან 7 აპრილამდე პერიოდში, ალკოჰოლით ინტოქსიკაციის შედეგად, ასობით ადამიანი გარდაიცვალა. ამის შესახებ გამოცემა "ბიზნეს ინსაიდერი" წერს.

აღსანიშნავია, რომ ბევრია მეთანოლის შემცველი ალკოჰოლით მოწამვლისა და გარდაცვალების შემთხვევებიც. საქმე ისაა, რომ ქვეყანაში გავრცელდა ყალბი ინფორმაცია ალკოჰოლის და მათ შორის, მეთანოლის სპირტის კორონავირუსის საწინააღმდეგო თვისებების შესახებ.

სწორედ COVID-19-სგან თავდაცვის მიზნით მიღებული ჭარბი ალკოჰოლის, ან მეთანოლის შემცველი ალკოჰოლის მიღების გამო 20 თებერვლიდან 7 აპრილამდე, 728 ირანელი გარდაიცვალა.

უმეტეს შემთხვევაში გარდაცვალების მიზეზი მეთანოლის სპირტის მიღებაა.

ირანის ჯანდაცვის მინისტრის საზოგადოებასთან ურთიერთობის სამსახურის წარმომადგენელი კიანუშ ჯაჰანპური "ესოშიეითიდ პრესთან" ამბობს, რომ ხშირია მეთანოლის გამო სხეულის დაზიანების, დაბრმავების შემთხვევებიც. მისი ინფორმაციით, საერთო ჯამში, ბოლო ორ თვეში ალკოჰოლით ინტოქსიკაცია 5 000-ზე მეტმა ადამიანმა მიიღო.

აღსანიშნავია, რომ 2019 წელს ალკოჰოლით ინტოქსიკაციის გამო ირანში 66 ადამიანია ადამიანი გარდაიცვალა.

კორონავირუსის ახალი შტამით COVID-19-ით ქვეყანაში 5 877 ადამიანია გარდაცვლილი. ინფიცირებულთა რაოდენობა კი 92 584 შეადგენს.