როდის უნდა დალიოთ წნევის წამალი, რომ ინსულტის და გულის შეტევის რისკი შეამციროთ

იმისთვის, რომ წნევის წამალმა მაქსიმალური სარგებელი მოგიტანოთ, ის ძილის წინ უნდა მიიღოთ - გვირჩევენ ესპანელი მეცნიერები. როგორც სპეციალისტები წერენ ამ, ერთი შეხედვით, უბრალო რჩევას, სიცოცხლის გადარჩენა შეუძლია.

კვლევაში, რომელიც სამეცნიერო ჟურნალ European Heart Journal-ში გამოქვეყნდა, ნათქვამია, რომ ძილის წინ მიღებული მედიკამენტები პაციენტს მეტად იცავს ინსულტისა და გულის შეტევისგან.

ექსპერტები მივიდნენ დასკვნამდე, რომ მედიკამენტის ადამიანის რეაგირებაზე გავლენას ბიოლოგიური საათი და ჩვენი ორგანიზმის ბუნებრივი რიტმი ახდენს.

მკვლევარები პოულობენ სულ უფრო მეტ მტკიცებულებას იმის შესახებ, რომ ბევრი მედიკამენტი, მათ შორის, გულისთვის განკუთვნილი წამლები, უკეთ მოქმედებენ, თუ მათ დღის კონკრეტულ მონაკვეთში მივიღებთ.

კვლევა, რომელიც სამეცნიერო ჟურნალ European Heart Journal-ში გამოქვეყნდა, მასშტაბურია და მასში მონაწილეობას 19 ათასი ადამიანი იღებდა, რომელიც წნევის წამალს პერმანენტულად მოიხმარს.

მონაწილეები შემთხვევითობის პრინციპით ორ ჯგუფად დაყვეს: ერთი ჯგუფი მედიკამენტს დილით იღებდა, მეორე კი - ძილის წინ. მკვლევარები მათ მდგომარეობას 5 და მეტი წლის განმავლობაში აკვირდებოდნენ.

საბოლოო ჯამში, ისინი მივიდნენ დასკვნამდე, რომ კვლევის იმ მონაწილეების შემთხვევაში, რომლებიც წნევის წამალს საღამოს იღებდნენ, გულის შეტევით, ინსულტითა და გულის უკმარისობით გამოწვეული გარდაცვალების რისკი, ორჯერ იყო შემცირებული.

"სისხლის წნევა ღამე უნდა მცირდებოდეს, როცა გვძინავს და ჩვენი ორგანიზმი ისვენებს. თუ ეს არ ხდება და წნევა მაღალი რჩება, გულის შეტევისა და ინსულტის შანსი იზრდება“ - განმარტავენ ექსპერტები.

კვლევის თანახმად, წამლის საღამოს საათებში მიღება არტერიული წნევის კონტროლს უზრუნველყოფს. იმ მონაწილეების სისხლის წნევის საშუალო დონე, რომლებიც წამალს საღამოს სვამდნენ, მნიშვნელოვნად დაბალი იყო, როგორც დღის ისე ღამის საათებში.

ესპანეთის უნივერსიტეტის, ვიგოს, წამყვანმა მკვლევარმა რამონ ჰერმიდამ განმარტა, რომ კვლევის შედეგებს მნიშვნელოვანი ყურადღება უნდა მიაქციონ მკურნალმა ექიმებმა და საკუთარ პაციენტებს წნევის წამლის საღამოს მიღება ურჩიონ.

"ექიმების ყველაზე გავრცელებული რეკომენდაციაა, რომ მედიკამენტი დილით, საუზმის დროს მიიღონ, მაგრამ ეს რჩევა მცდარ თეორიას ემყარება, რომლის მიხედვითაც, არტერიული წნევის დილის მაჩვენებელი ქვემოთ ჩამოდის“ - ამბობს პროფესორი.

თუმცა, გულის ჯანმრთელობის ბრიტანული ფონდის წარმომადგენელი ვანესა სმიტი პაციენტებს ურჩევს, რომ წნევის წამლის მიღების დროის შეცვლამდე, კონსულტაცია მკურნალ ექიმთან გაიარონ, რადგან შესაძლოა, არსებობდეს რაიმე კონკრეტული მიზეზები, რის გამოც ექიმმა პაციენტს მედიკამენტის მიღება დღისით დაუნიშნა და არა ღამით.

აქვე აღსანიშნავია, რომ სისხლის წნევაზე გავლენას ადამიანის ცხოვრების წესიც ახდენს. ნეგატიურად მასზე შეიძლება იმოქმედოს შემდეგმა ფაქტორებმა: ალკოჰოლის გადაჭარბებულმა მოხმარებამ; მოწევამ; ჭარბმა წონამ; უმოძრაობამ; მარილის გადაჭარბებულმა მოხმარებამ...