15
მარტიდღის ზოგადი ასტროლოგიური პროგნოზი
თათუკა ნარტყოშვილი "X ფაქტორს", როგორც წამყვანი, გიგო შიუკაშვილთან ერთად, ცოტა ხნის წინ შეუერთდა, თუმცა ის ამ შოუს პროდიუსერი და სცენარისტია:
- დიდი ხანია აქ ვმუშაობ. 2007 წელს სტაჟიორ ჟურნალისტად მოვედი და ჩემი პირველი პროექტი "ყაზარმა" იყო. მერე "ბარი 4"-ის ჟურნალისტი ვიყავი, ასევე "ვარსკვლავების აკადემია 1"-ს ჟურნალისტიც. "ვარსკვლავების აკადემია 2"-ში კი უკვე რედაქტორი გავხდი, რასაც სხვადასხვა პროექტი მოჰყვა.
"ნიჭიერში" კი წამყვანებთან მუშაობა დამევალა, ე.წ. "ყური" გავხდი, ანუ მათ ყურში ვეჯექი, ასევე ტექსტებსა და სცენარს ვუწერდი. ახლა, რადგანაც გიგოსთან ერთად წამყვანი ვარ, "ყურში" აღარ ვუზივარ ადამიანებს (იცინის).
- შენი წამყვანობა როგორ მოხდა?
- მოკლედ, ცოტა ხნის წინ გადაწყდა, რომ ამ პროექტში კადრშიც გამოვჩენილიყავი. ოღონდ, ეს ყველაფერი შემთხვევით მოხდა. გიგოს ქასტინგი გვქონდა, თავიდან მარტო ჩავწერეთ. მერე გადავწყვიტეთ, რომ ვინმესთან ერთად ჩაგვეწერა. იმ წუთისთვის იქ არავინ იყო, რადგან გიგოს ტექსტები ვიცოდი, დავეხმარე, როლი გავითამაშე და მერე ისე აღმოჩნდა, რომ მის გვერდით მე უნდა ვყოფილიყავი.
- გიგომ საყოველთაო მოწონება დაიმსახურა და შესაბამისად, თქვენმა - დუეტმაც...
- გიგო ყველას შეუყვარდა და მაგ ადამიანზე მართლა ვგიჟდები. რომ ვაკვირდები, მისი დამსახურებაა, რომ ჩემს ცხოვრებაში მასთან ურთიერთობით რაღაცები შეიცვალა.
- მიმაჩნია, რომ გიგოს დედა საკმაოდ ძლიერი ქალბატონია, რომ შვილისთვის ამდენი რამ შეძლო...
- შვილთან ძალიან ბევრს მუშაობს, პატარაობიდანვე სხვადასხვა აქტივობებშია გიგო მისი დამსახურებით ჩართული და მონაწილეობს. ამ ქალბატონმა ცხოვრება შვილს მიუძღვნა და მას დიდ დროს უთმობს. იცით, რომ გიგო თეატრალურ სტუდიაში დადის, მუსიკით არის დაინტერესებული და გატაცებული, შეყვარებულიც ჰყავს და სულ ამაზე ლაპარაკობს.
- პირდაპირ ეთერში მუშაობა არ არის ადვილი, არადა, ის აბსოლუტურად მოგყვება. აღმოჩნდა, რომ კარგი პარტნიორიცაა.
- კარგი პარტნიორია. თუ რეპეტიციაზე რაღაც პატარ-პატარა ე.წ. "ჩეპეები" გვქონია და მისთვის მითქვამს, მოდი, ეს აღარ გვინდა, პირდაპირ ეთერში აღარ გაუმეორებია. ძალიან თანმიმდევრულია და ყველაფერში მომყვება. ბოლო დროს ვატყობ, რომ მალე არავის დახმარებაც აღარ დასჭირდება და შესაძლოა, მარტომაც იმუშავოს ეთერში. მგონია, რომ მის ცხოვრებაში ეს ეტაპიც მალე დადგება.
- თუმცა, ცოტა ხნის წინ სოციალურ ქსელში ერთ-ერთმა ადამიანმა ყოვლად უტაქტო შეფასება მისცა მის სატელევიზიო კომენტარს მაშინ, ოდესაც "X ფაქტორის" მონაწილეები მოხალისეებად გავიდნენ სამუშაოდ: ეს ვის უნდა დაეხმაროს, თვითონ დასახმარებელიაო. რას იტყვი ამაზე?
