7
მაისიდღის ზოგადი ასტროლოგიური პროგნოზი
Covid-19-ის პანდემიას სახელმწიფო სტრუქტურებთან ერთად საქართველოში საერთაშორისო ჰუმანიტარული ორგანიზაცია "წითელი ჯვარიც" ებრძვის. ორგანიზაცია ქვეყნის მასშტაბით მცხოვრებ 15 000-მდე მარტოხელა, ხანდაზმულ პირს უწევს დახმარებას.
კონკრეტულად რას მოიცავს "წითელი ჯვრის" ჰუმანიტარული საქმიანობა პანდემიის პირობებში და როგორ ეხმარება მოსახლეობას - ამ საკითხზე სასაუბროდ AMBEBI.GE საქართველოს წითელი ჯვრის საზოგადოების პრეზიდენტს ნათია ლოლაძეს დაუკავშირდა:
- როგორ არის ჩართული "წითელი ჯვარი" საქართველოში პანდემიის წინააღმდეგ ბრძოლაში?
- "წითელი ჯვარი" არის ერთ-ერთი ფრონტის ხაზზე მდგომთაგანი მთელს მსოფლიოში. აღსანიშნავია, რომ ჩვენ, საქართველოს "წითელმა ჯვარმა", როგორც კი ვირუსი გავრცელდა ჩინეთში და შემდეგ ევროპაშიც, მაშინვე დავიჭირეთ თადარიგი. დავიწყეთ ორგანიზაციის საქმიანობაზე დაკვირვება და შესწავლა სხვა ქვეყნების მაგალითზე.
პირველი, რაც გავაკეთეთ, ავიღეთ ჯანმოს რეკომენდაციები და დავიწყეთ ჩვენი ორგანიზაციის შიგნით სწავლება-გადამზადება. მოგეხსენებათ, ჩვენ ისედაც მუდმივად ვამზადებთ მოხალისეებს საგანგებო მდგომარეობებისთვის. თუმცა ეს შემთხვევა იყო სრულიად უცნობი და ცხადია, მზად არ ვიყავით. დატრენინგება იანვრის დასაწყისიდან დავიწყეთ, თებერვლის დასაწყისში უკვე ჩვენი 39-ვე ფილიალი ჩართული გვყავდა. ჩამოვიყვანეთ თითოეული ფილიალის წარმომადგენელი, მენეჯმენტი, მოხალისეები და გადავამზადეთ, ხოლო მათ თავის მხრივ დაატრენინგეს თანამშრომლები.
გავავრცელეთ საინფორმაციო მასალა COVID-19 ის შესახებ ქართულ, ინგლისურ, სომხურ, აზერბაიჯანულ ენებზე. საქართველოს მოსახლეობის საკმაოდ დიდმა ნაწილმა, მილიონ ნახევარზე მეტმა, ეს ინფორმაცია ჩვენგან მიიღო. ჩვენი მოხალისეები გავიდნენ ასევე აეროპორტში და თერმოსტრინგზე პერსონალს ეხმარებოდნენ.
- კონკრეტულად, რას მოიცავს ორგანიზაციის ჰუმანიტარული საქმიანობა პანდემიის ფარგლებში, როგორ ეხმარებით საქართველოს მოსახლეობას?
- "წითელი ჯვარი" პირველ რიგში აწარმოებს საინფორმაციო კამპანიებს ცნობიერების ამაღლების კუთხით. ჩვენი მოხალისეები კარანტინში მყოფებისთვისაც ატარებენ საინფორმაციო კამპანიებს. ეს დისტანციურად ხდება, რეკავენ დღეში მინიმუმ ორჯერ და პასუხს სცემენ ყველა შეკითხვაზე. ასევე, დაავადებათა კონტროლის ეროვნული ცენტრისა და ლუგარის ლაბორატორიის მიერ მოწოდებულ სიებზე დაყრდნობით, ჩვენი მოხალისეები მიდიან კონკრეტულ მისამართებზე და პირველადი დახმარების პროდუქტებს აწვდიან თვითიზოლაციაში მყოფებს - მათ, ვისაც ეს სჭირდება. კვირაში რამდენჯერმე მიაქვთ სურსათი, ჰიგიენური საშუალებები და ბავშვებისთვის საჭირო ნივთები. არ არის აუცილებელი ოჯახი იყოს სოციალურად დაუცველი, თუ თვითიზოლაციაში არიან და ვერ გამოდიან სახლიდან, ჩვენი მოხალისეები სპეციალური აღჭურვილობით მიდიან მათთან და ეხმარებიან .
