აქციის დარბევის დროს მძიმედ დაშავებული და­ვით ფა­რა­დაშ­ვი­ლი კომიდან გამოვიდა

31 წლის ფლორისტი დავით ფარადაშვილი კომიდან გამოვიდა. ამის შესახებ AMBEBI.GE-ს პაციენტის დამ, თამარ ფარადაშვილმა განუცხადა.

"კომიდან გამოვიდა, დღეს გააღვიძეს" - აღნიშნა თამარ ფარადაშვილმა, რომელიც ჩვენთან საუბარში მოკლე კომენტარით შემოიფარგლა.

დავით ფარადაშვილი აქციის დარბევის ღამეს უმძიმესი დაზიანებებით შეიყვანეს კლინიკაში და ამ დრომდე მართვით სუნთქვაზე იმყოფებოდა. ახალგაზრდა მამაკაცს პლასტმას-კაუჩუკის ტყვია საფეთქელთან მოხვდა, რამაც თავის ტვინის მძიმე დაზიანება გამოიწვია.

დავით ფარადაშვილი რეგიონულ ჰოსპიტალშია მოთავსებული, მას რამდენიმე ოპერაცია ჩაუტარდა. ოპერაციაში მონაწილეობა მიიღეს ისრაელიდან და თურქეთიდან ჩამოსულმა ექიმებმა.

"შუბლში აქვს ნასროლი, საფეთქელის ზემოთ, რამაც დაუმსხვრია ძვლები, გამოიწვია ტვინზე სისხლჩაქცევები და უმძიმესი მდგომარეობა. ჯანდაცვის სამინისტროს ინიციატივით ჩამოყავთ უცხოეთიდან ექიმები, შეიკრიბება კონსილიუმი და გადაწყდება, აქ ჩაუტარებენ ოპერაციას თუ გადაიყვანენ საზღვარგარეთ. უკვე ჩამოსული არიან თურქი სპეციალისტები, ველოდებით ექიმებს ისრაელიდან და დღეს გადაწყდება, რა იქნება", - ამის შესახებ თამარ ფარადაშვილმა AMBEBI.GE-სთან საუბარში რამდენიმე დღის წინ განაცხადა.

იმის გასარკვევად, თუ რა მდგომარეობაში არიან 20 ივნისის აქციის დარბევის ღამეს დაშავებულები, AMBEBI.GE რეგიონულ ჰოსპიტალს დაუკავშირდა. იქ ამჟამად 3 პაციენტი იმყოფება. ჩვენი ინფორმაციით, ფარადაშვილის გარდა კლინიკაში 23 და 46 წლის პაციენტები რჩებიან. მათგან ყველაზე მძიმედ ასაკოვანი მამაკაცია.

"ახალგაზრდა მამაკაცი, რომელსაც აღენიშნებოდა თავის ტრავმა, ამ ეტაპზე მართვით სუნთქვაზეა, მაგრამ კვირა დღის შემდეგ დადებითი დინამიკაა მასთან მიმართებაში და ფილტვების ხელოვნური ვენტილაციის მოხსნის პროცესშია.

სტაბილურად მძიმე მდგომარეობაშია 46 წლის მამაკაცი - არც გაუარესებისკენ არ აქვს დინამიკა, თუმცა ჯერჯერობით გაუმჯობესებისკენაც არ არის“ - უთხრა AMBEBI.GE-ს ევექსის რეგიონული ჰოსპიტალის დირექტორმა.