- მგონი, ამ სიტყვების ავტორს, ამის შემდეგ თავად სჭირდება დახმარება. ასეთი შეფასება გიგოზე წარმოუდგენელია. სიმართლე გითხრათ, ცოტა შოკში ჩავვარდი...
როდესაც ყველანი ერთად მოხალისეებად ვმუშაობდით, ვნახეთ, რომ გიგოს ნამდვილად არ სჭირდება ვინმეს დახმარება და პირიქით. ძალიან აქტიურად იყო ყველაფერში ჩართული, რაც შეძლო, ყველაფერი გააკეთა და შეძლო იმაზე მეტი, ვიდრე წარმოგვედგინა. იმ გოგოს კი, ვინც ის უაზრობა დაწერა, აშკარად პრობლემები აქვს...
- გუშინ ცნობილი გახდა, რომ ევროპის დაუნის სინდრომის ასოციაციამ თავის მთავარ გვერდზე გიგოს შესახებ განათავსა ინფორმაცია...
- კი, დაუნის სინდრომის ასოციაციამ დაწერა, რომ საქართველოში შედგა ასეთი პრეცედენტი, რომ დაუნის სინდრომის მქონე ადამიანი არის მეგაშოუს წამყვანი და დადებითად შეაფასა ეს ფაქტი, რაც ჩვენ ძალიან გაგვიხარდა. ადამიანებისთვის, ვისაც ეს დაავადება აქვს, უდიდესი სტიმულია, რომ ყურები არ ჩამოყარონ და ყოველთვის იბრძოლონ. ეს მაგალითია მათი მშობლებისთვისაც.
- ამ პროექტებზე მუშაობა რას ნიშნავს შენთვის?
- იმდენი ხანია ამაზე ვმუშაობდი, რომ სიმართლე გითხრათ, ვერ წარმომიდგენია, რომ ჩემს ცხოვრებაში ყველაფერი სხვანაირად იყოს. ბავშვობიდან სულ იმაზე ვიყავი ორიენტირებული, რომ ტელევიზიაში მემუშავა. არ ვიცი, ალბათ გამიმართლა, რომ აქ მოვხვდი. რაღაც მომენტში ვიღლები კიდეც, რაც იმის ბრალია, რომ დაძაბული გრაფიკი გვაქვს, ხშირად ღამის თენებაც გვიწევს, განსაკუთრებით მაშინ, როცა მონტაჟის პერიოდია, მაგრამ ჩემი თავი სხვა რეჟიმსა და სხვა ამპლუაში ნამდვილად ვერ წარმომიდგენია, რადგნაც დიდი ადრენალინი ახლავს ამ ყველაფერს. როცა ეთერში გადიხარ, როცა გადაცემა რეიტინგს წერს. ეს ყველაფერი უფრო გეხმარება. მოკლედ, მომწონს ასეთ დიდ პროექტებზე მუშაობა.
- ალბათ პოპულარულიც გახდი და ქუჩაში ბევრი ადამიანი გცნობს.
- ნამდვილად, მესალმებიან სურათს იღებენ, რაც სულაც არ არის შემაწუხებელი, პირიქით, სასიამოვნოა. თბილად მიღიმიან, მომიკითხავენ, გიგოს მოკითხვა არავის ავიწყდება. რა თქმა უნდა, ეს სასიამოვნოა.
მიუხედავად იმისა, რომ ტელევიზიაში ამდენი წელია ვმუშაობ, წამყვანობაზე არასდროს მიფიქრია. ჩემ ხელში დაიწყო ვანიკო თარხნიშვილმა ("ნიჭიერში") და კიდევ ბევრმა წამყვანობა. თუმცა მე და ვანიკომ კი სულ ერთად დავიწყეთ - მან როგორც წამყვანმა და მე - როგორც სცენარისტმა და პროდიუსერმა. დღესდღეობით კადრშიც ვჩანვარ.
- დაოჯახებული ხარ?
- განქორწინებული ვარ და მყავს 3 წლის ელისაბედი, რომელსაც დედიკოს ყურება ეკრანზე უხარია. როგორც წესი, 10 საათისთვის იძინებს, მაგრამ ორშაბათობით ვერავინ აძინებს, უნდა რომ "X ფაქტორს" უყუროს. ამ ეტაპზე ისეთი დაკავებული ვარ, თუ თავისუფალი დრო მაქვს, მხოლოდ ელისაბედს ეთმობა, რადგანაც სამსახურის გამო მასთან ურთიერთობის დეფიციტი მაქვს...
ლალი ფაცია
AMBEBI.GE
