24
მარტიდღის ზოგადი ასტროლოგიური პროგნოზი
საქართველოში საბავშვო ლიტერატურა სხვა კატეგორიის წიგნებთან შედარებით ყველაზე პოპულარულია. წიგნის მაღაზიებში საკმაოდ დიდი სივრცე ეთმობა საბავშვო წიგნებს, რომელთან ნაწილი თარგმნია, ნაწილი კი - ქართველი ავტორების მიერ დაწერილი. ეტაპობრივად იზრდება ქართული საბავშვო ლიტერატურის პოპულარობაც.
აღნიშნულს პროცესებს ხელს უწყობენ გამომცემლობები, რომლებიც აქტიურად ბეჭდავენ ქართველ ავტორებს. გასულ წელს დაარსდა იაკობ გოგებაშვილის სახელობის საბავშვო და საყმაწვილო ლიტერატურული პრემიაც, რომლის მიზანიც საბავშვო და საყმაწვილო მწერლობის პოპულარიზაცია და გამომცემლების წახალისებაა. რამდენიმე დღის წინ პრემია მეორედ გაიცა. კონკურსში მონაწილეობის უფლება ჰქონდა 2017 წელს საქართველოში გამოცემულ წიგნებს, პიესებს და ინოვაციურ საბავშვო პროექტებს.
თამრი ფხაკაძე ის მწერალია, რომლის წიგნებიც გამორჩეულად მოსწონთ ქართველ ბავშვებს. გასული წლის მსგავსად, ის წელსაც პრემიის ლაურეატი გახდა. ამჯერად თამრი ფხაკაძის წიგნმა "კიკის თავგადასავალი“ საუკეთესი პროზაული წიგნის კატეგორიაში გაიმარჯვა.
"წიგნი წლების წინ დაიწერა, მაგრამ მაშინ გამოცემა ვერ მოვახერხე. 2017 წელს კი გამომცემლობა "პალიტრა L-მა" სერია "მოსწავლის არჩევანის" ფარგლებში გამოსცა. ეს სერიული ზღაპარია, წიგნს ერთიანი სიუჟეტი არ აქვს. კიკის ამბები ძალიან მოსწონთ მულტიპლიკატორებს და მისი პატარა სერიულ მულტფილმებად ქცევაც უნდათ. თითო თავი არის ბავშვისთვის თითო ზნეობრივი გაკვეთილი გადმოცემული საბავშვო სახალისო ენით. ისტორიები აღმზრდელობითია, მაგრამ ამბავი იმდენად ზღაპრულად და მხიარულად ვითარდება, რომ ამას ბავშვი ვერ გრძნობს," - განმარტავს თამრი ფხაკაძე.
როგორც ავტორი აღნიშნავს, მან უკვე მეორედ მიიღო გოგებაშვილის პრემია, რაც საკმაოდ დიდი სტიმულია.
"საბავშვო მწერლისთვის პრემია დიდი მოტივატორია. ის ხელს უწყობს, რომ მეტი საბავშვო წიგნი დაიწეროს. მწერლების გააქტიურების საკმაოდ კარგი მექანიზმია" - დაამატა თამრი ფხაკაძემ.
ნათია ჯანაშიას ლექსების კრებულმა "ენოტის რემონტი" საუკეთესო პოეტური წიგნის კატეგორიაში გაიმარჯვა. წიგნში, ავტორის რჩეული 45-მდე ლექსია შესული.
"ამ წიგნში თავმოყრილია ლექსები, რომლებიც უკანასკნელი 10 წლის მანძილზე დავწერე. 15 წიგნი მაქვს გამოცემული და მათ შორის "ენოტის რემონტს" განსაკუთრებული ადგილი უკავია რამდენიმე მიზეზის გამო. პირველ რიგში, მასში რჩეული ლექსებია შესული. მხატვრობა არის ძალიან კარგი, რომელიც ნანა მელქაძეს ეკუთვნის. გამომცემლობა "პალიტრა L-მა" კი ის საუკეთესო ხარისხით გამოსცა. რაც შეეხება თავად კონკურსს, ის ბევრი საბავშვო ავტორის ახდენილი ოცნებაა" - აღნიშნავს ნათია ჯანაშია.
გამარჯვებულებიდან ასევე აღსანიშნავია, რომ საბავშვო ლიტერატურაში გაწეული ღვაწლისთვის პრემია გადაეცა გურამ პეტრიაშვილს, რომლის წიგნიც "პატარა ქალაქის ზღაპრები" გამომცემლობა პალიტრა L-ის ბესტსელერია.
საუკეთესო პოეტური წიგნი - ნათია ჯანაშია "ენოტის რემონტი" , პალიტრა L
საუკეთესო პროზაული წიგნი
ა) ყველაზე პატარებისთვის, 3 – 6 წელი - თამრი ფხაკაძე "კიკის თავგადასავალი", პალიტრა L
ბ) პატარებისთვის, 7 – 12 წელი - დიანა ანფიმიადი "სახატავ რვეულში ჩაწერილი ზღაპრები", "არტანუჯი"
გ) ყმაწვილებისთვის, 13 + - ნატო დავითაშვილი "მთვარის შვილობილები", ქარჩხაძის გამომცემლობა
საუკეთესო ილუსტრირებული წიგნი
ა) ყველაზე პატარებისთვის, 3 – 6 წელი - ანა ჯანელიძე „ჰიპა ირჩევს პროფესიას“, ზოლიანი კატა
ბ) პატარებისთვის, 7 – 12 წელი - ლელა ცუცქრიძე „მხიარული ოჯახი და სხვები“ საქართველოს აკადემიური გამომცემლობა
საუკეთესო საბავშვო დრამატურგია - ალექს ჩიღვინაძე "თქვენთანაც აბრახუნებენ?"
საუკეთესო ნათარგმნი საბავშვო/საყმაწვილო წიგნი - თამარ კვიჟინაძე ერნე სვინგენის "ბალადა გატეხილ ცხვირზე"
საბავშვო-საყმაწვილო ინოვაციური პროექტი - ირმა მალაციძე "საბავშვო ლიტერატურა"
საბავშვო ლიტერატურაში გაწეული ღვაწლისთვის პრემია გადაეცა გურამ პეტრიაშვილს, რომლის "პატარა ქალაქის ზღაპრები" გამომცემლობა პალიტრა L-ის ბესტსელერია.
ჟიურის შემადგენლობაში იყვნენ ნატო ინგოროყვა, ზაზა აბზიანიძე, თეა თოფურია, მარიამ წიკლაური და გიორგი კაკაბაძე.
პრემია საქართველოს განათლების, მეცნიერების, კულტურისა და სპორტის სამინისტროს ინიციატივით ტარდება.
