რა მოხდა 1921 წელს ზოოპარკის ტერიტორიაზე: "ზარების გადადნობის" ისტორია, რომელზეც პატრიარქმა სტიქიის შემდეგ იქადაგა
"როცა კომუნისტები საქართველოში შემოვიდნენ და ქრისტიანების და სამღვდელოების დევნა, ასევე ეკლესია-მონასტრების ნგრევა დაიწყეს, დაიწერა ბრძანება, რომ მონასტრებიდან და ტაძრებიდან ჩამოეყარათ ზარები, გადაედნოთ და ამ ფულით, რასაც მოიპოვებდნენ, ზოოპარკი დაარსებულიყო. ასე რომ, ზოოპარკი დაარსდა ტაძრებისა და მონასტრების ზარების ფასად, ამიტომ ეს ზოოპარკი ვერ გაიხარებს. ზოოპარკი უნდა გაუქმდეს და სხვაგან ახალი ზოოპარკი დაარსდეს, რადგან ეს ზოოპარკი ცოდვაზეა დაარსებული", - ეს საქართველოს კათალიკოს-პატრიარქის, ილია მეორის განცხადებაა თბილისში მომხდარი სტიქიის შემდეგ, რომელსაც, უახლოესი მონაცემებით, 19 ადამიანის სიცოცხლე ემსხვერპლა. 3 ადამიანს ამ დრომდე ეძებენ.
Ambebi.ge დაინტერესდა, თუ რა მოხდა თითქმის ერთი საუკუნის წინ ზოოპარკის ტერიტორიაზე. დეტალების გასარკვევად ისტორიკოს სერგო ვარდოსანიძეს ვესაუბრეთ.
"ზოოპარკის ადგილას ადრე წყლის კურთხევა ტარდებოდა, მდინარე ვერეს აკურთხებდნენ", - ამბობს სერგო ვარდოსანიძე.
ისტორიკოსის თქმით, 1921 წელს ბოლშევიკური ჯარების შემოსვლის დროს საქართველოში 1450 ეკლესია იყო, რომელთა უმრავლესობა დახურეს, ზარები ჩამოხსნეს და გადაადნეს, სანაცვლოდ კი საზოგადოებრივი თავშეყრის ადგილები მოაწყეს. მათ შორის არის ზოოპარკიც, თუმცა კონკრეტულად რომელი ეკლესიიდან რომელი ზარი ჩამოხსნეს, ამაზე ინფორმაცია არ აქვს.
"სადაც ზოოპარკია, წყალკურთხევის დღესასწაულზე მდინარე ვერეს აკურთხებდნენ, რადგან მტკვარი ეკოლოგიური თვალსაზრისით შესაბამისი არ იყო, სწორედ ამიტომ აკურთხებდნენ მდინარე ვერეს. მდინარე უკანასკნელად 1923 წელს იკურთხა.
არ ვიცი ზოოპარკი რომელ წელს გაშენდა, მაგრამ ეს ტერიტორია 1921 წლის შემდეგ საზოგადოებრივი თავშეყრის ადგილად გადააქციეს, მანამდე კი წყლის კურთხევა ხდებოდა, ზოოპარკის ადგილას ეკლესია არ იყო, მაგრამ მაგ ადგილზე ტრადიციულად წყლის კურთხევა ხდებოდა", - ამბობს სერგო ვარდოსანიძე.
შეგახსენებთ, რომ გასულ კვირას საკვირაო ქადაგებისას პატრიარქმა განაცხადა, რომ თბილისის ზოოპარკი თავის დროზე კომუნისტების მიერ ეკლესია-მონასტრების გადამდნარი ზარების ხარჯზე დაარსდა და ის იმ ადგილას, სადაც არის, ვერ გაიხარებს.
"მოხდა საშინელი ტრაგედია საქართველოში. ღვარცოფის, ნიაღვრის და წვიმის შედეგად დაიღუპა ხალხი. განადგურდა ზოოპარკი. ცხოველები თავისი ადგილებიდან გადმოვიდნენ და ადამიანებისთვის საშიში გახდნენ. თქვენ ალბათ არც გახსოვთ, რომ რამდენიმე წლის წინ იყო მცირე ინფორმაცია ზოოპარკის შესახებ. როცა კომუნისტები საქართველოში შემოვიდნენ და ქრისტიანების და სამღვდელოების დევნა, ასევე ეკლესია-მონასტრების ნგრევა დაიწყებს, დაიწერა ბრძანება, რომ მონასტრებიდან და ტაძრებიდან ჩამოეყარათ ზარები, გადაედნოთ და ამ ფულით, რასაც მოიპოვებდნენ, ზოოპარკი დაარსებულიყო. ასე რომ, ზოოპარკი დაარსდა ტაძრებისა და მონასტრების ზარების ფასად, ამიტომ ეს ზოოპარკი ვერ გაიხარებს. ზოოპარკი უნდა გაუქმდეს და სხვაგან ახალი ზოოპარკი დაარსდეს, რადგან ეს ზოოპარკი ცოდვაზეა დაარსებული. ბევრს ეს არ ახსოვს და ინფორმაცია ამის შესახებ ჩვენს პრესაში არსებობდა. ცოდვა დაუსჯელი არ რჩება. ვწუხვართ, რომ ქართველი ადამიანი იმდენად დაეცა, რომ საეკლესიო ზარების ხარჯზე და მათ განადგურებაზე ზოოპარკი დააარსეს. აი, ამის შედეგი. დაიღუპნენ ადამიანები და განადგურდნენ ცხოველები", - ბრძანა ილია მეორემ.
თაკო ესებუა
AMBEBI.GE
ფოტოზე| წყლის მიერ მოტანილი სილა, ხრეში და სხვა "ვარაზის ხევში", უნივერსიტეტის გორასთან. 04.08.1928
ფოტო "თბილისის ზოოპარკის" ფეისბუქ-გვერდიდან
ქართველი ჟურნალისტის და ამერიკელი დიპლომატის ქორწილი ვაშინგტონში - "ძალიან ბედნიერები ვართ, რომ ვიპოვეთ ერთმანეთი"
უზენაესი სასამართლოს მოსამართლეობის ყოფილი კანდიდატი თამთა თოდაძეზე - "რა ბრიჯიტ ბარდო ესა მყავს, რა აბია ასეთი ნეტავ"
