უამინდობის გამო, ბათუმი-ჩაქვის დამაკავშირებელ გზაზე საცობია

ძლიერი წვიმის გამო, ბათუმი - ჩაქვის დამაკავშირებელ გზაზე ავტოსატრანსპორტო მოძრაობა შეფერხებით ხორციელდება. ცენტრალურ საავტომობილო გზაზე წყლის მასა ავტომობილებს გადაადგილებაში ხელს უშლის.

მოძრაობა ასევე შეფერხებულია ბათუმის შესასვლელშიც. როგორც მგზავრები ამბობენ, თითქმის ორი საათია ბათუმის შესასვლელთან უძრავად დგანან ავტომანქანებით და გადაადგილებას ვერ ახერხებენ. ერთ-ერთმა თვითმხილველმა ადგილიდან საცობის ამსახველი ფოტოები გამოუგზავნა AMBEBI.GE-ს.

როგორც AMBEBI.GE-ს საქართველოს შინაგან საქმეთა სამინისტროში განუცხადეს, ცენტრალურ გზაზე მობილიზებულია საპატრულო ეკიპაჟი და ავტომობილების მოძრაობას აწესრიგებს.

გვიან ღამით აჭარაში ძლიერი წვიმის შედეგად მეწყრული პროცესები განვითარდა, ბათუმსა და ქობულეთში კი ქუჩები დაიტბორა.