24
მარტიდღის ზოგადი ასტროლოგიური პროგნოზი
ღვინის სახელმწიფო საწარმო "გრუზვინპრომი" აუქციონზე 31 105 000 ლარად გაიყიდა. საწარმო შპს Bolero & Company-მ შეიძინა, რომლის 100%-იანი წილის მფლობელი და დირექტორი ყვარლის რაიონის სოფელ ენისელში რეგისტრირებული მამუკა ფოთოლაშვილია. მამუკა ფოთოლაშვილი წილს კიდევ ორ საწარმოში ფლობს და თამაზ ბერიაშვილის ბიზნესპარტნიორია, რომელიც თავის მხრივ, ქიბარ ხალვაშთან ერთად ფლობს წილებს ოთხ ბიზნესკომპანიაში.
შპს "გრუზვინპრომი" საქართველოს მთავრობამ საპრივატიზებო ობიექტების ნუსხაში 2015 წლის თებერვალში შეიტანა, ლარის დასტაბილურების მიზნით.
"გრუზვინპრომის" საწყისი გასაყიდი ფასი 11,6 მილიონი ლარი იყო. "გრუზვინპრომის" ძირითადი უძრავი ქონებაა: ქალაქ გურჯაანში, კოსტავას ქუჩა N1-ში მდებარე 46906.00 კვ.მ. არასასოფლო-სამეურნეო დანიშნულების მიწის ნაკვეთი და მასზე განთავსებული 26 ერთეული შენობა-ნაგებობა (საკადასტრო კოდი N51.01.57.274).
საწარმოს აქვს დებიტორული დავალიანება (2015 წლის 1 სექტემბრის მდგომარეობით) 5 375 839.01 ლარი; შპს "გრუზვინპრომის" ვალდებულებები (2015 წლის 1 სექტემბრის მდგომარეობით) - 15 107 866.6 ლარი; საწესდებო კაპიტალი (2015 წლის 1 სექტემბრის მდგომარეობით) - 67 740 281.62 ლარი; საპრივატიზებო შპს-ს მოძრავ ნივთებზე ვრცელდება სს "ბანკი ქართუს" გირავნობა-ლიზინგის, ხოლო უძრავ ქონებაზე - იპოთეკის უფლება.
აუქციონის პირობების მიხედვით, მყიდველმა საპრივატიზებო საფასური უნდა გადაიხადოს შემდეგნაირად: ხელშეკრულების გაფორმებიდან 1 თვის ვადაში, არანაკლებ 3 მილიონი ლარი; 2017 წლის 01 იანვრამდე, არანაკლებ 6 მილიონი ლარი; 2018 წლის 01 სექტემბრამდე, დარჩენილი საპრივატიზებო საფასური.
მყიდველი ვალდებულია ხელშეკრულების გაფორმებიდან არაუმეტეს 24 თვის ვადაში, შპს "გრუზვინპრომის" საკუთრებაში არსებულ უძრავ ქონებაზე სპირტის და ალკოჰოლური სასმელების მწარმოებელი საწარმოს მშენებლობა-რეკონსტრუქციის და აღჭურვის მიზნით, არანაკლებ 1 მილიონი ლარის ოდენობის ინვესტიცია განახორციელოს; 2016 წლიდან 2019 წლის ჩათვლით კი, ყოველწლიურად, არანაკლებ 3000 ტონა ყურძენი შეიძინოს და გადაამუშაოს.
ამასთან, მყიდველი ვალდებულია, 2015 წლის 27 აგვისტომდე შპს "გრუზვინპრომის" არსებული კრედიტორული დავალიანების, მათ შორის, ამავე კრედიტორული დავალიანების საფუძველზე წარმოქმნილი ფულადი ვალდებულებები სრულად დაფაროს კრედიტორებთან შეთანხმებულ ვადაში, არაუგვიანეს 2020 წლის 1 იანვრამდე;
ასევე, მყიდველი ვალდებულია, შესაბამისი ნასყიდობის ხელშეკრულების გაფორმებიდან ერთი თვის ვადაში, შპს "გრუზვინპრომში" დასაქმებულ 40 პირთან შრომითი ხელშეკრულება შეინარჩუნოს ან გააგრძელოს, არანაკლებ 4 წლის ვადით.
