29
მარტიდღის ზოგადი ასტროლოგიური პროგნოზი
ეჭვი მაქვს, ძალიან ბევრს ეშინია, რომ ეს საქმე გამოვიძიოთ, - ამის შესახებ პარლამენტის თავდაცვისა და უშიშროების კომიტეტის თავმჯდომარემ ირაკლი სესიაშვილმა პირადი ცხოვრების ამსახველი კადრების გავრცელების კომენტირებისას განაცხადა.
როგორც სესიაშვილმა "ინტერპრესნიუსს" განუცხადა, ხელისუფლებისკენ ქვების სროლა, სწორედ ის მიზანია, რაც გუშინდელი კადრების გამავრცელებელს ჰქონდა.
"ნებისმიერს ვისაც ამ ვითარებაში პროტესტი აქვს, ვურჩევ, რომ მისამართი კარგად განსაზღვრონ, ვისთან აქვთ საპროტესტებელი. ყველამ კარგად ვიცით ვისი პოლიტიკური მრწამსი იყო ამ სახით მმართველობა. შანტაჟით, მოსახლეობის ტერორით მართვა ვისი სტილიც იყო, ვინც შეუკვეთა თავის დროზე ასეთი ვიდეო ჩანაწერების გაკეთება, ვინც მოამზადა, შეინახა, გამოიყენა და გაავრცელა - ამ ადამიანებთან მივიდნენ და გააპროტესტონ. თუ ვინმეს უნდა, რომ უბრალოდ ხელისუფლებისკენ ქვები ისროლოს - დიახ, ეს ის მიზანია, რაც ამოძრავებდა ჩემი აზრით, ამ შემთხვევაში, გუშინდელი ფირის გამავრცელებელს. მიზანი არის, რომ მოსახლეობა დაზაფროს და მე ვხედავ უკვე გარკვეულ, პოლიტიკურ, მიზანმიმართულ კამპანიას. ვინც ამ კამპანიაში ვერ დაინახავს, რეალურად ვინ იყო დამნაშავე და პასუხისმგებელი, მე ჩავთვლი, რომ ისინი არიან მართულები და ამ კამპანიის ნაწილი", - განაცხადა სესიაშვილმა.
კითხვაზე, ხელისუფლების მისამართით პროტესტი, ხომ არ არის განპირობებული იმ გამოუძიებელი, პირადი ცხოვრების ამსახველი კადრების გავრცელებით, რომელიც აქამდე მოხდა, პარლამენტის თავდაცვისა და უშიშროების კომიტეტის თავმჯდომარემ აღნიშნა, რომ საზოგადოებაში დამკვიდრდა მიდგომა, რომ თითქოს ასეთი საქმეების გამოძიება მარტივია.
"ზოგადად არის საქმეები, რომლებიც უბრალოდ ტექნიკურადაც ძალიან რთულია, რომ გამოიძიო. ინტერნეტსივრცეში რაიმეს გავრცელება 21-ე საუკუნეში სირთულეს არ წარმოადგენს. ეს არის ოკეანეში ერთი წვეთის ძებნა. ჩვენს საზოგადოებაში და ე.წ. ექსპერტებში ძალიან ამაყად დამკვიდრდა ასეთი მიდგომა - მიდით და გამოძიეთ. რატომ არ იძიებთ? თითქოს ასეთი ზე-მარტივი საქმეა და თავად, რომ ყოფილიყვნენ 2 წუთში გამოიძიებდნენ. ასე, რომ ერთმანეთის მიმართ, ცოტა კონსოლიდირებულები უნდა ვიყოთ. მე ეჭვი მაქვს, ძალიან ბევრს ეშინია, რომ ეს საქმე გამოვიძიოთ, იმიტომ რომ ამის უკან რას აღმოვაჩენთ, მე შემიძლია ამაზე ჩემი წარმოდგენები მქონდეს", - განუცხადა "ინტერპრესნიუსს" ირაკლი სესიაშვილმა.