გავაფორმეთ მემორანდუმი თბილისის მერიასთან და პროდუქტები უკვე გამგეობებთან ერთად მიგვაქვს ბინაზე 70 წელს გადაცილებულ და მარტოხელა მოხუცებთან. ძალიან კარგი შედეგი გვაქვს, ყველა ფილიალი ამ სისტემაში ჩართულია. შემოდის შემოწირულობა და ამის გადანაწილება ხდება. შემოწირულობებისთვის არის გამოყოფილი სპეციალური ადგილი, რომელსაც მერია უწევს ზედამხედველობას, ბიზნესის წარმომადგენლებმა იციან ამის შესახებ და ისინი იმ პროდუქტებით გვეხმარებიან, რაც ჩვენს პაკეტშია გაწერილი. ეს იძლევა იმის საშუალებას, რომ ხანდაზმული ადამიანები არ გამოვიდნენ გარეთ. ჩვენ ვხედავთ, რომ ეს გამოწვევა ჯანდაცვის სფეროს გამოწვევაა, მაგრამ ძალიან ურტყამს სოციალურ სფეროსაც, ანუ სოციალური გამოწვევაა. მთელი მსოფლიოს მასშტაბით არსებობს ეს გამოწვევა.
ასევე ძალიან მნიშვნელოვანია, რომ ჩვენთან მოქმედებს ცხელი ხაზი, საიდანაც პირებს შეუძლიათ მიიღონ ფსიქოლოგიური დახმარება, სტრესის მართვის კუთხით რჩევები და რეკომენდაციები. შევქმენით ერთიანი ფსიქო-სოციალური პლატფორმა და ქვეყანაში მყოფ ფსიქოლოგებს მოვუწოდებთ, ჩაერთონ ამ ცხელ ხაზში, მათაც ჰქონდეთ ტელეფონი და სახლიდან გაუწიონ მომსახურება ბენეფიციარებს, რადგან იმდენად დიდია მოთხოვნა, მხოლოდ ჩვენი ფსიქოლოგები ამას ვერ წვდებიან.
ვიცოდით, რომ აუცილებლად გაჩნდებოდა სპონტანური მოხალისეების საჭიროება და აქტიურად დავიწყეთ ამ მხრივაც მუშაობა. გაჩნდა მოხალისეობის ინიციატივები, დავიწყეთ ინტენსიური ტრენინგები არამხოლოდ მათთვის, არამედ სახელმწიფო სტრუქტურების წარმომადგენელთათვისაც.
- როგორ ერთვებიან თქვენს პროგრამაში მოხალისეები და რა კრიტერიუმები არსებობს ამისთვის?
- ძალიან ბევრია სპონტანური მოხალისეობის მსურველი. ამისთვის ჩვენ გავაკეთეთ სპეციალური პლატფორმა. "ომედია ჯგუფმა" უსასყიდლოდ შეგვიქმნა იგი. ყველას შეუძლია დარეგისტრირდეს სპეციალურ ბმულზე, გაიარონ ტესტირება და შემდეგ ჩვენი წარმომადგენელი უკავშირდება მათ და განსაზღვრავს სად გვჭირდება დახმარება, სუპერმარკეტებში, საკვების ადგილზე მიტანაში თუ - სად. განაწილება ხდება მოხალისის საცხოვრებელი უბნის გათვალისწინებით. რაც მთავარია, აქვე უნდა აღვნიშნო, რომ მათ უტარდებათ შესაბამისი ტრენინგები ყველა საჭირო უნარ-ჩვევის შესასწავლად. ჩვენც ვუერთდებით მოწოდებას - დარჩი სახლში და მხოლოდ აუცილებლობის შემთხვევაში ვრთავთ მოხალისეებს.
- როგორია თქვენი სამომავლო გეგმები პანდემიასთან ბრძოლის ფარგლებში?
- ჩვენ ვემზადებით იმისთვის, რომ თუ გაჩნდა ქვეყანაში საჭიროება, ჩვენ ჩავერთვებით სწრაფ ტესტებში და საერთაშორისო გამოცდილებაზე დაყრდნობით ჩვენც გავაკეთებთ სწრაფ ტესტებს. შეგვიძლია გავტესტოთ სამედიცინო პერსონალი, ჯანდაცვის წარმომადგენლები და ის ადამიანები, რომლებიც წინა ხაზზე იბრძვიან.
